بعد استخدامه ضد أهالي غزة.. إيه هو الفسفور الأبيض؟

ظهرت مؤخراً فيديوهات وصور بتأكد استخدام إسرائيل للفسفور الأبيض في الحرب الجارية دلوقتي في غزة.. عشان كده حبينا نشرح أكتر ايه هو الفسفور الأبيض، وده بعد ما أعلنت منظمة هيومن رايتس إن الجيش الإسرائيلي استخدمه بالفعل في هجومه على غزة ولبنان أيام  10 و 11 أكتوبر وتوجيه الاتهام لإسرائيل بده  حسب قناة CNBC 18

الفسفور الأبيض عبارة عن مادة شمعية شفافة أو بيضاء أو صفراء لما بتتعرض للضوء بتبقى معتمة، ويتم تصنيعه من صخور الفوسفات لأنه غير موجود بشكل طبيعي.. وبيشتعل لما بيتعرض للأكسجين وفي حالة وجود المواد المؤكسدة وبيسبب انفجار قوي.

إستخدامه:

حسب موقع RT Arabic
أول حاجة هي “التعتيم”:- يعني حجب الرؤية 

وهو أول استخدامات الفسفور الأبيض عشان بيطلع منه ستارة دخانية بالليل أو بالنهار وده بيساعد قوات الجيش أثناء الحروب على الإختباء وتشتيت الخصم، كمان بيستخدم في صناعة الذخيرة، والمتفجرات، وقنابل الدخان وفي الألعاب النارية كمان، وله استخدامات آدمية مفيدة بعيداً عن الحروب وهي صناعة الأسمدة، ومبيدات القوارض، وسبائك البرونز الفسفوري، وأشباه الموصلات (دي مادة صلبة بيتنقل فيها التيار الكهربي بصعوبة) والطلاء الكهربائي وأخيراً صناعة المواد الكيميائية.

 بالنسبة لتأثيره على الإنسان فهو بيأثر عليه بالطرق دي:

بيعتمد التأثير على الفترة الزمنية اللي بيتعرضلها الإنسان للفسفور وخلينا نلخص في كام نقطة أنواع التأثير:-

١- %10 بس من تأثير الفسفور الأبيض تقدر تكون قاتلة للإنسان، وإذا نجا الشخص منها بيواجه مشكلة باقي حياته سواء في الحركة أو الصدمة النفسية

٢- لو بلعت الفسفور ده سواء من خلال الفم أو شميته أو لمس جلدك أو حتى عينك، في المرحلة الأولى اللي هي من دقائق لـ ٨ ساعات، جهازك الهضمي بيتأثر بإن بيحصل قيء وتشنجات وآلام في البطن وممكن يؤدي للوفاة خلال يوم أو اتنين (المرحلة التالتة)، بعدين بندخل في المرحلة التانية بتكون من بعد الـ ٨ ساعات ولحد يومين وهي مرحلة خالية من الأعراض، في المرحلة التالتة والأخيرة واللي بتبدأ من بعد ٤ لـ ٨ أيام كل أعضاء الجسم  تقريباً  بتتأثر وممكن تنتهي المرحلة دي بالوفاة

٣- في حالة إنك اتنفسته ده هيأثر على الجهاز التنفسي وهيسبب كحة، ولو لمس جلدك هيسببلك حروق شديدة بتكون (نخرية-Necrotic) وده معناه ان مساحة كبيرة من الأنسجة ماتت, وبيكون لونها أصفر وليها ريحة شبه التوم، ولو لمس عينيك هيحسسك إن فيها جسم غريب وهيسببلك سيولة كبيرة في الدموع وحساسية شديدة من الضوء وممكن تسبب تلف للقرنية لأنها مادة كاوية

طيب إيه وضعه بالنسبة للقانون الدولي؟ وهل محظور ولا لا؟

أولوية القانون الدولي هي حماية المدنيين عشان كده على الرغم إن الأسلحة الحارقة اللي منها الفسفور الأبيض مش محظورة من القانون الإنساني الدولي بس الدول كلها مطالبة بالحذر الشديد في التعامل بيه لحماية المدنيين، وده طبعاً عكس اللي عملته إسرائيل مؤخراً في هجومها على غزة ولبنان.. كمان أقل تأثير منه بس بيأدي لتدمير المباني والمحاصيل والحيوانات وده بيسبب أزمة إنسانية كبيرة عشان ماحدش هيعرف يعيش بالشكل ده.

طيب لو الشخص اتعرضله إيه الإسعافات الأولية اللي يقدر يعملها؟ 

مفيش علاج لتسمم الفسفور الأبيض ولكن بنحاول نقدم مساعدة للشخص المصاب حسب طريقة الإصابة:-

١- لو في عينه: نبعد الشخص عن المكان ونغسل العين بكمية كبيرة من المياه الباردة ١٥ دقيقة على الأقل، ونغطيها بكمادات رطبة عشان ما ترجعش لنشاطها تاني، ومانحطش أي مرهم زيتي أو دهني عشان بيمتص الفسفور والامتصاص ده بيسبب حروق.. ولازم عناية طبية مباشرة

٢- لو عن طريق الفم: إبعاد الشخص المصاب عن المكان ونتأكد ان المجرى التنفسي مش مسدود، ونمنعه إنه يتقيأ ونراقب وظائف القلب كلها من ضغط دم ونبضات وتنفس، كمان سكر الدم ومستوى الأكسجين.. وفي الاخر لو في أي صدمة أو انخفاض ضغط الدم لازم نديله سوائل وريدية والأكيد العناية الطبية المباشرة

٣- لو عن طريق التنفس، إبعاد الشخص المصاب وقياس التنفس والنبض، بنتأكد إن مجرى التنفس مش مسدود  وإعطائه أكسجين لو في صعوبة تنفس أو حتى تنفس صناعي (لازم استخدام حاجز)، والتأكد من عدم تراكم السوائل في الرئتين والعناية الطبية المباشرة
٤- الجلد: الإبعاد وتغطية الأجزاء المصابة بالماء مباشرةً أو حتى كمادات بقطعة قماش، ونشيل الجزيئات الفسفورية اللي باينة على الجلد، ومتابعة درجة الحرارة وتأثير الماء البارد، ونرمي جزيئات الفوسفور في مياه باردة عشان نحافظ على أفراد الجهاز الطبي.. والعناية الطبية المباشرة.

وفي جميع الحالات المصابين بيه بيكونوا محتاجين عناية بسيطة والتأكد من كفاءة كل الأجهزة في الجسم وتقديم المساعدة لحد ما يحصلوا على عناية طبية مباشرة.