ترشيحات لمجموعة كتب وروايات عن العلاقات الأسرية
بما إن الويك إند أكتر وقت بنقعد فيه مع بعض في البيت كعيلة وبتبتدي تظهر الخلافات اللي بينا كل ما بنقعد وقت أطول مع بعض.. عشان كده جمعنالكوا في الموضوع ده ترشيحات لمجموعة كتب بتتكلم عن العلاقات الأسرية.. وكل كتاب هياخدك في زاوية مختلفة وفي عالم تاني خالص!
1-كتاب “أبي الذي أكره”
الكتاب للكاتب عماد رشاد عثمان.. وبيتكلم عن الإساءات والترومات اللي بتحصل للطفل من وهو صغير وتأثر عليه لما يكبر وغالبًا الأهل بيكونوا سبب فيها سواء الأب والأم أو الأعمام والعمات والخلان والخالات وأي حد قريب من الطفل في مرحلة تكوينه.. عشان كده لو عايز ماتكررش الأخطاء دي مع ولادك وتتعلم من اللي فات يبقى لازم تقرأ الكتاب ده ضروري.. ولو أنت شخص مر بحاجات صعبة في طفولته يبقى الكتاب برضو هيساعدك تتعافى ويقدملك حلول تتخطى بيها صدماتك.
2-كتاب “علاقات خطرة”
الكتاب من تأليف دكتور “محمد طه” وبيتكلم عن العلاقات البشرية وقد إيه هي معقدة وإزاي كل علاقة في حياتنا بتأثر علينا.. وخلال فصول الكتاب بنتعرف على العلاقات الخطرة اللي ممكن نكون مكناش واخدين بالنا منها.
3-كتاب “أنقذوا الطفل في داخلكم”
الكتاب للدكتور”تشارلز ويتفيلد” ومتقسم أجزاء كتيرة من أول ما بنبدأ نعرف إن عندنا مشكلة نفسية من الطفولة وإيه هو أصلا مفهوم الطفل الداخلي.. وأنواع الأمهات والأبهات في التربية والمشاكل النفسية اللي ممكن يسببوها وبتبقى إيه أسبابها.. والكتاب اتكلم كمان عن اضطراب ما بعد الصدمة وإزاي تتعامل معاه وكمان اتكلم عن مرحلة التشافي.. فلو حاسس إن عندك صدمات طفولة ومش عارف تحلها.. الكتاب هيساعدك جدًا وهيديك أمثلة تفهم منها كويس.
4-رواية”أعجوبة”
لمحبي الروايات بقى العائلية هتحبوا الرواية دي جدًا لأنها رواية فعلا مميزة.. كتبتها الكاتبة الأمريكية “آر جي بلاسيو” عشان تتكلم عن طفل عنده 10 سنين لكنه مصاب بمتلازمة”تريتشر كولنز (عنده خلل في عظام الوش وفي الفك) فبنشوف خلال الرواية إزاي الناس بتتعامل معاه.. وبنشوف كمان إزاي أهله بيتعاملوا معاه بحب وبيخلوه يتقبل نفسه زي ماهو ويحبها وبنعرف خلال الرواية أهمية العيلة عشان نحس بثقتنا في نفسنا.
5-رواية “نساء صغيرات”
الرواية من تأليف “لويزا ماي ألكوت” و بتحكي عن أربع بنات أخوات عايشين مع بعض بعد انتهاء الحرب الأهلية الأمريكية اللي حصلت بين شمال أمريكا وجنوبها.. وبنشوف معاناتهم بعد الحرب خاصة في غياب والدهم وبنشوف عايزين إزاي مع بعض والتضحيات اللي كل حد في الأسرة بيقدمها رغم صغر سنهم.
6-كتاب “أسرار الترابط الأسري الصحي”
والكتاب من تأليف “أوليفيا جي روبرت” وبيتكلم عن أهمية الترابط الأسري في كل عيلة وإزاي ممكن الأسرة تبقى متحدة ومتوافقة مع بعضها.. عشان يزود من ثقة أفراد الأسرة في نفسهم وفي اللي حواليهم من خلال عرض مجموعة من النصايح المفيدة.
7-كتاب”الأبوة والأمومة الذكية على الشاشة”
والكتاب من تأليف”جودي جولد” ومهتم أكتر بالأطفال وإزاي تعمل توازن في تربية أطفالك وبين استخدامهم لمواقع التواصل الإجتماعي.. والكتاب بيتكلم كمان عن تأثيرات السوشيال ميديا على العيلة والمخاطر اللي ممكن تسببها.. وإزاي العيلة ممكن تحط حدود عشان ترجع الترابط الأسري في ظل التحديات اللي بتواجههم.
