بمناسبة رجوع المدارس  تتصرف إزاي لو عرفت إن ابنك/بنتك بيتعرضوا للتنمر

مع موسم عودة الدراسة بتبتدي مشاكل الأولاد النفسية تكتر  وخاصة لو لسه داخلين المدرسة جديد أو في مرحلة انتقالية مهمة في حياتهم زي فترة ثانوية عامة وده بيحصل بسبب أسباب كتير من ضمنها التنمر.

ووفقًا لدراسة أمريكية اتنشرت في موقع dosomething  بتقول إن 1 من كل 5 طلاب تتراوح أعمارهم بين 12 و18 سنة بيتعرضوا للتنمر كل سنة خلال موسم الدراسة وكمان في حوالي 160 ألف طالب بيسيبوا المدارس بسبب التنمر.

فتعالى هنقولك في الموضوع ده تتصرف/تتصرفي إزاي لو عرفت إن حد من أولادك بيعاني من التنمر  وفقا لمواقع anti-bullyingalliance و understood و unicef.

1- نسأل عن حالتهم النفسية دايما:

-لازم نسأل أولادنا دايما عن يومهم في المدرسة أو الجامعة ونعرف إذا كانوا مرتاحين ولا في حد بيضايقهم وإذا كانوا من النوع الكتوم أو اللي مبيتكلمش كتير ممكن نسألهم بطريقة غير مباشرة عن رأيهم في الناس والمكان وساعتها هما ممكن يكملوا لوحدهم.

2- ندعمهم دايما:

لما ولادنا يحكولنا إنهم تعرضوا للتنمر لازم نسمعهم كويس وندعمهم و ننقل حبنا ليهم ونهتم بيهم أكتر لأنهم هيكونوا محتاجينا أكتر من أى وقت وكمان لازم نبقى عارفين إنهم طالما شاركوا معانا حاجة كبيرة زي دي يبقى لازم نحافظ على ثقتهم فينا ونطمنهم ونتعامل بعقل فى حل مشاكلهم من غير ما نقول كلام يضايقهم أكتر.

3- نعرفهم إن التنمر مش غلطتهم:

لازم نعلم ولادنا إنهم يحبوا نفسهم  وإن في ناس مؤذية في العالم حواليهم وده مش معناه خالص إنهم السبب أو إن عندهم مشكلة بالعكس لازم يعرفوا إن الشخص اللي بيتنمر هو اللي عنده مشكلة لازم يعالجها.

4- نتكلم مع المدرسة أو أهل الطفل:

مهم أوي إنك بعد ما تعرف القصة من ابنك أو بنتك تتكلم مع المدرسة أو أهل الطفل عن اللي حصل علشان تتأكد إن اللي حصل ده مايتكررش تاني.

5- ماتشجعهمش على العنف:

لازم نعلم أطفالنا ياخدوا حقهم بطريقة صح بإنهم  يتجنبوا الشخص المتنمر ويشتكوه لحد مسئول ومانقولهمش أبدا ينتقموا أو يتعاملوا معاه بالمثل لأننا كده هنكون بنعالج مشكلة بمشكلة أكبر.

6- المشاركة في أنشطة جديدة:

لازم تشجع طفلك إنه يعمل أنشطة جديدة بيحبها علشان يتعرف على ناس جديدة ويقوي ثقته بنفسه ومايتعقدش .

7- زيارة معالج نفسي:

لو لاحظت إن التنمر أثر على طفلك بشكل سلبي ومابقاش يحب يخرج ولا يتعامل مع حد يبقى لازم تزوروا متخصص يساعدوا يتخطى الأزمة دي

وفي النهاية حابين نقولك إن أنت لازم تبقى الـ Support System  الأساسي بتاع ولادك والمصدر الرئيسي إنهم يحبوا نفسهم ومايسمعوش كلام المتنمرين ويتأثروا بيه فأوعى أنت كمان تخذلهم.