النهاردة الأمم المتحدة بتحيي ذكرى منع الإبادة الجماعية.. طب إيه القصة؟

النهاردة يوم 9 ديسمبر اللي بيوافق اليوم العالمي لإحياء ذكرى ضحايا الإبادة الجماعية.. ومرور 76 سنة على اتفاقية منع الإبادة الجماعية والمعاقبة عليها.. واللي أعلنتها الأمم المتحدة سنة 1948م.. وده حصل بعد النكبة في فلسطين ومجزرة دير ياسين والحرب العالمية الثانية.. وكان مقصود بيها أي جرائم بترتكب عن قصد لتدمير مجموعة من الناس.

ومن ضمن أهم بنود الإتفاقية دي اللي تعتبر ارتكاب لجريمة الإبادة الجماعية:

1-قتل أعضاء من الجماعة

2-إلحاق أذى جسدي أو روحي خطير بأعضاء من الجماعة

3-إخضاع الجماعة عمداً لظروف معيشية يراد بها تدميرها المادي كلياً أو جزئياً

والاتفاقية بتأكد إن الإبادة الجماعية جريمة حسب القانون الدولي وكمان بيتم العقاب عليها! والمسؤولية الكاملة بتكون على الدولة اللي عملت الجريمة دي.

وعلى الرغم من الإبادة اللي بيمارسها الاحتلال قدام العالم كله في غزة ولبنان
وعدد شهداء غزة اللي وصل لأكتر من 44 ألف شهيد وأعداد المصابين اللي بتزيد كل دقيقة وجزء كبير منهم من الأطفال والنساء ده غير شهداء لبنان اللي وصلوا لأكتر من 4 آلاف شهيد.. ده غير حرمان الشعب الفلسطيني من أبسط حقوقهم زي إنهم يقدروا يتعالجوا على الأقل..

فهل الاحتلال محتاج يعمل إيه أكتر من كده عشان جرائمه تحسب إبادة!
والسؤال الأهم هنا إمتى هيتحاسب الاحتلال على جرائمه والقانون الدولي هيعاقبه؟