بدون جراحة بدون ألم.. 10 أفكار في اللبس تخفي بيهم الكرش

مين فينا وهو نازل مش بيقف قدام الدولاب محتار يلبس إيه.. والحيرة هتزيد لو عندنا كرش وخصوصا في شهور الصيف.. بنحتاج نخبي الكرش بأي طريقة عشان يكون شكلنا كويس.. ولذلك بشرى سارة.. جمعنالكم أفكار تساعدكم تخفوا الكرش لحد ما تنزلوا جيم:

• مبدئيًا نبعد عن اللون الأبيض وباقي الألوان الفاتحة لأنها بتظهر
  تفاصيل الجسم.. عكس الألوان الغامقة شيك وبتستر

• نلبس الألوان المقلمة وفيها خطوط بالطول لأنها
  بتظهرنا أرفع وأطول من غير سحر ولا شعوذة

• ابعد عن الملابس الضيقة تمامًا عشان هتبقى
  جرأة منك تندم عليها وخليك في حاجات فضفاضة

• كمان نوعية وماتريال القماش بيفرق.. فيه حاجات بتمسك في
  الجسم وترسمه زي الستان أو الليكرا.. فافتكر اني قولتلك بلاش
  وخليك في القطن والقماش السميك شوية

• ولو لبس الحزام ضروري.. بالنسبة للرجالة يفضل الحزام مش رفيع
  ولا لون فاتح.. أما للبنات والسيدات ابعدي عن الحزام الكبير

• البناطيل.. بالنسبة للسيدات فالبناطيل الهاي ويست أحسن
  لانها بتداري البطن.. أما للرجالة فالأفضل تبعد عن البناطيل اللي
  وسطها ساقط.. جرب تجيب بنطلون عادي هتتبسط وهنتبسط كلنا

• المناسبات للرجال: يفضل عند الشباب والرجالة مايدخلش القميص
  جوه البنطلون.. ولو مضطر.. يبقى مانسقطش البنطلون
  ونخليه تحت الكرش احنا كده بنشاور عليه مش بنخفيه

• المناسبات للسيدات: لو حفلة أو فرح وقررتي تلبسي دريس.. ممكن
  تختاري قماش مناسب ومايكونش ماسك من ناحية البطن عشان
  هيظهرها وممكن الاستعانة بمشد في الظروف دي
  
  

• وممكن برضه نستخدم حيلة التشتيت في اللبس.. يعني ممكن نلبس حاجة فيها رسمة عند الكتف أو منطقة الصدر. أو نرفع الأكمام شوية.. ولو عايزين نخفي الموضوع يبقى سكارف طويل يداري الجزء بتاع البطل كله.

• كمان ممكن نلجأ لإكسسوارات: ساعة للرجالة أو بريسلت.. والسيدات كمان ممكن الاكسسورات بتاعتك براحتك
  
  

وفي النهاية لو ماعرفتش تعمل ده كله.. لا يكلف الله نفسا إلا وسعها استنى الشتا وهنستخبى في اللبس كده كده