بمناسبة يوم السموزي.. بنقدملك 7 وصفات هتروق عليك في الصيف
بمناسبة الأجواء اللي إحنا فيها والصيف اللي داخل علينا فـ إنت دايمًا محتاج تشرب سوائل كتير حاجة فريش كده تخليك مصحصح كده وماتحسش بالحر الفظيع والسئل دي ممكن تكون ماية أو عصير أو سموزي بنوع الفاكهة المفضلة ليك.. عشان كده بنقدملك تشكيلة لـ 7 وصفات لعصير سموزي تهون عليك حر الصيف..
سموزي برتقال بالخوخ: وده عبارة عن عصير برتقال فريش مع قطع خوخ متقشرة وزبادي خوخ مع سكر حسب الرغبة ومكعبات الثلج ونضربهم في الخلاط
سموزي توت بالزبادي: وهنا بيكون البطل التوت البري مع زبادي ولبن لحد وقطع ثلج مايطلع القوام المظبوط
سموزي مانجو بالفراولة: عشان يطلع مظبوط هات مانجو مجمدة وفراولة مجمدة شوية لبن وبالهنا ودوق العظمة
سموزي كوكيز مع شوكلاتة: وده لمحبين الشوكلاتة هيعجبكم أوي لو جربتوه.. والمكونات هنا أيس كريم فانيليا ولبن وقطع كوكيز وقطع شوكلاتة مع الثلج وبالهنا والشفا
سموزي البطيخ بالنعناع: ده لعشاق الروقان هات شوية عصير بطيخ وعليهم ورق نعناع فريش ومكعبات ثلج واضرب في الخلاط واستمتع
سموزي مانجو: وده حلاوته إنك هتستمتع بطعم المانجو وعبارة عن قطع مانجو وشوية لبن شوية عسل حسب الرغبة وكده عظمة أوي
سموزي موز بالشوفان: وده لملك الجيم واًصحاب الفورمة الجامدة وبيكون عبارة عن موز متقطع وشوفان وفانيليا ولبن غير كامل الدسم وألف هنا يا كابتن
