ليه دايمًا انت الشخص الأكثر حماسة؟

أكيد عديت بموقف في حياتك شوفت فيه شخص متحمس أكتر من اللازم.. اللي بنقول عليها ده “حماس البدايات”.. سواء كنت انت او شوفت ده في حد تعرفه فانت برضه أكيد شوفت نتايج الحماس ده وإزاي ده ممكن يأثر على قرارته ونتايجها كمان على حياته.. طيب ليه الاندفاع والحماس ده ممكن يكون حاجة وحشة؟ وليه في ناس بتكون أكثر حماسا من ناس تانية وإزاي نغير من ده؟

هو العلم بيقول ايه؟

من أبرز النظريات في علم النفس واللي بتساعدنا نفهم الشخصية بشكل أحسن هي نظرية “العوامل الخمس الكبرى” أو “الـBig Five” واللي اشتغل عليها أول مرة عالم النفس لويس ثورستون والعالم ريموند كاتل وطورها كوستا وماكري.. واللي قالوا إن في خمس عوامل رئيسية لتصنيف سمات الشخصية:

1- Openness: الانفتاح.. وده عامل بيقيس قدرة الشخص على التجارب الجديدة
2- Conscientiousness: الانضباط والاجتهاد.. وده العامل اللي بيقيس قدرة الشخض على الالتزام وتحمل المسؤولية في الحياة
3- Extraversion: الحيوية والاجتماعية.. وبناء على العامل ده بيقيسوا قدرة الشخص على انفتاحه للعلاقات الاجتماعية (خلي بالك من دي)
4- Agreeableness: التوافق والود.. والعامل ده بيقيسوا به سمات الشخصية اللي ليها علاقة باللطف وحسن النية والتعاون
5- Neuroticism: التوتر والانفعالية.. والعامل ده يقدروا يميزوا به سمات الشخصية المتوترة واللي بتعاني من القلق والاكتئاب


ونقدر نقول إن كل شخص فينا عنده مزيج من العوامل دي كلها مع بعض بس بتتفاوت بقى.. يعني فيه اللي ياخد شوية انفتاح على التجارب معاهم نص كيلو اجتهاد وربع حيوية وتُمن توافق وتوتر.. ده مش هيبقى زي اللي خد اتنين كيلو اجتهاد ونص انفتاح وربع حيوية وتوافق وتوتر..

هو ده السبب:

على حسب النظرية فالأشخاص اللي عندهم درجات عالية من سمات الحيوية والاجتماعية بتكون صفاتهم مايلة للاندفاع والمرح والطاقة والثقة الاجتماعية والميل للتعبير عن الذات.. كل دي المفروض تكون صفات حلوة صح؟
على قد ما الصفات دي فعلًا حلوة جدًا بس للأسف بيجي معاها حاجة هي اللي ممكن تكون بتضايق الأشخاص الأكثر حماسة دايمًا وبتسببلهم خيبات أمل متكررة وهي.. التوقعات العالية.. سمة من سمات الشخصية الحيوية هي الثقة الاجتماعية ودي بتخليهم يتوقعوا انهم هيلاقوا دايمًا على قد اللي بيطلع منهم.. بس الواقع ساعات بيكون مؤلم..

مميزات وعيوب:

على قد ما عامل الحيوية والاجتماعية له مميزات على الشخصية اللي بتتميز بسماته.. زي انه بيخليه عنده حماس كده ومتحفز وكله طاقة.. إلا إن برضه بيكون فيها خطر على صاحبه, وده لأن الاندفاع ده ممكن يخليه ياخد قرارات غلط او مش مدروسة كفاية وكمان هيعرضه للإرهاق والإستنزاف السريع وهيلاقي نفسه مع الوقت مش قادر يكمل أي حاجة من اللي بيبدأها..
كمان الحماس الزيادة لما بيصاحبه زيادة في التوقعات دي التركيبة المثالية لخيبة الأمل.. سواء كانت توقعات في شغل جديد او علاقة جديدة داخل فيها بكل طاقتك وبتدي كل اللي في قلبك الحياة مش دايمًا هتجيلك باللي انت بتتوقعه.. ومش محتاج أقولك قد ايه ده بيضايقك صح؟

الروشتة:

الحماس الزيادة مش عيب بالعكس ساعات بيكون مصدر طاقة كبير للبدايات بس علشان تقدر تكمل محتاج تهدأ شوية.. علشان في حاجات كتير بتضيعها وانت متحمس ومندفع أولهم وأكبرهم دايمًا وقتك ومشاعرك.. ما بين الاندفاع وخيبة الأمل رحلة حاول توصل بالسلامة من غير ما تفقد جزء كبير من طاقتك في البدايات.