بعد ما بقى تريند.. إيه هي حكاية “ميدوسا” المرأة اللي شعرها عبارة عن ثعابين وإيه علاقتة بالتحرش!
بعد انتشار تريند “ميدوسا” الجديد على كل مواقع التواصل الاجتماعي اللي هو عبارة عن رسمة لبنت فوق شعرها تعابين كتير، ناس كتير ماكنتش فاهمة إيه الصورة المنتشرة دي ويعني إيه التريند الجديد ده.. ونظرًا لانتشاره حبينا نفهمكوا قصة تريند “ميدوسا”
ميدوسا في الأساس هي أسطورة يونانية وهي ربة الحكمة والثعابين وكانت بتحول كل اللي بيبص في عنيها لحجر، وكانت نموذج للبنت الجميلة اللي وقعت في حب “بوسيدون” إله البحر والعواصف والزلازل والخيول، واديته الثقة الكاملة لكن اعتدى عليها جنسيا بالقوة في معبد أثينا
أسطورة ميدوسا بتقول إنها كانت بنت من البشر لكن كانت حلوة أوي لدرجة إن ماكنش فيه حد بيشوفها إلا ويبقى معجب بيها جدا وبجمالها وبيحاول يقرب منها، بس هي كانت بتحب الربة أثينا جدا وقررت إنها توهب حياتها لأثينا وتترهبن في معبدها، وحصل ده وكانت مخلصه جدا للربة أثينا لدرجة إن أثينا بقيت بتحبها شخصيًا.
وجيه في يوم “بوسيدون” إله البحر والعواصف شافها في معبد أثينا واتفتن بجمال “ميدوسا” وبعدين زي ما قولنا في الأول اغتصبها في معبد أثينا.
لكن لما أثينا عرفت إن “بوسيدون” اعتدى جنسيًا على “ميدوسا” غضبت جدًا لإن “بوسيدون” اغتصب راهبتها في معبدها من غير أي احترام لقدسيتها وقررت تعاقب المذنبين.. ولكن أثينا إله الحكمة والحرب والقهوة قررت بدل ما هتعاقب الجاني هتعاقب المجني عليها ونزلت عليها لعنتها وسحبت منها جمالها وحولتها لأمرأة قبيحة وحولت خصل شعرها لشكل تعابين مؤذية وسامة.
وده اللي حول “ميدوسا” لطاقة شر بتسيطر بلعنتها على كل اللي بيبص في عنيها وبتحوله لحجر، وبسبب ده “ميدوسا” تم نبذها وعاشيت لوحدها في تعاسه أبدية بين الأحجار واتحولت لرمز لكل شخص قدر ينجو من الاعتداء الجنسي.
وبتقول باقي الأسطورة إن بسبب الاعتداء الجنسي ده خلفت “ميدوسا” بنتين عندهم نفس قدرتها وبيحولوا كل حاجة بيبصوا عليها لحجر صامت.. واتقتلت “ميدوسا” في الأخر على ايد “بيرسيوس” اللي واجه الموت أصلا عشان بس يتخلص منها.
واستخدم “بيرسيوس” في خطة قتله لـ “ميدوسا 4 أدوات وهما سيف قوي وحاد عشان تموت من ضربة واحدة قبل ما تبص له ويتحول لحجر، وحذاء “هرمس” اللي يقدر يطير بيه، وخوذة “هادس” اللي بتغمره بالظلام وهو داخل، وشنطة يشيل فيها رأسها عشان ماتأذيش حد بقوة عنيها.
وبالتالي بقيت “ميدوسا” رمز لقوة للناجيات من الاعتداء الجنسي عشان تغير ميدوسا نظرة معاقبة النساء على إنهم بيبقوا ضحية.. وبالتالي بعد انتشار التريند فيه بنات كتير كتبوا على السوشيال ميديا حكاياتهم مع الاعتداءات الجنسية اللي مروا بيها على الصورة دي وولاد كمان كتبوا على نفس التريند وحكوا مأساتهم مع الاعتداءات الجنسية.
