مين هو إبراهيم دياز.. نجم أسود الأطلس في كأس الأمم؟
إبراهيم دياز لاعب منتخب المغرب في المشاركة الأولى ليه مع أسود الأطلس في بطولة أمم إفريقيا اللي بتتلعب دلوقتي قدر يكون من الأسامي اللي ناس كتير بتتكلم عليها.. وفي أوقات قائد حقيقي للفريق في الملعب وعوض المغاربة عن غياب أشرف حكيمي ورومان سايس في أوقات .
دياز أثبت أنه مش مجرد اسم جديد دخل قايمة منتخب المغرب لكن لاعب داخل بمنطق مختلف.. أول بطولة رسمية ليه مع أسود الأطلس كانت كافية تحطّه في دايرة الضوء سواء بأهدافه أو بحضوره الفني اللي فرق في شكل المنتخب وخلّى الجمهور يحس إنه لاعب جاهز للمسؤولية من غير وقت تمهيد وكأنه كان مستني اللحظة دي من سنين.
ورغم أنه بيعاني من موسم متقلب مع الريال تحت قيادة تشابي ألونسو وقعدته كتيرعلى للدكة إلا أن صاحب الـ 26 عامًا عمل “كام باك” وبقى واحد من أبرز اللعيبة في البطولة والهداف لحد دلوقتي برصيد 3 أهداف.. وكمان بقى أول لاعب مغربي يسجل في كل مباريات دور المجموعات بكأس الأمم الإفريقية من نسخة 1972، رقم بيحط اسمه في سطر واحد مع علامات كبيرة في تاريخ الكرة المغربية.
موهبة بتكبر بدري
إبراهيم دياز اتولد سنة 1999 في مدينة ملقة الإسبانية وبدأ مشواره الكروي من أكاديمية نادي ملقة وهناك ظهرت ملامح لاعب مختلف من سن صغير، مهاري بيعرف يلعب بين الخطوط وسريع في اتخاذ القرار وكمان عنده ميزة اللعب بالقدمين.. تطوره السريع خلّى اسمه يطلع بدري على رادار الأندية الكبيرة وده مهّد لخطوته الأوروبية الأولى وهو لسه في سن المراهقة.
التعلم وسط الكبار
في 2015 دياز راح مانشستر سيتي وهناك دخل مرحلة التكوين الحقيقي على مستوى الاحتراف الأوروبي واتدرّب مع بيب جوارديولا وشارك مع الفريق الأول وسجّل هدف تاريخي خلاه أصغر لاعب يسجل في تاريخ النادي بكأس الرابطة.
ورغم الموهبة الواضحة اصطدم اللاعب بزحمة النجوم وقلة دقائق اللعب وده اللي خلاه محتاج محطة تديه فرصة أكبر ومساحة أوسع للتعبير عن نفسه.
في يناير 2019 لبس إبراهيم دياز قميص ريال مدريد لأول مرة خطوة كانت حلم لأي لاعب لكنها جات في توقيت صعب لنادي بيمر بمرحلة تغيير ومنافسة شرسة في الخط الهجومي.. دياز شارك بس مش بشكل مستمر.. فقرار خروجه المؤقت بقى ضروري عشان يحافظ على تطوره ويكمّل مسيرته بشكل صح.
الانفجار الحقيقي
الانتقال إلى ميلان كان نقطة التحول الأهم في مسيرة إبراهيم دياز لأنه أخيرًا لقى نفسه ولعب بشكل منتظم واستحمل ضغط جماهير سان سيرو وبقى عنصر أساسي في فريق رجع لمنصات التتويج بالفوز بلقب الدوري الإيطالي موسم 2021-2022.. الفترة دي شكّلت شخصية دياز وخلّته لاعب أنضج ذهنيًا بيعرف إمتى يهدّي اللعب وإمتى يحسم.
العودة لريال مدريد
في صيف 2023 رجع دياز لريال مدريد لكن المرة دي كلاعب أكتر نضجًا وثقة.. وقدر يفرض نفسه ضمن منظومة كارلو أنشيلوتي وسجّل أهداف مؤثرة في الدوري الإسباني ودوري أبطال أوروبا وبقى اختيار في خطة في التدوير الهجومي مش مجرد لاعب بديل.. وده اللي فتح له باب الحضور الدولي الكبير.
قرار القلب والعقل
رغم تمثيله لإسبانيا في الفئات السنية ومشاركته في مباراة ودية مع المنتخب الأول.. قرر إبراهيم في مارس 2024 تمثيل منتخب المغرب في قرار جمع بين الانتماء العائلي والقناعة الكروية.. هو قال أكتر من مرة إنه بيحس إنه إسباني ومغربي في نفس الوقت لكن إحساسه بالتقدير والمشروع الواضح اللي اتعرض عليه خلاه يختار المغرب وهو مطمئن.
بداية مثالية
أول بطولة رسمية لإبراهيم مع منتخب المغرب هي كأس أمم إفريقيا 2025.. والبداية في دور المجموعات كانت قوية لأنه عنصر ثابت في التشكيل وواحد من أخطر لاعبي المنتخب بين الخطوط وعلى الأطراف.
وليد الركراكي المدير الفني لمنتخب المغرب عبّر في أكثر من مناسبة عن ثقته الكبيرة في إبراهيم وإن اللاعب عنصر مهم في مشروع المنتخب وإن الفريق محتاجه لو بيفكر بجدية في المنافسة على اللقب شخصيته الهادية وقدرته على التعامل مع الضغط وقراراته الفنية
دياز لعب مع المغرب لحد دلوقتي في مسيرته 18 لقاء سجل 11 هدف وصنع 2 في تأثير كبير واضح لواحد ممكن يكون من الجيل الذهبي القادم للمغرب.
