بعد ما اتذكر في مسلسل “حسبة عمري” إيه هو حق الكد والسعاية؟
في مسلسل حسبة عمري اللي بيتعرض رمضان 2025 هند ( روجينا ) في يوم اطردت من بيتها و ساعتها هي كانت حاسة إنها تايهة مالهاش مكان تنام فيه.. وعلى الجانب الآخر كان فاروق جوزها ولا على باله.. بيغير في ديكور البيت وعايش كأن ولا حاجة حصلت.
هند راحت لواحدة قريبتهم تحكيلها على اللى حصل وإن كدة مستقبلها ضاع ومش هتعرف تاخد منه أي حاجة.. وفي وسط ما هما كانوا بيتكلموا حد جاب سيرة “الكد والسعاية” والموضوع ده اتكرر كتير في المسلسل.
فا إيه هو حق الكد والسعاية ؟
“حق الكد والسعاية” هو مفهوم في الفقه الإسلامي بيُشير لحق الزوجة في حصولها على جزء من الثروة اللي ساهمت في تنميتها أثناء الزواج، خاصة لو كانت بتشتغل أو بتساعد في كسب المال أو تطوير الممتلكات.
ببساطة هو إن الست اللي بتساعد جوزها في الشغل.. سواء في مشروع.. أرض.. محل أو حتى شغل من البيت، يبقى ليها حق في اللي اتكون من الشغل ده لو حصل طلاق أو وفاة الزوج. يعني مش مجرد بتساعده لأ.. هي شريكة في النجاح والمكسب.. وده لازم يبقى ليها نصيب منه.
الموضوع ده منتشر في المجتمعات الريفية والصعيدية أكتر.. لأن الستات هناك بيشتغلوا مع الرجالة في الزراعة والتجارة.. فالقانون والشرع بيقولوا إنها لو كدت وتعبت معاه يبقى ليها نصيب في اللي بنوه مع بعض، مش بس النفقة أو المؤخر.
إمتى بقى بنطلب حق الكد والسعاية؟
بيتم تطبيق حق الكد والسعاية في حالة:
- الطلاق: إذا انتهى الزواج بالطلاق، يحق للزوجة المطالبة بحصتها من الثروة المكتسبة خلال الزواج.
- وفاة الزوج: يمكن للزوجة المطالبة بحقها في التركة، وليس فقط بناءً على الميراث الشرعي، بل وفقًا للمجهود اللي بذلته.
- إثبات المساهمة:الحق ده مش بيتم منحه تلقائيًا، بل يجب على الزوجة تقديم أدلة واضحة على مشاركتها الفعلية في تكوين الثروة.
وفي النهاية قولنا هل كنت تعرف حاجة عن الكلام ده؟ أو تعرف حد من قرايبك أو معارفك بيطبقه؟
