بين الدعم والنقد.. ردود أفعال لاعبين وصحفيين على تصريحات صلاح بعد مباراة ليدز

امبارح بالليل خرج المحترف محمد صلاح بتصريحات مؤثرة بعد ماتش ليفربول وليدز يونايتد في الدوري الإنجليزي وده كان بسبب أنه قعد للمباراة التالتة على التوالي “دكة” لأول مرة في مسيرته مع النادي اللي قال صلاح عنه: أنا عملت كل حاجة ممكن تتعمل.. والناس شاهدة على الموسم اللي فات

صلاح حس بالتهميش أوي من نادي ليفربول ومن المدرب سلوت وقال صلاح: “أنا مش فاهم سبب عدم مشاركتي في المباريات أساسي”.. والتصريحات دي أثارت جدل واسع بين الجماهير والإعلام بشكل عام.. تعالوا ناخد جولة سريعة لردود الفعل من نجوم الكرة بعد تصريحات “مو” 

دعم مصري

حاجة طبيعية جدًا أن يحصل دعم مصري لمحمد صلاح من الجمهور أو حتى اللاعبين في المنتخب وغير المنتخب فعلى سبيل المثال يعني وليس الحصر دعمه محمد هاني وأحمد سيد زيزو وحسام عبد المجيد وتريزيجيه وحمد فتحي ومحمد الشناوي وحسام حسن المدير الفني للمنتخب لكن عندك مثلًا أحمد حسن كوكا كتب بوست لصلاح وتحسه من القلب للقلب وكان فيه بإختصار بيقول: “الجلوس على الدكة مؤلم لأي لاعب، لكن صلاح ليس مثل الآخرين.. هو من فئة ميسي ورونالدو،ولا يُعامل كبديل يتم تجاهله.. وما فعله للنادي أكبر من ذلك فالمواقف مؤقتة والعظمة تبقى.. لكن تعالوا بقى دلوقتي نشوف ردود الفعل بره مصر

مايكل أوين: مكانش وقته 

مايكل أوين نجم ليفربول السابق قال على حسابه في “إكس”: صلاح لاعب أسطورة وشال النادي كتير ولفترات طويلة بس كمان لام صلاح إنه طلع وقال الكلام ده بشكل علني خصوصًا يعني إنه رايح يعلب كأس أمم إفريقيا فكان الأحسن إنه يكتم شعوره ويستمتع بتمثيل بلده “مصر” في البطولة ولما يرجع يشوف الدنيا هتمشي إزاي

هنري وينتر: وداع خاص 

هنري وينتر وده كاتب إنجليزي معروف.. وصف صلاح بأنه واحد من أعظم اللاعبين في تاريخ ليفربول وقال:”لن يسير محمد صلاح وحيدًا أبدًا.. والجماهير هتقف له تحية وهو بيودع النادي ويمكن يكون في يناير والمؤسف إن العلاقة مع المدرب والإدارة متوترة جدًا وكان لازم يكون وداعه بطريقة مختلفة بعد كل الإنجازات اللي حققها بصراحة

ديف أوكوب: الوضع فوضوي

ديف أوكوب وده صحفي مهتم جدًا بكل جديد عن ليفربول وقال: الوضع في النادي بعد تصريحات صلاح بقى فوضوي والمشكلة مش بس إن صلاح مش في أفضل مستوياته لكن تصريحاته علقت النادي في موقف صعب.. دلوقتي الموضوع بقى صلاح ضد سلوت وده مش في مصلحة أي حد غير المنافسين.. والمفروض الأمور تتصلح قبل كأس الأمم الأفريقية مش بعد ما يرجع من السفر

بيريس: تصريح فردي 

جيمس بيريس وده صحفي بريطاني من “ذا أتلتيك” قال إن كلام صلاح كان أناني من وجهة نظره وقال: صلاح خيب أمل ليفربول واللي قاله نقط سلبية على النادي.. ولازم يثبت نفسه على أرض الملعب لأنه حتى دلوقتي سجل 5 أهداف و3 تمريرات حاسمة في 19 مباراة بس.. ولو ما تحلتش المشكلة ممكن يا هيمشي.. يا سلوت هو اللي هيمشي

الصحف العالمية

تصريحات صلاح عملت ضجة في العالم والصحافة العالمية بشكل عام يعني مثلًا ديلي ميل البريطانية قالت عليه: صلاح يفجّر قنبلة الرحيل.. وفي رأيها أن علاقته بالمدرب سلوت وصلت لخط النهاية وتدهورت وبتتوقع رحيل صلاح أو سلوت بشكل عام.
 
كمان سكاي سبورتس قالت أن كده صلاح وارد يمشي من ليفربول وبنسبة كبيرة اسمه هيتردد في أندية ودوريات كتيرة وعلى رأسهم الدوري السعودي.. وده اللي هنتابعه الفترة الجاية خاصةً يعني أن لسة فيه وقت واللاعب هيشارك في أمم إفريقيا

وصحيفة ذا صن قالت ده غضب غير مسبوق وسلطت الضوء على أن صلاح بشكل عام يعيش أسوأ فتراته كرويًا وفيه توتر بشكل عام بينه وبين ليفربول وكمان سلوت اللي مبقاش مفهوم.. وبتتوقع رحيل صلاح برضه

 وعندك كمان ديلي ستار اتهمت بشكل مباشر النادي وإن هو السبب في تصريحات صلاح لإنه قال: “فيه حد مش عايزني في النادي”.. فهل يقصد سلوت ولا حد تاني.. فمن وجهة نظرهم إن الإدارة كان لازم تحتوي صلاح لأنه مش لاعب عادي وتاريخه يستحق الاهتمام

وأخيرًا بي بي سي قالت: “علاقة صلاح وسلوت انهارت”.. وقالت بعد كلام صلاح عن الدكة وسلوت بشكل غير مباشر ده هيخليه برضه يستبعده من التشكيلة الأساسية.. ووارد كمان يعاقبه وميدخلهوش قائمة الماتشات اللي جاية في دوري الأبطال والبريميرليج