بمناسبة يومه.. ليه الكاكاو مميز وإيه استخداماته وفوايده لكل الناس اللي بتحبه؟
لو بتحب تشرب كوباية Hot Chocolate في الشتاء.. أو كوباية Iced Chocolate في الصيف.. أو بتحب الشوكولاتات أو أي حلويات فيها شيكولاتة.. فالعنصر المشترك في كل ده هو الكاكاو.
الكاكاو مش مجرد مكون عادي، ده يعتبر سر من أسرار السعادة اللي ناس كتير بتحبه حتى لو مش بشكله الخام.. ويعتبر مكون مميز جدا عشان بيتم استخدامه في حاجات كتير وفيه فوايد صحية مختلفة وهنقولكوا كمان على وصفات سهلة ممكن تستخدمه فيها.
الكاكاو بيتعمل منه إيه؟
الكاكاو ليه استخدامات كتير ومتنوع.. سواء في الأكل أو حاجات تانية.
- صناعة الشوكولاتة: الاستخدام الأشهر للكاكاو هو تحويله لشوكولاتة بكل أنواعها، سواء الدارك أو بالحليب أو البيضاء.
- المشروبات: الكاكاو بيستخدم لتحضير المشروبات السخنة زي الـ Hot Chocolate في الشتاء أو حتى مشروبات باردة زي الميلك شيك بالشوكولاتة.
- المخبوزات والحلويات: الكاكاو يعتبر مكون أساسي في الكيك والبسكويت والمافن والبراونيز.. وبيتضاف كمان للآيس كريم أو الموس أو التشيز كيك عشان يديهم طعم حلو.
- منتجات التجميل والعناية بالبشرة: الكاكاو بيستخدم في ماسكات طبيعية للبشرة والشعر لأنه فيه مضادات أكسدة ومرطبات.. وزبدة الكاكاو مستخلص طبيعي بيدخل في صناعة الكريمات والمرطبات لعلاج جفاف البشرة والشفايف.
- منتجات الدايت والصحة: الكاكاو الخام أو الشوكولاتة الدارك بتستخدم في أنظمة الدايت الصحية بسبب قلة السكر وإن فيهم دهون صحية.
طب إيه فوايد الكاكاو الصحية؟
حسب موقع Healthline.. الكاكاو مليان مركبات اسمها “البوليفينول” ودي ليها فوايد كبيرة للصحة زي تقليل الالتهابات وتحسين مستوى الكوليسترول.. بس للأسف معالجة الكاكاو وتحويله لشوكولاتة أو منتجات تانية بتقلل من محتوى البوليفينول بشكل كبير.
الدراسات كمان بتأكد إن الكاكاو بيقلل ضغط الدم عن طريق تحسين مستويات “أكسيد النيتريك” ووظيفة الأوعية الدموية.
الكاكاو كمان بيحسن تدفق الدم وبيقلل الكوليسترول وممكن يقلل خطر الإصابة بالأزمات القلبية أو فشل القلب أو السكتة الدماغية.
ومادة “الفلافانول” اللي موجودة في الكاكاو بتدعم إنتاج الخلايا العصبية وبتحسن تدفق الدم وتوصيله لأنسجة المخ.. وممكن كمان تلعب دور في الوقاية من تدهور المخ المرتبط بالعمر زي مرض الزهايمر.. بس لسه محتاجين أبحاث أكتر لتأكيد المعلومة دي.
والكاكاو ممكن يكون ليه تأثير إيجابي على المزاج وأعراض الاكتئاب عن طريق تقليل التوتر وزيادة الإحساس بالهدوء والرضا والسعادة بشكل عام.
والكاكاو الخام والشوكولاتة الدارك ممكن يقللوا خطر الإصابة بمرض السكري ويساعدوا في الحفاظ على مستويات سكر طبيعية في الدم.. بس فيه نتائج متضاربة في الأدلة العلمية وده بيخلي النقطة دي محتاجة أبحاث أكتر.
منتجات الكاكاو ممكن تبقى مرتبطة بانخفاض الوزن وإضافة الكاكاو للنظام الغذائي ممكن يساعد في فقدان الوزن بسرعة أكتر.. لكن ده بيعتمد على النوع والكمية المثالية من الكاكاو اللي ممكن تحقق ده.
مادة “الفلافانول” في الكاكاو ليها خصائص مضادة للسرطان في الدراسات اللي اتعملت على الحيوانات.. بس الأدلة من الدراسات على البشر لسه ناقصة.
وبشكل عام الكمية اللي الخبراء بينصحوا بيها في اليوم هي 2.5 جرام من بودرة الكاكاو اللي فيها مادة “الفلافانول” أو 10 جرام من الشوكولاتة اللي فيها مادة “الفلافانول” عالي.. ولو بتحب الشوكولاتة الدارك ممكن تختار النوع اللي فيه على الأقل 70% كاكاو أو أكتر.
وبنقدملك بقا شوية وصفات سريعة تقدر تعملها بالكاكاو:
- طبعا أسهل حاجة وأكتر وصفة بديهية هي الكاكاو السخن أو البارد: كل اللي بتعمله إنك بتخلط معلقة كاكاو كبيرة مع كوباية لبن.. ويا بتحطهم على النار.. يا بتحط عليهم ثلج.. وممكن تزود سكر أو عسل حسب الكمية اللي إنت عايزها
- موس شوكولاتة: هتحتاج معلقتين كبار كاكاو خام – كوباية كريمة خفق – معلقة كبيرة سكر بودرة.. وهتخلط كريمة الخفق مع السكر والكاكاو بالمضرب الكهربائي لحد ما القوام يبقى كريمي.. وبعد كده حطه في أكواب صغيرة في التلاجة لمدة نص ساعة
- بودينج كاكاو سريع: هتحتاج كوبايتين لبن – معلقتين كبار كاكاو خام – معلقتين كبار نشا – 3 معالق سكر.. وهتخلط الكاكاو والنشا والسكر في حلة صغيرة.. وهتزود عليهم اللبن تدريجيًا مع التقليب على نار متوسطة لحد ما الخليط يثقل.. وبعد كده هتصب البودينج في كاسات وتسيبه يبرد
- بار الشوفان بالكاكاو: هتحتاج كوباية شوفان – معلقتين كبار كاكاو خام – 3 معالق عسل – معلقتين كبار زبدة فول سوداني.. هتخلط كل المكونات مع بعض لحد ما تبقى عجينة متماسكة.. وهتفردها في صينية صغيرة.. وبعدين حطها في الفريزر لمدة 15 دقيقة.. وقطعها بعد كده لمربعات
- كاكاو بالموكا.. هتحتاج معلقة صعيرة كاكاو خام – كوباية قهوة باردة – نصف كوباية لبن – معلقة صغيرة سكر أو عسل.. هتخلط الكاكاو مع القهوة والسكر.. وهتزود عليهم اللبن وتقلبهم كويس.. وبعد كده ممكن تحط عليهم تلج
