تعمل إيه لو تعرف حد بيعاني من أفكار انتحارية؟
كل ٤٠ ثانية فيه شخص في العالم بينهي حياته.. تعمل إيه لو تعرف حد بيعاني من أفكار انتحارية؟وفقا لمنظمة الصحة العالمية، فيه حوالي ٨٠٠ ألف شخص بينتحروا سنويًا، والانتحار هو السبب التاني للوفاة بعد حوادث الطرق، خصوصًا في الفئة العمرية من ١٥ ل٢٩ سنة.
كتير بنشوف وبنقرأ عن حوادث انتحار بتحصل فجأة، ومن فئات عمرية واجتماعية مختلفة، وفيه دراسة أمريكية اتعملت إن كل شخص بيقتل نفسه ممكن يأثر بشكل مباشر على ١٣٥ شخص تانيين، علشان كده دايما الدكاترة بينصحوا بعدم إعادة نشر أو تداول صور أو فيديوهات أو رسايل المنتحرين علشان ممكن تشجع ناس تانية عندها أفكار انتحارية إنهم يعملوا كده.
طب لو فيه حد من أهلك أو زمايلك أو صحابك أو أي حد أنت تعرفه عايز ينتحر أو عنده “أفكار انتحارية” تعمل إيه أو تتصرف إزاي علشان تحاول تمنعه يعمل ده؟
١- اتكلم معاه وماتسيبهوش لوحده. الموقف صعب وأكيد الكلام هيكون صعب، بس أهم حاجة إنك تسمعه من غير ما تبان إنك بتنتقد أو بتصدر أحكام، واختار مكان يبقى الشخص التاني حاسس إنه مرتاح فيه، وتعرفوا تتكلموا وتقدر تبقى سامعه كويس ومركز معاه، وماتقاطعوش أو تقلل من أحاسيسه أو مشاعره.
٢- اختار الوقت الصح اللي تطلب منه إنه يتكلم فيه، لأن ساعات الشخص بيبقى عايز يعيط وعايزك تكون موجود بس، أو حتى عايز يقعد ساكت بس محتاج ونس، فأنت كل اللي عليك إنك تشوف هو محتاج إيه وتبقى جنبه بس وده جزء كبير من المساعدة ماتستهونش بيه.
٣- ركز معاه، وتواصل معاه بالعين، وماتبصش في موبايلك خالص، اديله كل تركيزك واهتمامك.
٤- شجعه إنه يروح لمتخصص/ دكتور نفسي، وخليك جنبه خطوة بخطوة، ممكن تحجزله عند دكتور وتروح معاه لو لزم الأمر، الشخص المكتئب أو اللي عنده أفكار انتحارية مش بيبقى عنده الدافع إنه يحصل على المساعدة، فأنت عليك إنك تساعده يحصل على المساعدة دي حتى لو هو مش عايز.
٥- حاول تشيل أي حاجة جنبه ممكن تأذيه أو ممكن يستخدمها للانتحار زي السكاكين أو شفرات الحلاقة والأدوية والمسدسات.
٦- اسأل دايما أصحابك وأهلك عن “يومهم” وعن حالتهم وأخبارهم وحاسين بإيه، وماتزهقش من ده، واعمله كل يوم، علشان سؤالك عن حد ممكن ينقذه.
لو حد فكر في الانتحار وقالك، أو أنت حسيت بحاجة مقلقة عنه، ماتقللش من الموقف وماتتجاهلوش.. للأسف أغلب اللي انتحروا عبروا عن نيتهم إنهم هيعملوا ده في مرحلة معينة.. ودايما افتكر إنك مش من مسؤوليتك منع شخص إنه ينتحر أو يقتل نفسه، بس تدخلك ممكن يساعد الشخص إنه يشوف اختيارات تانية قدامه غير الموت.
