بعد عرض فيلم “البحث عن منفذ لخروج السيد رامبو” في مهرجان فينيسيا.. مجموعة أفلام شارك فيها حيوانات

الفترة اللي فاتت الكلب “رامبو” بقى تريند على مواقع التواصل الإجتماعي بعد عرض فيلم”البحث عن منفذ لخروج السيد رامبو” في مهرجان فينيسيا وابتدا الناس يتكلموا عن قد إيه الكلب جميل وكيوت ضحكته حلوة في الصور.. بس ده مش أول فيلم مصري يشارك فيه حيوانات.. عشان كده في الموضوع ده هنقولك أفلام مصرية تانية شارك فيها حيوانات




1- فيلم “الشموع السوداء”
مانقدرش ننسى الكلب “روي” اللي شارك مع “صالح سليم” و”نجاة الصغيرة” في الفيلم وكان يعتبر بطل من ضمن الأبطال لأنه كان بيرافق البطل اللي مابيشوفش طول الفيلم وبيساعده.. وكمان كان له دور كبير في إنهم يكتشفوا مين اللي عمل الجريمة بسبب حاسة الشم القوية عنده.

2-فيلم”أربعة في مهمة رسمية”
الفيلم بنشوف فيه رحلة “أنور عبد المولى” في مهمته الرسمية لتوصيل 3 حيوانات هما (قرد وحمار ومعزة) وبنشوف كل .المواقف والمفارقات اللي بيمروا بيها طول المهمة عشان يقدر يوصلهم لبيت المال

3- فيلم “القرداتي”
وشارك في البطولة مع الفنان فاروق الفيشاوي القرد “سمسم” واللي كان بيدربه شخصية “فتوح” على السرقة عشان يقدر يجمع أكبر قد من الفلوس ممكن.. والقرد كان بيمثل بذكاء طول الفيلم وكان الناس منبهرين بيه وقتها.




4-فيلم “علي معزة وإبراهيم”
وفي الفيلم ده تألقت المعزة اللي لعبت دور “ندى” واللي كانت دايمًا مع شخصية “علي” اللي بيحبها رغم الانتقادات اللي بيتعرضلها من الناس اللي حواليه.. وبياخد المعزة “ندى” في رحلته طول الفيلم.




5-فيلم”كنغر حبنا”
والفيلم بيشارك فيه كنغرين لأول مرة في الأفلام المصرية.. والفيلم بيحكي عن شاب شغال في شركة شحن وبيتم تبديل تماثيل الكنغر بحيوانين كنغر حقيقينن وبيضطر يتعامل معاهم ويحاول يحافظ عليهم طول الفيلم لحد ما يسلمها لصحابها الحقيقي.



وطبعًا في أفلام تانية مصرية ظهرت فيها حيوانات لكن لمشاهد قليلة أو لمشهد محدد زي فيلم “زكي شان” و”وش إجرام”  اللي ظهر فيهم كلاب صغيرة وأفلام تانية زي “أحلام عمرنا”و”شورت وفانلة وكاب” اللي ظهر فيهم الأحصنة وغيرهم كتير.. بس في الموضوع ده جمعنالكوا الأفلام اللي أبطالها كانوا حيوانات مستمرين طول الفيلم.