تعرف منين إن دي لطافة ولا سخافة؟
كتبت: ندى خالد
ساعات بتسأل نفسك هو الناس بتتغير معايا ليه؟ ده أنا لطيف معاهم وبتعامل بحسن نية!.. بس عمرك فكرت تحط نفسك مكانهم وتفكر فعلًا هل كل تصرفاتك تنفع مع كل الناس ولا كل واحد لازم تتعامل معاه على حسب شخصيته؟.. ياترى إيه الحاجات اللي ممكن تضايق الناس منك وإنت مش واخد بالك.. كمل الموضوع للأخر وهتعرف
في مثل مصري قديم لخص الحكاية دي كلها وقال:”صوابعك مش زي بعضها”
يعني من الأخر اللي مريح ليك ولطيف بالنسبالك ممكن يبقى awkward أو غير مريح بالنسبة لحد تاني وشايفه تدخل في حياته..
يعني مثلًا صاحبك اللي بيتضايق وبيبقى عايز ياخد space أو مساحة مع نفسه وإنت بتفضل تكلمه كل شوية وفاكر إن ده اهتمام ولطف بس بالعكس ده تعدي على المساحة الشخصية بتاعته خاصة لو هو اللي كان طالب يكون لوحده فبالتالي هينفر منك أكتر وهيتضايق.. وأنت هتبقى شايف إنك لطيف ومش فاهم ليه اتضايق منك.
وساعات تانية بتتعرف على ناس جديدة وتبدأ تسألهم على حاجات خاصة بيهم عشان عايز تحسسهم إنك مهتم بيهم وشخص لطيف بس ده بيبقى مش وقته فالناس برضه بتحس إنك شخص متدخل مش لطيف ولا حاجة.
وأوقات بتلاقي حد قريب منك بيعمل حاجة مش عاجباك فتبدأ تكلمه بأسلوب مش مناسب أو تساومه بعلاقتكم بحجة إنك مهتم وخايف عليه ومش محتاجين نقول إن ده برضه مش لطيف
ولما بيكون في حد حاطط حدود معاك ومش معتبرك صديقه بس إنت بتحاول تكسر الباب وتدخل بأي طريقة وفاكر إن كده بتكسبه ده مش لطيف لأنك هتكون بتكسر الحدود اللي الشخص راسمها لنفسه.
لما بتفضل تتحايل على حد كتير إنه يعمل حاجة هو مش عايز يعملها وفاكر إنك كده مش عايز تسيبه بس الحقيقة إنت بتكون بتضغطه.
طيب لو عايز فعلًا تبقى لطيف وتحافظ على حدود الناس تعمل إيه؟
-اللي بتشوفه هو دايمًا الحقيقة.. يعني لو ملاحظ إن اللي قدامك مش مرتاح من طريقة تعاملك معاه يبقى هو مش مرتاح ولازم تحافظ على مسافة في التعامل.
-“NO means no” لا مالهاش تفسير تاني غير لا.. فلما حد يقولك مثلًا مش عايز أخرج أو مش عايز أعمل حاجة يبقى تسيبه في حاله.. مش هيكون اهتمام ولطف الزن عليه إلا
في حالة واحدة بس لو أنت قريب للشخص ده وهو بنفسه اللي طلب منك إنك تشجعه لما يكسل أو طلب منك أي فعل معاكس.
-ماتاخدش الحاجات بشكل شخصي مش معنى إن الشخص حاطط معاك حدود إنك لازم تثبتله إنك لطيف وتغير وجهة نظره لإنك بالعكس هتزهقه كده أكتر.
-حاول تعمل اتفاق مع الناس اللي حواليك لما تحس إنك تايه.. طيب تعمل الاتفاق ده إزاي.. تسألهم بشكل شخصي تحبوا اتعامل معاكوا إزاي في المواقف المختلفة اللي شاكك إنهم بيتضايقوا فيها.. شوفت الموضوع بسيط إزاي!.
وافتكر في الأخر إن كل إنسان بيغلط بس المهم تتعلم من غلطك لو حسيت إنك عملت حاجة من اللي فوق دي.. بس المهم تعترف بغلطك وماتكرروش وخليك دايمًا فاكر إنك مش هتعرف الأفضل للناس التانية زي ما أنت فاكر حتى لو نيتك كويسة لازم تسيبلهم حرية التصرف واختيار الحدود المناسبة ليهم والأفضل إنك كمان تركز على عمل حدود صحية ليك لأن دي أحسن هدية لطيفة تقدمها لنفسك وللي حواليك.
