بلاي ليست لأفلام مصري وأجنبي نهايتهـا مـــــش زي مــــا توقعتهــــا

لو مش حابب تخرج في الويك إند وبتحب البلوت تويستات والأحداث غير المتوقعة.. دي بلاي ليست لشوية أفلام نهايتها مش زي ما توقعتها 

• أسوار القمر

بتفوق “زينة” بعد ما أُغمى عليها تلاقي نفسها فاقدة بصرها ومش فاكرة حاجة وعلى مركب جوزها ومفهمها إنه بيحميها من رشيد الباد بوي وخلى حياتها وحشة.. وتبدأ واحدة واحدة تفتكر اللي حصل وساعتها هتلاقي كل حاجة عكس ما الأحداث وديتك 

• 45 يوم

بيدخل شاب مستشفى الأمراض العقلية بعد ما أبوه وأمه اتقتلوا ورفض بعدها يتكلم خالص.. وخلال المدة اللي بيقضيها في المستشفى عشان يقيموا حالته بيبدأوا يعرفوا قصص علاقته مع أهله تخليها دوافع عشان يقتلهم بس بعدها هتعرف إن مش كل حاجة تشوفها بعنيك تصدقها 

• أسف على الإزعاج

بيحكي عن مهندس شاطر بيعيش صدمة بعد وفاة أبوه فبيفضل يتخيل والده طول الوقت في مواقف مختلفة ويتكلم معاه كمان.. ويعيش قصة حب مع بنت ويبقى عايز يكمل معاها بس مش هيحصل وده عشان حاجات هتكتشفها مع الأحداث هتغير مجرى الفيلم كله 

• فاصل ونعود

سواق تاكسي “عربي” عنده ابن ومراته ميتة وبينه وبين حماه خناقات عشان عايز ياخد حضانته.. و”عربي” خد حكم من المحكمة بحضانة ابنه بس بتحصله حادثة وابنه يتخطف.. ولما بيفوق بيلاقي نفسه فاقد الذاكرة وكل حاجة يفتكرها بينساها في ساعتها.. فيحاول يدور على ابنه وصاحبه بيساعده طول الوقت عشان يرجع ابنه من اللي خطفوه.. بس الأحداث هتكشف حاجات كتير تصدمك 

• ملاكي إسكندرية

بيبدأ بمحامي بتجيله واحدة عايزاه يكون محاميها ويدافع عنها بعد اتهامها بقتل جوزها.. والمحامي الوحيد اللي بيصدقها ومشاعره تتحرك ناحيتها.. ويدخل في رحلة طويلة عشان يدور على القاتل ويبرأها ويشك في كل الناس وفعلًا يخرجها براءة ويتجوزها.. بس تفصيلة بسيطة هتغير تفكيره وكمان تفكيرك 

• Arrival

الجيش الأمريكي بيستدعي أستاذة لغة لما حصل هجوم من كائنات فضائية.. وخلال الأحداث تبدأ كمشاهد تشوف البطلة “لويز” عندها ذكريات صعبة مع بنتها الصغيرة اللي ماتت بالسرطان في مراهقتها وبعد كده ترجع تاني عشان تتواصل مع الفضائيين.. والأحداث هتسحلك لحد ما يحصل حاجة هتفاجئك

• Fight Club

راجل بيعاني من الأرق وقرفان من وظيفته المملة وحياته الروتينية بيقابل حد شبهه وبيقرروا سوا يعملوا مكان سري يتقابل فيه كل راجل محبط ويطلعوا طاقتهم فيه.. وبعدها بيكبر المكان ويعملوا عمليات ضد الشركات الكبيرة والأحداث تفضل واخداك لحد ما تتصدم في الآخر بالنهاية

• Goodnight Mommy

توأمين عايشين مع مامتهم بيلاقوها راجعة البيت وهي لافة وشها بشاش بعد عملية تجميل عملتها بسبب حادثة صعبة.. ومع الأيام بتعاملهم بقسوة فبدأ التوأمين يشكوا إن أمهم اللي تحت الشاش دي مش حقيقية.. وانت كمان هتصدق ده لحد ما النهاية تشكك انت في نفسك

• Gone Girl

يبدأ الفيلم بحفلة عملها زوج لمراته بمناسبة عيد جوازهم الخامس لكن مراته بتختفي في اليوم ده والقصة بتوصل للصحافة والإعلام وده عشان شهرتها.. والناس كلها بتشك في جوزها إنه هو اللي قتلها خاصة بعد ظهور أدلة كتيرة بتدينه.. هتحس إن الدنيا مافيهاش أمان بس هتتأكد لما تشوف النهاية اللي مكنتش على بالك

• Memento 

بيحكي عن محقق اتعرض هو ومراته لحادثة  أُغتصبت فيها وماتت.. أما هو حصله فقدان ذاكرة قصير الأمد فبقى صعب عليه يفتكر ورغم كده قرر يدور على اللي موت مراته وينتقم منه بس في الآخر هتتصدم من البلوت تويستاية