تبرئة كيفن سبيسي من جميع تهم التحرش الجنسي

محكمة بريطانية النهاردة قامت بتبرئة الممثل الأمريكي “كيفن سبيسي” من كل التهم اللي كانت متوجهة له بارتكاب انتهاكات جنسية

“كيفن سبيسي” هو واحد من أشهر نجوم هوليوود، اتولد سنة 26 يوليو عام 1959، وحائز على جائزتين أوسكار، عن فيلمين American Beauty و The Usual Suspects.

الموضوع بدء سنة 2017 لما الممثل “أنتوني راب” قال إن “سبيسي” اعتدى عليه جنسيًا، وفي الوقت ده كان “كيفن سبيسي” بيعمل دور البطولة في واحد من أشهر المسلسلات واللي كان تريند في وقتها “House of Cards”.

المهم إن “راب” اتهم سبيسي بالاعتداء عليه لما كان الأول عنده 14 سنة وده أذى “كيفن سبيسي” في مسيرته، أولها إنه اتطرد من مسلسل House of Cards، وزي ما بيتقال اليومين دول “اتكنسل” من كل المشاريع اللي كان مشارك فيها أو هيشارك فيها.

وبعد كل ده، في أكتوبر 2022 محكمة في نيويورك قامت بتبرئة “كيفن سبيسي” بسبب عدم وجود إثبات إنه لمس “أنتوني راب” وتم رفض القضية بس ادعاءات “راب” دي جابت معاها قواضي تانية لكيفن ولكن في بريطانيا.

والنهاردة تم تبرئة “كيفن” من 7 تهم اعتداء جنسي وتهمتين ارتكاب جرائم جنسية، بعد أكتر من 12 ساعة من المداولات على مدى 3 أيام.

“سبيسي” واللي بيصادف إنه عيد ميلاده الـ 64 النهاردة بكى بعد تبرئته وشكر هيئة المحلفين بعد إطلاق سراحه من قفص الاتهام.

سبيسي” كمان قال إن تلاتة من الأربع رجال اللي رفعوا ضده دعوى كان هدفهم المال، واحد منهم اتصل بيه وطلب 450 ألف” جنيه إسترليني (ما يوازي أكتر من نصف مليون دولار أمريكي)

والمزاعم كانت بتقول إن ده حصل بين فترة 2004 لـ 2013 اللي كان بيشتغل فيها “سبيسي” مدير فني في مسرح أولد فيك في العاصمة البريطانية.