بلاي ليست رايقة بأفلام الـ sweet november المصرية
بما إننا دخلنا في نوفمبر شهر الحب والسعادة والجمال والدلال عملنالكوا بلاي ليست رايقة لأفلام مصرية Romantic comedy تروق عليكوا تتفرجوا عليها تظبط المود!
1-في شقة مصر الجديدة
لو بتحب الرسايل وأفلام البحث يبقى الفيلم ده ليك عشان هتتبسط بكل تفصيلة فيه وأنت بتدور مع “نجوى” على “أبلة تهاني” وبتلف معاها طول رحلتها بحماس.
2-أحلى الأوقات:
لو بتحب بقى أفلام الغموض يبقى هتتسحل مع الفيلم وتسأل نفسك ياترى “سلمى” هتعرف تلاقي اللي بيعتلها الجوابات؟ ولا لما هتعيد نظر في الماضي ده هيوديها في أماكن تانية خالص!
3-حب البنات
لو عايز تتفرج على فيلم رايق يفصلك يبقى تتفرج على حب البنات أي يوم وإنت راجع مسحول من الشغل يروق عليك ويحسسك بأجواء السويت نوفمبر.
4-إذاعة حب:
لو نفسك تحب وتتشاف زي ما إنت من غير ماتبهر حد يبقى الفيلم ده عشانك وهتتعلم منه تبقى إنت وبس.
5-بيبو وبشير:
هتعمل إيه لو أجرت شقة وطلع حد مأجرها معاك في نفس الوقت وبقيتوا زي القط والفار؟ وهل ممكن الـعلاقة تقلب حب في الأخر ولا هتفضلوا أعداء!
6- الباشا تلميذ:
هتعيش في الفيلم ده أجواء ضحك وكوميديا مع الظابط “بسيوني” والشلة بتاعة الجامعة اللي بيحاول يبقى صاحبهم من غير مايكشفوه.
7-365يوم سعادة:
لو أنت بتكدب أو تعرف حد بيكدب يبقى لازم تشوف الفيلم ده عشان تعرف الكدب أخرته إيه!
8-شورت وفانلة وكاب:
طبعًا الفيلم غني عن التعريف والحصان الأيقوني بتاع أحمد السقا لا يمكن ننساه.
9-أفريكانو:
لو بتحب الطبيعة والحيوانات هتتبسط بالفيلم ده أوي وهتحس إنك خدت لفة كدة مع إنك قاعد في البيت عادي!
10- رشة جريئة:
لو نفسك تاخد شوية بوزيتيف إنرجي وتشوف حلمك بيتحقق بعد كل الحاجات اللي مريت بيها يبقى الفيلم ده عشانك
11- سحر العيون
هو لازم تعرف الشخص الغلط عشان بعد كدة تدخل العلاقة الصح؟
اهو ده بالظبط اللي الفيلم هيجاوبك عليه.
12-أحلام عمرنا:
لو بتأمن بالصدف وإنها ممكن تغير كل حاجة في لحظة فهتحب الفيلم ده أوي.
13-ماتيجي نرقص
الفيلم متاخد عن الفيلم الأجنبي”shall we dance” فلو بتحب الـ remake هيبقى مناسب ليك جدا.
14-طير إنت:
طيب ونحكيلك ليه عن الفيلم
ماتيجي نشوف؟
15- فوتو كوبي:
الفيلم موده رايق وهيحسسك إن لسه في أمل وإن الوقت مافاتش عشان تعمل الحاجات اللي نفسك فيها.
