بلاي ليست بأكتر مسلسلات عربي هتسليك في الشتاء
من مميزات الصيف القليلة إنه بيخليك مش طايق تقعد في البيت وطول الوقت بتظبط خروجات وعندك طاقة حتى لو أماكن مكيفة، بس مع دخول فصل الشتاء الجميل بتلاقي طاقة الفرهدة دي بتختفي والسرير بيسحبك وتقعد تحت البطانية أو اللحاف وبيبقى هو ده المكان المثالي بالنسبة لك.
وبالتالي وأنت قاعد في السرير بتبقى عايز تسلي نفسك عشان الوقت ده يعدي في هدوء وسلام وبتقعد تتفرج على مسلسلات وأفلام.. وأكيد مرة في قعدات الشتاء الدافية دي خطر على بالك أو هف عليك مرة واحدة إنك عايز تتفرج على مسلسل عربي قديم وتسحل نفسك فيه شوية وترجع بالزمن، وبمناسبة دخول فصل الشتاء وقعدات تحت البطانية عملنالك بلاي ليست بمسلسلات عربي قديمة تسلي نفسك بيها وتحس بنوستالجيا معاها في نفس الوقت:
1- لن أعيش في جلباب أبي
المسلسل من بطولة “نور الشريف، وعبلة كامل، ومحمد رياض، ومصطفى متولي، وحنان ترك، وناهد رشدي، ووفاء صادق، ومنال سلامة، ورشوان توفيق، وياسر جلال، وإيناس مكي”
وتم إنتاج المسلسل سنة 1995 وأخرجه أحمد توفيق وفي الأساس المسلسل مقتبس من رواية الكاتب الكبير إحسان عبد القدوس،أما كاتب السيناريو والحوار هو مصطفى محرم.
2- رأفت الهجان
موسيقى عمار الشريعي لتتر المسلسل قادرة ترجعك بالزمن سنين وسنين، المسلسل 3 أجزاء قدر فيهم محمود عبد العزيز يجسد قصة حياة الجاسوس المصري “رفعت الجمال”، والمسلسل عبارة عن ملحمة وطنية درامية بتوضح مهارة المخابرات المصرية.
المسلسل من بطولة “محمود عبد العزيز، ويسرا، ويوسف شعبان، وتيسير فهمي، ومحمد وفيق، ومصطفى متولي، وصبري عبدالمنعم” ومن إخراج يحيى العلمي وإعداد وسيناريو وحوار صالح مرسي وتم إنتاج أولى جزء فيه سنة 1987.
3- الشهد والدموع
واحد من أشهر مسلسلات التلفزيون المصري على الإطلاق، وهو التعاون الأول بين الكاتب أسامة أنور عكاشة والمخرج إسماعيل عبد الحافظ والموسيقار عمار الشريعي.
بتدور أحداث المسلسل في إطار اجتماعي عن الظلم والقهر بين الأخوات وبتبدأ القصة لما أخين اللي هما “حافظ” و”شوقي”، شوقي هو الأخ الطيب المعطاء أما حافظ هو الأخ الطماع، وبيستولى “حافظ” على كل فلوس أخوه ومابيقدرش “شوقي” يستحمل الخسارة فيموت وبيسيب ولاده الأربعة ومراته وهما فقرا، وبتبدأ لتبدأ مراته إنها تكسب فلوس وتربي الأولاد وبيكبر الأولاد بعد كده وبيطالبوا حقهم من عمهم.
المسلسل من بطولة “يوسف شعبان، وعفاف شعيب، ومحمود الجندي، ونوال أبو الفتوح، ورجاء حسين، ونبيل الدسوقي، ومحمد متولي، وصبري عبدالمنعم، و جليلة محمود” وتم عرضه على التلفزيون المصري سنة 1983 والجزء التاني اتعرض سنة 1985.
4- ليالي الحلمية
المسلسل من 5 أجزاء وتم إنتاج أول جزء منه سنة 1987، وهو من بطولة “يحيى الفخراني، وصفية العمري، وصلاح السعدني، وفردوس عبد الحميد، وسهير المرشدي، وحسن يوسف، وهدى سلطان، وأحمد مظهر، ودلال عبد العزيز، وعبد العزيز مخيون، وسيد عبد الكريم، ويسري مصطفى” ومن إخراج إسماعيل عبد الحافظ وتأليف أسامة أنور عكاشة.
وحاولوا المنتجين يعملوا جزء سادس منه من تأليف أيمن بهجت قمر وعمرو محمود ياسين لكن واجه مشاكل كتير كان من أصعبها موت الفنان ممدوح عبد العليم وهو من أهم الشخصيات وتم انتقاده.
5- من الذي لا يحب فاطمة
المسلسل بتدور أحداثه عن شخص اسمه “صبري” عايش في مصر بيواجه بعض المشاكل زي إن أهل حبيبته رافضين جوازه منها وزي إنه فقد وظيفته، فبيقرر يسافر لقرية في النمسا عشان يدور على فرصة شغل جديدة وحياة جديدة، وهناك بيعيش عند مجموعة من المصريين المهاجرين وبيتعرف على “مارجريت” اللي بتعتنق الإسلام وبيتجوزها، وفجأة بتظهر حبيبته السابقة.. وبنشوف وقتها صبري هيعمل إيه؟
المسلسل إنتاج سنة 1996، وبطولة “أحمد عبد العزيز وجيهان نصر وشيرين سيف النصر وكريمة مختار وماجدة زكي”، وكمان ظهر فيه “أحمد السقا ومحمد سعد وعلاء مرسي وعبير صبري”،وسيناريو وحوار رؤوف حلمي وعن قصة “أنيس منصور” وإخراج أحمد صقر.
6- المال والبنون
المسلسل بيتكون من جزئين، أول جزء اتعرض سنة 1993 والجزء التاني سنة 1995 ويعتبر من أهم مسلسلات فترة التسعينات وحصل على جايزة إدارة الإذاعة والتلفزيون المصرية سنة 1998.
أول جزء أحداثه بتدور عن يوسف (ابن عباس) اللي عايز يتجوز فريال (بنت سلامة) لكن عيلتهم الاتنين رافضين الجوازة دي رغم إن عباس وسلامة أصلاً صحاب، وبعدها يوسف بيكتشف إن والده عباس وسلامة كانوا شغالين مع بعض عند خواجة كان بيجمع ثروته من تهريب الآثار خارج مصر، ومن هنا بتبدأ الأحداث وبنشوف إيه هيحصل!
المسلسل من بطولة “عبدالله غيث ويوسف شعبان وأحمد عبد العزيز وفايزة كمال وشريف منير وعايدة رياض”، ومن تأليف محمد جلال عبد القوي واخراج مجدي أبو عميرة.
7- الضوء الشارد
قصة المسلسل بتدور عن الصراع الطبقي بين طبقة الإقطاعيين اللي بتمثلها عيلة “العزايزة” وطبقة الملاك الجدد اللي بتمثلها عيلة “السوالم” وبنشوف وسط الأحداث صراع العلاقات الشخصية وعلاقات الحب، وكمان منافسة بين العيلتين على كرسي مجلس الشعب اللي كان دايماً حكر على العزايزة.
المسلسل اتعرض سنة 1998 من بطولة “ممدوح عبد العليم ومنى ذكي ومحمد رياض وسميحة أيوب ويوسف شعبان ورانيا فريد شوقي” ومن تأليف محمد صفاء عامر وإخراج مجدي أبو عميرة.
8- ذئاب الجبل
القصة بتحصل في بلدة اسمها “بهتون الجبل” اللي بتعيش فيها عيلة هوارة اللي متمسكة ببعض العادات والتقاليد المتعصبة، ورغم التعصب اللي عندهم شخص اسمه “الشيخ بدار” كسر العادات دي وسمح لبنته تتجوز واحد غريب عن العيلة، فأخوها بيقف قصاده وبيقرر ينتقم.. وبنشوف في الأحداث هل هينتقم ولا قصة الحب هتعيش؟
المسلسل اتعرض سنة 1993 ومن بطولة “عبدالله غيث وسماح أنور وأحمد عبد العزيز وشريف منير ووائل أنور” ومن تأليف محمد صفاء عامر واخراج مجدي أبو عميرة.
9- اللص الذي أحبه
المسلسل ده ميكس كوميدي على رومانسي بيحكي عن بنت متدلعة اسمها “رشا” جدها بيزهق من تصرفاتها فبيقرر يتفق مع شاب شغال مهندس إنهم يحاولوا يغيروا تصرفاتها وسلوكها، فالشاب ده بيعرف نفسه لرشا كأنه حرامي، ورغم ده رشا بتقع في حبه، وبنشوف في أحداث كوميدية هل هيتغير فعلاً سلوك رشا ولا لأ؟
المسلسل من بطولة “شيرين سيف النصر وشريف منير وحسن حسني ورجاء الجداوي وهاني رمزي”، واتعرض سنة 1997 من تآليف رؤوف حلمي واخراج أحمد صقر.
10- عائلة الأستاذ شلش
المسلسل من نوعية المواقف الكوميدية العائلية اللي بتحصل في الحياة اليومية للأستاذ “شلش” وبنشوف في المواقف دي علاقته بمراته وولاده وكمان علاقتهم بالجيران وزمايله في الشغل.
المسلسل من بطولة صلاح ذو الفقار وليلى طاهر ومحمود الجندي وأحمد سلامة واتعرض سنة 1990 ومن تأليف محمد نبيه وأحمد عوض واخراج محمد نبيه.
11- البخيل وأنا
المسلسل من اسمه بيتكلم عن شخص اسمه “عوض” بخيل جداً بيجمع فلوس لكنه بيمنعها عن أهل بيته، وده اللي بيخلي ولاده يشتغلوا عشان يبقى معاهم فلوس ومايحتاجوش أبوهم البخيل، فبنته بتتجوز راجل قد أبوها بس غني، واخواتها الباقيين بيحاولوا يحققوا أحلامهم بعيد عن أبوهم ومن هنا بنشوف الأحداث بتمشي إزاي!
المسلسل من إخراج حسين عمارة عن قصة فريد شوقي وسيناريو وحوار حسين عمارة، ومن بطولة فريد شوقي وكريمة مختار وحسن مصطفى واتعرض سنة 1990.
12- حديث الصباح والمساء
المسلسل ده من أشهر المسلسلات اللي اتعرضت في الأليفينات، وأحداثه بتتكلم عن تاريخ مصر الاجتماعي والسياسي من خلال 3 شخصيات كل شخصية عندها عيلة، وبنشوف في المسلسل صراعاتهم وأدوارهم الاجتماعية وكمان علاقاتهم الإنسانية والعاطفية ومواقفهم تجاه حاجات كتير زي الحياة والوطن والحب مع اختلاف نظرة كل شخصية لكل حاجة فيهم.
المسلسل من بطولة “ليلى علوى ودلال عبد العزيز وأحمد خليل وعبلة كامل” وكمان ظهر في المسلسل أحمد زاهر ومنة شلبي، سيناريو وحوار محسن زايد عن قصة نجيب محفوظ، ومن إخراج أحمد صقر واتعرض في 2001.
13- عائلة الحاج متولي
المسلسل ده أظن كلنا سواء كبار أو صغيرين فاكرينه وشوفناه أو سمعنا عنه على الأقل، بس من المسلسلات اللي ممكن تشوفها تاني وتالت، بيحكي عن الحاج متولي اللي بدأ حياته من الصفر وشغال عن تاجر أقمشة، ولما التاجر مات الحاج متولي اتجوز أرملة التاجر، وبيدير الثروة كلها، لحد ما يبقى من أكبر تجار القماش في السوق، وبعدها بيتجوز واحدة ورا واحدة، وبنشوف العلاقة بين مراتاته والمواقف اللي بتحصل بينهم في أحداث عائلية وكوميدية وكمان رومانسية.
المسلسل من بطولة “نور الشريف وماجدة زكي وفادية عبد الغني وغادة عبد الرازق وسمية الخشاب ومصطفى شعبان ورانيا يوسف”، واتعرض سنة 2001 من تأليف مصطفى محرم وإخراج محمد النقلي.
14- الراية البيضا
المسلسل مستمد أحداثه من قصة حقيقية وبيحكي عن تاجرة غنية اسمها “فضة” بتدخل في صراع مع سفير متقاعد اسمه “مفيد”، وفضة بتحاول بكل الطرق إنها تاخد القصر الأثري اللي مفيد بيملكه وعايش فيه بعد تقاعده، ومن هنا بيبدأ الصراع وبنشوف مين فيهم هينتصر في النهاية!
المسلسل اتعرض سنة 1988 من تأليف أسامة أنور عكاشة وإخراج محمد فاضل ومن بطولة “سناء جميل وجميل راتب وسمية الألفي وهشام سليم”.
15- بكيزة وزغلول
من أفضل المسلسلات الكوميدي المصرية القديمة والمسلسل جمع مواقف مضحكة كتير بين “بكيزة هانم الدرملي” سيدة المجتمع الغنية الأنيقة و”زغلول الفتاة الفقيرة” اللي راحت لبكيزة هانم عشان تطالب بحقها في ميراث أبوها.
المسلسل حقق شعبية جماهيرية كبيرة خلال السنين الأخيرة اللي فاتت بالذات والمسلسل من بطولة من “سهير البابلي، وإسعاد يونس، وصلاح قابيل، ومصطفى متولي، وحسن مصطفى، وشريف منير” ومن تأليف إسعاد يونس، وإخراج أحمد بدر الدين وتم إنتاجه سنة 1986.
16- أبنائي الأعزاء شكرا
مسلسل من أهم كلاسيكيات المسلسلات المصرية جمع بين نجوم كتير في بدايتهم وهما “عبد المنعم مدبولي، ويحيى الفخراني، وفاروق الفيشاوي، وصلاح السعدني، وآثار الحكيم، وفردوس عبد الحميد”.
المسلسل بيحكي قصة بابا عبده الموظف البسيط اللي ضيع عمره في تربية ولاده لكن بيواجه مشاكل كتير معاهم بعد ما كبره ولما بيبدأ يتفرغ ويطلع معاش، المسلسل تم إنتاجة سنة 1979 ومن إخراج محمد فاضل وتأليف عبد الله فرغلي وسيناريو عصام الجمبلاطي.
17- هوانم جاردن سيتي
المسلسل من جزئين ورغم انه اتعرض سنة 1997 إلا إن قصته بتدور من فترة الحكم الملكي لحد أحداث 1952 في شكل درامي بين شخصيات المسلسل بنشوف فيهم وفي علاقاتهم الاجتماعية والعاطفية التغيرات اللي حصلت في المجتمع في الفترة دي.
المسلسل من إخراج أحمد صقر وتأليف منى نور الدين ومن بطولة “صفية العمري وحسين فهمي وعبلة كامل وهشام سليم وصابرين”.
