بعد وفاته.. مين هو المنشد “عامر التوني” مؤسس فرقة المولوية المصرية؟
النهاردة 2 فبراير 2025 الصفحة الرسمية لفرقة المولوية المصرية أعلنت وفاة المنشد عامر التوني.. عامر هو مؤسس “المولوية المصرية” سنة 1994.. فتعالوا نتعرف أكتر على عامر التوني وفرقته اللي أسسها
مين هو؟
الفنان عامر التوني منشد وموسيقي مصري اتخرج من كلية التربية قسم لغة عربية وخد دكتوراه في الطرق الصوفية والمولوية.. أسس الفرقة من أكتر من 20 سنة وقدم معاها عروض فنية كتير وكبيرة وحققت نجاحات كبيرة سواء في مصر أو بره مصر
فرقة المولوية المصرية
فرقة المولوية تعتبر من أقدم وأعرق التجارب الفنية اللي بتقدم نوعية الإنشاد الصوفي والأجواء الصوفية بشكل عام على طريقة “المولوية”
والمولوية هي فن فلكلوري نشأ من خلال أحد الطرق الصوفية السنية اللي كان مؤسسها جلال الدين الرومي واللي أسسها من أكتر من 800 سنة ودخلت مصر مع الفتح العثماني وكانت بتتسمى “مسرح الدراويش”
هدفة فرقة المولوية المصرية واللي ممكن نقول كمان إنه هدف المنشد عامر التوني هو تسليط الضوء على التراث المولوي المصري ونشره في العالم كله في دول مختلفة عشان يأكد على خصوصية الثقافة والفنون المصرية وكمان يأكد على هويتها المميزة
حفلات فرقة المولوية
الفرقة شاركت بالعروضة بتاعتها في أكتر من 50 دولة بعروضها واللي منها “تونس والمغرب والجزائر واليابان وسنغافورة وتايلاند والصين ولبنان وسوريا وإسبانيا” وغيرهم من دول كتير كانت شاهدة على حفلات وعروض قدمتها الفرقة
وآخر حفلات الفرقة بقيادة “عامر التوني” قدمتها في معرض الكتاب القاهرة الدولي للكتاب وسط حضور جماهيري كبير واللي عقب وفاته تعتبر “وداع أخير غير متوقع من المنشد الكبير عامر”
أشهر الأعمال الفنية للفرقة
فرقة المولوية المصرية قدمت أعمال فنية كتير مشهورة في مصر والعالم العربي ويمكن العالم كله كمان واللي منها:
- لأجل النبي
- والله ما طلعت شمس ولا غربت
- طلع البدر علينا
- تضيق بنا الدنيا
- يا طارق الباب
- كل شيء في الكون مخلوق يصلي عليه
- لاموني يا رسول الله
- متى يا حبيب القلب
في النهاية الفرقة ليها تأثير كبير في كل مكان وكمان كانت فريدة من نوعها وبتعبر عن التراث والثقافة المصرية بشكلها الخاص وطريقتها الفريدة اللي كان من أكبر أو يمكن السبب الوحيد فيها وهو المنشد الكبير “عامر التوني” واللي رحل عن عالمنا وأكيد هيسيب فراغ كبير في الإنشاد ولكن الأكيد كمان إنه ساب إرث وتراث هيفضل مكمل من بعده وبسببه
