بعد تحقيق منتخب مصر للتايكوندو برونزية العالم للبومزا.. إيه هو التايكوندو وأنواعه؟

النهاردة الثلاثاء 2024/12/3 حقق منتخب مصر للتايكوندو إنجاز تاريخي كبير بإنه حصل على المركز التالت في بطولة العالم للبومزا لرياضة التايكوندو المقامة في هونج كونج بمنافسات الجماعي ماستر 2 رجال.. فتعالوا كده نعرف أكتر عن التايكوندو وأنواعه

إيه هو التايكوندو الأول؟

التايكوندو ده فن قتالي كوري وكلمة كورية متكونة من 3 أجزاء أولهم “تاي” ومعناها القدم أو إنك تدوس على حاجة.. وتانيهم “كون” ومعناها يلكم أو يقاتل.. وتالتهم “دو” ومعناها إلى الطريق أو الانضباط

بتستخدم فيه الإيد والرجل عشان تتغلب على الخصم بس المميز فيها هو تشكيلة الحركات اللي بتتعمل وقت الركل أو الضرب

أنواعه:

1- تايكوندو البومزا – Poomsae

خلونا نبدأ بالنوع اللي حققنا فيه إنجاز وهو “البومزا”.. وده بيكون له مسابقات محلية وعالمية وعبارة عن مجموعة من الحركات المتتالية في عدد من الاتجاهات وفيه بتتخيل قتال وهمي كده خلال زمن معين بإيقاع وأداء متناسق من حيث السرعة والهدوء.. الحركات دي بتشمل ضربات أو صدات أو خطوات أو حركات تانية 

وبيتم تقييم اللاعبين من خلال 3 حاجات:

• دقة الحركات
• التوازن والتنسيق 
• القوة والتوقيت

تايكوندو البومزا متقسم 8 أجزاء وبيبدأ من 1 وهو أبسط مستوى وبيعتمد على الحركات الأساسية بس.. وآخرهم الجزء التامن وده أعلى مستوى للبومزا بمعنى لازم اللاعب يكون مقفل اللعبة تقريبًا

2- الكيروجي – Kyorugi

وده بيكون في بطولات رسمية زي الأولمبياد.. بيعتمد على ركل الخصم عشان تسجل نقط والتكنولوجيا ليها دور مهم في الفيديو لأن اللاعب بيلبس واقي صدر إلكتروني بيتحسب من خلاله الضربة ودقتها والنوع ده بيعتمد على الدقة والقوة والضبط

أهم حاجة فيه الرجل لأن هي اللي بتجيب نقط أكبر يعني لو ركلة في الجسم صحيحة بتجيب نقطتين أما لو في الصدر بتجيب 3 نقط ولكن اللكمة بتجيب نقطة واحدة بس

وأهميته:

– تطوير المهارات القتالية

– الثقة بالنفس

– تحسين اللياقة البدنية

3- العروض – Demonstration Performances

بيعتمد على الحركات الاستعراضية وفيه جزء البومزا بس بشكل استعراضي.. وكمان الركلات الطائرة ودي بتتعمل وأنت طاير في الهواء كده بدقة ومرونة.. العرض بالكسر وده بيبقى تحطيم حاجات معينة زي الخشب والحاجات الأسمنتية وغيرها.. وله مسابقات دولية برضه وأهم حاجة فيه بشكل عام “القوة والدقة والجمالية” عشان هو في الآخر يعتبر استعراض مش حاجة قتالية

4- الدفاع عن النفس – Self-defense

وعشان التايكوندو في الأصل عسكرية استخدمها الجيش كوريا الجنوبية باليد أو الرجل عشان يحموا نفسهم من القتال اللي فيه أسلحة بيضاء فده أصبح جزء من التايكوندو ولكنه مش رياضة ليها مسابقات.. هو أسلوب من التايكوندو اللي يعتبر أساس اللعبة نفسها ولكن بيستخدم في الحياة أكتر

ومن تقنياته:

• التفادي 
• الصد
• الإمساك
• الركلات الدفاعية
• الضربات الدقيقة أو الركلات الهجومية

ومن استخداماته:

• الدفاع عن النفس من الهجوم المفاجيء
• الهروب أو التحرر من قبضة حد
• التصدي لهجوم بسلاح أبيض أو عصاية والحاجات المشابهة ليهم

في النهاية التايكوندو مش مجرد رياضة معمولها مسابقات عالمية ومحلية بس لكنه أسلوب حلو تدافع بيه عن نفسك وتحميها وممكن يعمل فرق كبير في حياتك اليومية

قولنا كنت تعرف إيه عن التايكوندو؟