تجرب وتفشل ولا ما تجربش خالص؟!
الحياة عبارة عن تجربة كبيرة جواها شوية تجارب صغيرة كده.. كل يوم بنعدي بيهم وبيكون فيه احتمالية للنجاح أو الفشل وخلينا نقول بشكل ما إن موضوع التجربة أغلب الوقت بيكون اختياري يعني ممكن تقرر تدخل فيها أو تهرب منها.. فهل الأحسن إنك تجرب وتفشل ولا ما تجربش خالص؟!
حسب مجلة Forbes وموقع Psychologicalscience وموقع Betterup
1- إيه اللي هيحصل لو ما جربتش خالص؟
- مميزات
- أول حاجة.. في الغالب الناس مابتجربش عشان شوية مميزات وأولهم إنك بتلعب في الـ Comfort Zone يعني مفيش مخاطرة يعني مفيش توتر ولا إحساس بالخوف والقلق خلال التجربة
- الحاجة التانية هي إنك مش هتفشل وده معناه إنك مش هتخسر واللي معناه في الآخر إنك مش هتخسر حاجة ولا هتحس بالإحباط
- تالت حاجة والأخيرة فيه مثل بيقولك “طول ماهي ماشية.. ماتلعبش في حاجة” وده اللي بيقولوا عليه الاستقرار فطالما أنت في حال معين وحياتك ماشية كويس إذًا لو ما غامرتش هتفضل في مكانك وتحافظ عليه
- عيوب
- “جحيم الجهل”.. لو أنت ما جربتش هيبقى عندك فضول دايمًا إنك عايز تعرف نتيجة التجربة كانت هتكون إيه وهتفضل تسأل نفسك “إيه اللي كان ممكن يحصل؟”
- العيب التاني إن مش هيبقى فيه تطور حقيقي.. حرفيًا واقف في مكانك وده آه استقرار لكنه برضه جمود هيكون في أوله استقرار وحاجة كويسة لكن بعد فترة العالم حواليك بيتحرك وأنت واقف مكانك
- تالت حاجة هيفوتك فرص كتير.. ولو فيه منافسة سواء مع نفسك أو مع حد حواليك في نفس الوظيفة أو الدراسة أو غيرهم هتلاقي الفرص بتعدي منك وهم بيعملوها وده هيخليهم يسبقوك
- هي حاجة بديهية شوية بس هتضيع على نفسك احتمالية إنك تنجح.. هتنجح إزاي ما أنت أصلا ما جربتش!
2- وإيه اللي هيحصل لو جربت وفشلت؟
- مميزات
- المعرفة: من أهم وأمتع الحاجات هي إنك تبقى عارف اللي فيها حرفيًا.. مهما حد وصفلك التجربة مش هيوصلك الإحساس الحقيقي بتاعها والحاجة التانية إحساس إنك بتجرب الحاجة وبتعرف مش هيخلي عندك تساؤلات بتاع “إيه اللي هيحصل؟ طب إيه الشعور؟”
- الخبرة: الحاجة اللي مضمونة 100% هي اكتساب الخبرة.. الفشل حرفيًا هو أكتر حاجة ممكن تعلمك إزاي تنجح
- الثقة: كل مرة بتجرب فيها الحاجة أكتر من مرة حتى لو هي أصعب حاجة في الدنيا بتبدأ تلين مع الوقت والتجربة وبتكون أخف عن المرة الأولى والثقة أكبر وأهم عامل يخليك تنجح
- النجاح: زي ما قولنا لو ما جربتش مش هيبقى عندك فرصة تنجح.. وفرصة النجاح بتكون 50% طالما جربت وده معناه إن عندك فرصة تنجح
- هتشوف جديد: طالما بتجرب حاجة يبقى هتفتحلك أبواب لحاجات جديدة تشوفها وتعملها أنت أصلا ممكن ما تكونش مخططلها
- عيوب
- الفشل: زي ما النجاح نسبته 50% الفشل برضه نفس النسبة وده معناه إنك ممكن تواجه الفشل.. وده غالبا هيضايقك ويزعلك شوية حلوين حسب التجربة
- الخسارة: بتخسر شوية وقت ومجهود وفلوس وده من أسباب التردد أصلا
- تتعب: ممكن تتعب شوية نفسيًا بسبب النتيجة أو من ضغط الناس اللي حواليك
3- طب إيه فيهم أحسن؟
بعد ما عرفنا مميزات وعيوب الاتنين.. السؤال هنا بيكون إيه فيهم أفضل؟
- قبل ما نختار فيه سؤال مهم.. هل أنت شايف عيوب إنك تجرب دي عيوب؟ وده له إجابة حسب دراسات كتير اتعملت إنه لأ دي مش عيوب على قد ما هي حاجات هتفيدك وتعلمك لأن التجربة نفسها زي ما قولنا بتديك خبرات وثقة وحاجات كتير
- الحاجة التانية فيه دراسة اتعملت في جامعة Cornell بنيويورك بعنوان “The Ideal Road Not Taken” أو “الطريق المثالي اللي ما خدتوش” والدراسة دي لقت إن على المدى الطويل الناس اللي ما جربتش بيندموا أكتر بكتير على الحاجات اللي ما عملوهاش على عكس اللي جربوه وفشلوا فيه مفيش ندم زي اللي ما عملوهاش
- الحاجة الأخيرة هي إنك تقدر تحول الفشل لفرصة تتعلم منها وتستفيد وإن التجربة لها دور كبير في تطورك وتطور شخصيتك
في النهاية لو أنت مش من النوع اللي بيجرب فأنت غالبًا فايتك حاجات كتير وبتسأل نفسك عنها وعن الإحساس بيها.. والنصيحة الخالدة اللي ممكن نقولهالك من غير دراسات “طب ما تجرب يا أخي أنت غرمان حاجة؟ أنت عندك حاجة تخسرها؟”
