بعد إنجازاتها مع نادي أبوظبي.. مين هي اللاعبة والمدربة المصرية سارة حسنين؟
بعد الإنجاز التاريخي اللي حققته مع فريق أبوظبي الرياضي للسيدات بإنها تتأهل بيهم لدوري أبطال آسيا لأول مرة في تاريخ النادي.. مين هي سارة حسنين؟
سارة حسنين اللاعبة:
سارة حسنين من مواليد 1983 ومن أبرز النجمات العربية في كورة القدم النسائية لعبت في أندية زي جولدي ونادي المعادي وأخيرًا نادي أبوظبي الرياضي.. كمان كانت في منتخب مصر ومن إنجازاتها إنها حققت بطولة الدوري المصري النسائي أكتر من مرة وده كان في الفترة من 1992 لـ 2004 حسب تقرير على ON Sport
وكمان كانت أصغر لاعبة أفريقية وعربية تنضم لتشكيل منتخب العالم في ماتش ودي كده قبل افتتاح كأس العالم للسيدات في كاليفورنيا 1999
سارة احترفت في نادي أبوظبي الرياضي من 2005 لموسم 2016 وحققت الدوري مع الفريق موسم 2015-2016 وكمان حققت معاه 3 بطولات كمان
سارة حسنين المدربة
في 2021 كملت سارة الماجستير وقدرت تنجح إنها تكون مساعد مدرب وبعدها مدرب.. عشان تاخد مسؤولية تدريب فريق أبوظبي وتكمل مشوارها معاهم بس المرة دي كمدربة ومعاهم سارة حققت الدوري في موسم 2021-2022 وبكده بقت أول مدربة مصرية تحقق الدوري كلاعبة ومدربة في نفس الوقت.. مش بس كده هي كمان حققت معاهم الدوري موسم 2023-2024
وفي 2023 برنامج كابيتانو الموسم التاني.. سارة كانت بتقود فريق باسم “ثابت البطل” ووصلت بيهم للنهائي عشان تكسب فريق “شحتة” اللي كان بيدربه الكابتن محمد اليماني بمجموع 5-1 للماتشين.. في الذهاب كسبوا 2/1 وفي العودة كسبوا 3/0 عشان يتوج فريق ثابت البطل بالكأس مع مدربته سارة حسنين
حسب موقع دوري أبطال آسيا للسيدات وحسب موقع Koraplus
وآخر إنجاز تاريخي ليها ولفريقها حققته كان إنها وصلت بالفريق بتاعها لأول مرة في تاريخهم لدور المجموعات في دوري أبطال آسيا موسم 2024-2025 وده كان بعد الفوز على فريق النصر السعودي 1-0
وبعد فوزها صرحت “أنا سعيدة للغاية ولا أستطيع وصف مشاعري. أشكر جميع اللاعبين الذين أظهروا موقفا إيجابيا وروحا وعزيمة.. هذه هي الأشياء الأكثر أهمية في كرة القدم.. من يريد الفوز يجب أن يقدم التضحيات”
“أشكر كل من ساهم في هذا الإنجاز.. والآن يجب على اللاعبات الاحتفال لأنهن وصلن إلى دور المجموعات لأول مرة.. وما هو قادم سيكون أفضل لأننا نريد أن نثبت أن لاعباتنا قادرات على التحدي”
في النهاية سواء حققت إنجازات أكبر في البطولة أو لأ فاهي مثال كبير على الاجتهاد والعزيمة ومسيرتها تعتبر مثال للتشجيع وإنك تعافر عشان توصل للحاجة اللي إنت عايزها
