تتصرف إزاي لو اتحطيت في موقف محرج؟

بنتحط ساعات فيها في مواقف محرجة كتير وبيبقي رد فعلنا عليها تقريبا عليها ولا حاجة أو ساعات بنضحك وخلاص أو مابنردش أصلا وبعدين بقى أول مابنرجع البيت بليل أو نحط رأسنا على المخدة تبقى دماغنا تشتغل ونحس إننا قمة الإحراج.

زي ما شوفنا الفيديو اللي انتشر للفنانة أصالة في واحدة من حفلاتها وهي بتشكر المايسترو فافتكر الكلام على نفسه والجمهور سقف وهو شكر الجمهور بعدين طلعت كانت بتتكلم على مايسترو تاني أصلا.. وده خلى المايسترو يحس بإحراج ويلف وشه الناحية التانية.

ناس كتير بتتعرض لمواقف محرجة مش أنت يمكن كلنا اتعرضنا للإحراج ده وبنتحط في موقف محرج كل فترة واللي الشخص بيحس بيه هو إنه مكسوف أو مش مستريح ونفسه الأرض تتشق وتبلعه.. وبالرغم إن مفيش أي نصيحة ممكن حد يقدمهالك عشان تتجنب المواقف المحرجة إلا إن فيه نصايح عشان تتجاوز فيها اللحظات المحرجة والإحساس بالكسوف ده.

موقع “psychcentral” بيقول إن الإحساس بالإحراج بيجي بسبب إن فيه ناس بتبقي بتراقبك وده بناءًا على دراسة اتعملت سنة 2015 وإن الناس بتحس بالإحراج لما بيحسوا إنهم فشلوا بشكل علني قدام الناس وبتزيد مشاعر الإحراج عندهم خصوصا بقى لو كانوا بيعانوا من القلق أصلا.

ودي علامات بتدل إنك مكسوف أو محرج فعلا:

1- وشك يحمر 

2- تعرق 

3- تتلخبط في الكلام 

4- بتفكر كتير في الموقف 

5- ضربات قلبك بتزيد 

6- بتحرك ايدك ورجلك كتير 

وممكن مشاكل التعامل مع الكسوف والخفو من الإحراج يوصلوا الشخص لمشاكل على المدى الطويل زي اضطرابات القلق أو الاكتئاب أو قلة احترام الذات.

طيب تعمل إيه لو اتعرض لموقف محرج تتعامل معاه إزاي أو إزاي تتخطاه أصلا؟ ده اللي موقع “psychologytoday” قاله في أحد مقالاته اللي كتبها “ديان بارث”:

1- خد وقتك عشان ترد:

لو حد حطك في موقف محرج بلاش أول حاجة تعملها تعتذر أو تلوم على نفسك أو تهجم عليه لإن ده هيجيب نتايج عكسية في وقتها وممكن لو حد كسفك وأنت بالنسبة له ضحية لما تهاجمه أو ترد عليه تبقى ضحية أكتر بكل سهولة بالذات إن عقلك بيبقى متجمد وقتها وفي حالة رعب وعايز تختفي فخد وقتك عقبال ما وقتك يقدر يشتغل تاني بشكل سليم وتكتشف طريقة كويسة في الرد.

2- ماتاخدش الموضوع بشكل شخصي:

في الأول اسكت وابعد عقلك عن نفسك وحاول تفهم في صمت كده الشخص ده قال كده ليه وخد وقتك، وافضل باصص للشخص من غير ما تتكلم لإن رد الفعل ده بيوضح إنك مذهول من اللي اتقال، وخصوصا إن أوقات الناس مابتاخدش بالها إنها قالت شئ يكسف يعني، ولما هيشوف رد فعلك ممكن يعتذر، وممكن لو الشخص ماخدش باله تقوله عادي، فمثلا لو مديرك في الشخص كسفك قدام زملائك ممكن تقوله أنا عايزك5 دقايق لوحدنا وبعد كده تقوله أنا عارف إنك ماكنتش تقصد تعمل كده لكن لما انتقدتني قدام الناس اتضايقت، وأنا عايز اسمع انتقادك ليا عادي عشان اتطور لكن هبقى متشكر لو قولتلي ده لوحدنا.. وممكن وقتها يعتذرلك وممكن ينتقدك تاني فماتاخدش الموضوع بجدية أوي، ولو مش قاصده يحرجك فعلا هيوضحلك وجهة نظره.

3- اخرج من الموقف:

دكاترة الأعصاب بيقولوا إن عندنا حوالي 20 دقيقة عشان تخلي المحادثات العاطفية اتجاهاتها تتغيير، فعشان كده حاول ماتطولش في الكلام وماتحسنش الأمور وخد مسافة وفكر تاني في الموضوع ده وشوف لو عايز تتكلم مع الشخص ولا لا، بس في الوقت نفسه اخرج من الموقف في أسرع وقت.

4- حاول تفهم دوافع الشخص:

بمجرد ما تبعد عن الأذى هتقدر تفكر في اللي حصل، ومش معنى إنك فهمت يعني سامحته أو أسف من ناحيته، لكن دي ببساطة عبارة عن أداه عشان تساعد نفسك تتخطي سلوكهم ده، وعشان ماتاخدش أي موقف شخص تجاههم، وتشوف الأمور بشكل أوضح وإن الموضوع متعلق بيهم مش بيك.. فممكن واحد من الاحتمالات إنهم غضبانين عشان أنت زعلتهم قبل كده، أو عملت فيهم موقف مشابه وبيردهالك وأنت مش قاصدك، أو إنه حس حد بيهدد سيطرته أو قوته.

5- أنت مش لوحدك:

خليك عارف إنك مش لوحدك لإن تقريبا محدش في الحياة ماعداش بالمشاعر دي، واحكي للناس القريبين منك واسمحلهم يدعموك، وخليك عارف إنك الضحية مش سبب المشكلة.

6- بلاش تحاول تنتقم:

وفقًا للأبحاث الإحراج هو مزيج من الغضب والخجل عشان كده أي شخص بيحس إن الوسيلة الوحيدة عشان تسترد احترامك لنفسك هي الانتقام، لكن خليك فاكر إن الشخص اللي حسسك بكده ممكن يتحول لشخص أسوأ بكتير وهيردلك الضربة، وبالرغم من كده فعدم الانتقام مش معناه إنك ضعيف لكن أحيانا القوة بتبقى إنك تدافع عن الناس في مواقف مشابهة لو أمكن.