اوعى تتجاهلها.. رسايل خفية جسمك بيبعتهالك عشان يقولك فيه مشكلة صحية لازم تنتبه لها
جسمك تركيبة معقدة ولما يكون فيه مشكلة بيحاول يتواصل معاك بشكل معين فلازم نبقى عارفين إزاي.. عشان دي ممكن تكون رسالة تحذير بيبعتهالك إن فيه مشكلة صحية لازم تاخد بالك منها.. وهنقولك كل علامة في جسمك بتحاول توصلك إيه
الشفايف
شفايفك مش مجرد علامة جمال.. هي مؤشر بيكشف حالتك الصحية فمثلُا:
- لون شاحب أو مزرق: دي علامة إن مستوى الأكسجين في دمك قليل وإن ممكن يكون فيه مشكلة في الجهاز التنفسي أو بتعاني من فقر دم أو فيه نقص في خلايا الدم الحمراء أو مشاكل في القلب والأوعية الدموية
- جافة ومشققة: علامة على سوء التغذية أو نقص فيتامين ب.. ولو متشققة من الجناب فده دليل على نقص الحديد أو فيتامين ب أو العدوى الفطرية
- وارمة: جسمك عنده حساسية من حاجة معينة أو بتعاني من التهاب.. فـ حسب الأكاديمية الأمريكية للأمراض الجلدية التورم المفاجئ أو المتكرر بيحتاج عناية طبية دقيقة عشان تستبعد أي أمراض زي الوذمة الوعائية اللي بتكون عبارة عن ردة فعل تجاه دواء خدته أو اضطراب مناعي معين
- القروح أو البثور: بتكون نتيجة عدوى فيروسية زي قرحة البرد وممكن يكون علامة على ضعف جهازك المناعي
الأظافر
الدكاترة بتقدر تعرف مشاكل صحية كتيرة منها.. فمثلًا:
- البقع البيضاء: دي علامة على نقص الكالسيوم.. وممكن يكون بيوصلك رسالة إن عندك تسمم بالمعادن التقيلة زي الزرنيخ والرصاص.. أو علامة على الصدفية ودي مشكلة جلدية مزمنة بتسيب بقع ملتهبة ومقشرة على الجلد.. ولو كله لونه أبيض ده معناه إن عندك نقص كبير للبروتين في مجرى الدم أو رسالة تحذير لوجود أمراض الكلى أو الكبد أو كمان السكر
- تضخم الظفر بشكل أكبر من الطبيعي: علامة على انخفاض مستوى الأكسجين في الدم بشكل كبير وبيرتبط خاصة بسرطان الرئة.. وكمان ممكن يكون علامة على تليف الكبد أو التهابات في الرئة
- الظفر الأزرق: ممكن تبقى إشارة على مشكلة بسيطة زي افتقار الأكسجين أو إشارة بتوضح وجود مرض خطير في القلب أو انتفاخ الرئة وفي الحالتين ضروري تزور دكتور على طول
- الظفر الأصفر: لو لقيت لون الظفر بيتحول للون الأصفر فدي علامة على التهاب المفاصل الروماتويدي
- اللي بيتكسر بسرعة أو بيتقشر: بيحاول يقولك إن فيه قصور في وظيفة الغدة الدرقية أو إنك محتاج تتغذى كويس وتاخد بالك من نظام أكلك
اللسان
أبيض جاف: لو عليه علامات بيضاء ممكن يكون علامة على مرض القلاع الفموي ودي عدوى فطرية بتظهر على اللسان والفم وسببها ممكن يبقى المضادات الحيوية لو بتاخدها بجرعات عالية أو لمدة طويلة أو مابتهتمش بصحة سنانك وتغسلها كل يوم.. وساعات تانية السبب بيكون بسبب نقص الحديد أو مشاكل في الغدة الدرقية ومرض السكر
الأسود: نادر جدًا يحصل بس بتكون نتيجة استخدام مضادات حيوية مثلًا وبيخلي ريحة البوق مش أحسن حاجة وحلها بسيط إنك تغسل سنانك من مرتين لـ 3 مرات كل يوم
الشاحب: ممكن يبقى كده بسبب التهاب اللسان الضموري أو نقص فيتامين B12 أو الحديد في جسمك.. وده لأن فيتامين B12 بيزود من ترطيب البشرة وبيقلل من تغير لون الجلد وظهور التصبغات.. والحديد ضروري لإنتاج الهيموجلوبين اللي بينقل الأكسجين من خلال الدم لكل خلايا الجسم والأسجين بيكون ضروري عشان الجروح والخدوش تداوى بسرعة.. فبيكون الحديد مهم في بناء أنسجة جديدة
المجعد: اللي بيكون فيه شقوق دي علامة على اضطرابات الجهاز المناعي
الوجه
- طفح جلدي: خاصة اللي بتكون على شكل فراشة ومابتروحش خالص دي علامة على مرض الذئبة الحمراء وده مرض مناعي ذاتي بيسبب حمى وآلام في المفاصل
- شحوب مفاجئ: ده إما بسبب الأنيميا أو ضغط دمك واطي أو عندك مشكلة في الدورة الدموية
- اصفرار البشرة والعينين: دي إشارة واضحة إن فيه مشكلة في الكبد أو المرارة زي التهاب الكبد أو حصوات المرارة
العيون
- حلقات رمادية أو بيضاء: علامة على ارتفاع مستوى الكوليسترول والدهون الثلاثية خاصة لو ظهرت وانت في سن صغير قبل الأربعين
- جفاف وتقرح العين: دي من أشهر أعراض الأمراض المناعة الذاتية زي الذئبة الحمراء والتهاب المفاصل الروماتويدي.. فبتلاقي عينك بتنزل دموع كتير أو جافة خالص وبتحس بحكة شديدة فيهاوبتبقى محمرة
- جفن متدلي: دي إشارة على إن فيه مشكلة في العضلات أو الأعصاب زي الوهن العضلي الوبيل وده مرض عصبي عضلي بيضعف العضلات وبيسبب مشاكل في التنفس والبلع
الأطراف (القدمين واليدين)
- تورم: علامة على وجود مشكلة في الكلى أو القلب أو الغدة الليمفاوية
- باردين دايمًا: ممكن ده نتيجة لضعف الدورة الدموية للأطراف أو قصور في الغدة الدرقية أو إشارة إن عندك أنيميا
- تنميل مستمر: جسمك ناقصه فيتامين B12 وكمان ممكن يكون علامة على اعتلال الأعصاب ومشاكل في العمود الفقري
دلوقتي انت عرفت العلامات اللي ضروري تاخد بالك منها عشان تفهم جسمك بيتكلم إزاي وبيقولك إيه.. فلو حسيت إن فيه أي حاجة قرأتها موجودة عندك ضروري تزور دكتور متخصص!
