بعد انتشار تريند تدريجة الجناب والإحساس بالجمدان اعرف إيه هو جنون العظمة؟

أوقات فيه ناس بتحس إن هم ليهم دور وإنجاز كبير سواء على مستوى ضيق زي الشغل والبيت وصحابهم أو على مستوى واسع زي البلد اللي هم فيها أو حتى العالم كله وفاكرين إن هم محور الكون وليهم الفضل في كل حاجة.. والناس بتنكر  إنجازاتهم دي ومش معترفين بيها أو بيحاولوا يحبطوهم وده بيتسمى “Megalomania” أو “جنون العظمة”

خلونا نعرف الأول إيه هو “جنون العظمة”

حسب موقع elconsolto وموقع webteb

الشخص بيعيش حياته بشكل طبيعي جدا وبيعمل الحاجات اللي بيعملها في يومه بس في الغالب علاقته الاجتماعية هتتأثر وهيبقى شبه معزول عن الناس.. جنون العظمة هو مرض عقلي أو اضطراب في الشخصية بيخلي الشخص يحس إنه أجمد وأحسن من اللي هو فيه.. حتى لو هو أقل بكتير من التصور اللي في دماغه ده ورغم إن فيه أدلة حقيقية وواقعية برضه هينكرها!

طب أسبابه إيه؟

– الضغط العصبي

لما تبقى متوتر شوية هنا دماغك مش بتشتغل بكفاءتها الطبيعية بالعكس بتقل جدا عن الطبيعي.. وبتبدأ مع ده إنك تشك في كلام الناس ناحيتك والقصد هنا مش التوتر في الحاجات الوحشة بس زي إنك تخسر شغلك أو تخسر شخص إنت معاه.. لأ ده ممكن يكون في حالات حلوة زي إنك عندك مناسبة سعيدة زي لما تيجي تتجوز مثلا فا تبدأ تقلق وتتوتر بسبب الحاجات اللي بتمر بيها خلال الحدث ده 

– تقلبات عاطفية

التقلبات المزاجية والعاطفية اللي بتحصل بسرعة زي إنك تكون بتحب شخص وفجأة تكرهه أو العكس.. هنا بتكون غالبًا معرض إنك تتصاب بجنون العظمة 

– قلة النوم

الأرق المستمر ولفترة طويلة ممكن يخلي تفكيرك مشتت طول النهار وهيكون في صدام مع الناس لأن تركيزك بيبوظ والدنيا بتبدأ تسيح منك

الأعراض اللي ممكن تعرف منها إن عندك “جنون العظمة”

1- دايمًا هتبقى شاكك في دوافع وأسباب الناس وطريقة تعاملهم وإنهم مش بيدوك حقك

2- هتفضل تسأل وتتسائل عن اللي الناس بيعملوه سواء بالتفكير الداخلي في دماغك أو حتى بصوت عالي وقدامهم

3- لما تحس إن كل الرسائل أو الكلام متوجهلك إنت حتى لو إنت مش طرف في الحاجة دي بأي شكل.. هتحس نفسك محور الكون حرفيًا 

4- هتشوف إن ليك دور كبير في العالم بشكل ما وكمان ماحدش معترف بده وهتحس الناس بتحبطك.. مع إن إنت أقل من ده بكتير “وده مش تقليل منك لكنه الواقع”  

5- مش هتثق في أي حد.. قريب غريب نسيب حبيب وأي حاجة آخرها ب

6- لما تركز مع كل حاجة الناس بيعملوها ناحيتك سواء نبرة صوتهم أو طريقة كلامهم وأسلوبهم في التعامل مع إن الموضوع مالوش أي معنى في الواقع 

7- في كبرياء كده دايمًا بيحس بيه المصاب بجنون العظمة وهو إنه أجمد من كل الناس وأهم من كل الناس وهو مايعرفوش غير 3 “أمه وخالته وصاحبه اللي مش طايقه”

التعامل والعلاج

حسب مجلة verywellmind

– في الغالب مش هتفهم الشخص المصاب بجنون العظمة لكن أفضل حل هو إنك تتعامل بصبر وهدوء

– إنك تناقشه مش هيكون حاجة مفيدة.. المفيد هو تقليل المجادلة معاه أو ماتدخلش فيها أصلا.. كمان تركز على مشاعره

– ممكن ترشحله إنه يزور متخصص نفسي يساعده يوصل للواقع ويفهم نفسه ويحسن الدنيا بشكل صح

– العلاج غالبًا بيحتاج يكون مزيج من العلاج النفسي وهنا بيقدر يفهم الاضطراب اللي عنده ويتعامل معاه إزاي وكمان هيخليه يغير معتقداته وأفكاره السلبية.. وبعض الأدوية وده معناه إن الأفضل يزور حد متخصص عشان يرشح له المناسب له والحل الأفضل

في النهاية مش معنى إن عملت حاجة زي إنك درجت الجناب أو حققت إنجاز كبير أو حتى اشتريت حاجة جديدة كبيرة وغالية إنك تتنطط بيها أو تتكبر بيها على الناس.. بالعكس المفروض تكون متواضع وتستخدم الإنجاز أو الحاجة دي إنها تكون دافع كبير إنك تحقق حاجات تانية أفضل وأحسن وتسيب الناس هي اللي تشكر وتمدح فيك وفي طريقة تفكيرك وتعاملك وبرضه تشكرهم وتفضل متواضع عشان تقدر تستمر على ده!