اكتشاف فصيلة دم جديدة ونادرة

حسب موقع NewsWeek الجمعية الدولية لنقل الدم (ISBT) في ميلانو اعترفت رسميًا في بداية شهر يونيو 2025 بفصيلة دم جديدة فائقة الندرة اسمها “غوادا سالب”.. فهنقولك اكتشفوا الفصيلة إزاي وإيه تفاصيلها

• بداية اكتشاف الفصيلة 

الموضوع بدأ في 2011 لما فيه ست بجزيرة جوادالوب احتاجت نقل دم لكن مالقوش ليها متبرع متوافق مع فصيلة دمها.. ولما الباحثين بصوا على حالتها مرة تانية في 2019 وعملولها تحاليل كتير اكتشفوا إن دي فصيلة دم نادرة جدًا وجديدة 

• تفاصيل الفصيلة الجديدة

“تييري بيرارد” عالم الأحياء الطبية في مؤسسة الدم الفرنسية (EFS) والمشارك في الاكتشاف قال إنهم لقوا جسم مضاد وصفه بإنه “غير مألوف تمامًا” في دم المريضة سنة 2011.. وساعتها عمرها كان 54 سنة وعشان الموارد كانت محدودة أوي ساعتها وقفوا بحثهم عن فصيلة دمها واتقفل الموضوع.. لكن في سنة 2019 بفضل “تسلسل عالي الدقة للحمض النووي” ودي العملية اللي بنفهم منها المعلومات الوراثية اللي كل كائن حي بيحملها وبتحدد الجينات المسؤولة عن الاضطرابات الوراثية والصفات المختلفة.. قدروا إنهم يكشفوا عن الفصيلة الجديدة اللي وصفوها بإنها “طفرة جينية”.. وقال الدكتور “بيرارد” إن الست ورثت فصيلة الدم من والديها اللي برضه بيحملوا الطفرة الجينية دي وفي بداية شهر يونيو 2025 الجمعية الدولية لنقل الدم (ISBT) في ميلانو اعترفت رسميًا بالفصيلة دي

• ليه الاكتشاف ده مهم؟

مؤسسة الدم الفرنسية قالت إن إحنا نفهم فصائل الدم دي حاجة مهمة عشان نضمن عمليات نقل الدم وزراعة الأعضاء بأمان وفاعلية ويقدروا كمان يحددوا بعض المخاطر الصحية.. ده غير إنه هيساعد الخدمات الطبية إنهم يحددوا مدى التوافق أو عدمه بين المتبرعين والمتلقين 

في الآخر اكتشاف الفصيلة دي مش بس بيخلينا نوسع فهمنا البيولوجي لكن كمان هيوسع فهمنا لطب نقل الدم بشكل آمن وبدقة أكتر وده هيخلي كل مريض قادر يتعالج