بنت كانت هتموت عشان عملت دايت غلط.. إزاي تتجنب مخاطر نظامك الغذائي؟
أكيد في وقت عدى عليك قولت فيه أنا هعمل نظام غذائي وهمشي عليه وهظبط جسمي.. وده بالظبط اللي فكرت فيه “مي” قبل ما تحصلها كارثة ماكانتش متوقعاها
هي شابة صينية عندها “16” سنة وكان عندها عيد ميلاد كمان أسبوعين وعايزة تخس أكبر قدر ممكن عشان تقدر تلبس الفستان اللي جايباه ويبقى لايق عليها..
النظام اللي هي فكرت فيه إن أكلها كله هيبقى ورقيات وخضروات وهتحبس بملينات عشان تسهل عملية الهضم وتخسر أكبر قدر ممكن من وزنها قبل العيد ميلاد.. بس اللي حصل إنها خسرت أكبر قدر ممكن من البوتاسيوم اللي موجود في جسمها.. وده وصلها لحالة اسمها “Hypokalemia”.. ده اللي خلاها فقدت القدرة على التحكم في أطرافها وكانت بتتنفس بصعوبة.. وعشان ترجع لطبيعتها عملت عملية إنقاذ طارئة مدتها “12” ساعة..
سيبك بقى من كل ده وتعالى نفتكر صاحبنا اللي عايز يعمل دايت.. أيوة انت.. إزاي تتجنب المخاطر دي اللي ممكن تأثر على صحتك وتعملك مشاكل
أول حاجة:
لو تقدر تتابع مع دكتور تغذية خاص بيك وعارف كل تفصيلة عنك فا يقدر يفيدك أكتر من أي حد
أما لو مفيش إمكانية.. فا نيجي بقى لتاني حاجة ودي تعتبرها إرشادات عامة ليك لو عايز تعمل نظام غذائي متوازن:
1- حدد هدفك.. انت عايز تعمل دايت أو تمشي على نظام غذائي ليه أصلًا؟
عايز تخسر وزن.. عايز تظبط معدلات سكر أو ضغط أو أي مشكلة طبية تاني.. الأسباب كتير وبناء على سببك واحتياجك هتعرف تشكل نظامك الغذائي من إيه
2- مركز “CDC” الأمريكي المتخصص في الوقاية من الأمراض اتكلم عن التغذية وقال إن جسمك لازم يكون فيه توازن من “6” عناصر غذائية أساسية وهما (الحديد – حمض الفوليك – فيتامين أ – اليود – الزنك – فيتامين د).. دول أول حاجة تعمل عليهم تحاليل وتطمن على نسبتهم في جسمك قبل ما تقرر تمشي على أي نظام غذائي..
3- والمصدر الغذائي في جامعة “Harvard” كتب عن الطبق المثالي اللي انت محتاجه المفروض يبقى محتوي على إيه؟
والطبق المثالي لازم يكون فيه (فواكه- خضروات – حبوب كاملة – بروتين – ومنتجات الألبان أو بدائلها) وتقسيمة طبقك لازم تبقى (نص الطبق يبقى خضار وفواكه وربعه بروتين والربع الأخير يبقى حبوب)
4- طبعًا السن والنوع بيأثروا على احتياجاتك الغذائية.. يعني اللي هياكله شاب مش هو اللي هياكله راجل عجوز وكذلك مش هيبقى نفس احتياج ست في عمر مختلف عنهم هما الاتنين..
5- كمان ممكن تحتاج مكملات غذائية لمعادن أو فيتامينات جسمك مابيقدرش ياخدها من أكلك اليومي.. وده ممكن تقدر تعرف تفاصيل عنه أكتر من الدراسة اللي اتعملت في جامعة “Harvard” بعنوان “The truth about nutrient deficiencies”
في الآخر عايزك ماتنساش إن دي مجرد إرشادات عامة.. وإنك ممكن تبقى محتاجة عناية متخصصة تحت إشراف طبي.. وخلي بالك من صحتك عامة.. يعني ماتعملش في نفسك كده.
