تفاصيـل حقن الجيــل القادرة علـى إعادة نمــو الأعصاب التالفة وتحسين الإحساس بشكل كبير
علماء في معهد ماساتشوستس للتكنولوجيا ابتكروا جيل بيتحقن (MIT) بيساعد على إعادة نمو الأعصاب التالفة وقادر إنه يرجع الإحساس المفقود بالكامل.. هنقولك تفاصيله!
إيه حقن الجيل؟
الجيل ده متصنع عشان يبقى شبه الأعصاب الطبيعية والأنسجة اللي حواليها بالظبط عشان يقلل الضغط عليها.. معمول من جسيمات الذهب النانونية اللي بتسهل وصول الأعصاب اللي عايزين نعالجها وقت ما بتتحط الإلكترودات اللي بتقيس قدرة الأعصاب على توصيل الإشارات زي الحركة يمين أو شمال.. والجيل ده قادر إنه يجدد الأعصاب التالفة ويرجع الحركة والإحساس بشكل شبه كامل.. ومعمول عشان يكون مادة مؤقتة قابلة للامتصاص والذوبان فهو بيتحلل تدريجيًا بعد فترة من الوقت وممكن يتشال بمحلولٍ مذاب من خلال قسطرة
الجيل ده بيحل مشكلة الأعصاب إزاي؟
الجيل ده بيعمل شوية وظائف:
- بيعمل شبكة حوالين منطقة الأعصاب التالفة فبيتبني جسر في المنطقة دي.. والمعروف إن الأعصاب التالفة بيكون فيها تجاويف فبيملى التجاويف دي
- وقت الجراحة بيثبتوا الإلكترودات فالجيل بيقلل المساحة الفاضية بين الأقطاب والأنسجة
- بيدي مساحة للخلايا العصبية التالفة إنها تخرج عشان يتم التخلص منها وبعد كده يوفر مساحة للمحاور العصبية المُشكلة جديد إنها تحل محل التالفة
- بيحمي العصب الجديد من النسيج الضام المحيط بيه
حقن الجيل دي بتعمل إيه في الجسم؟ ونتايجها إيه؟
- بتقلل الاستجابة الالتهابية وتكوين النسيج اللي بيعيق الأعصاب إنها تتجدد
- والنتايج في الدراسات المختبرية ما قبل السريرية كانت إيجابية جدًا لأن الأشخاص اللي كان عندهم ضعف في وظائفهم الحسية بالكامل استعادوها.. ودي نتيجة الطرق التقليدية ماتقدرش توصلها أبدًا
- بمجرد حقن الجيل في المنطقة اللي الأعصاب فيها مُصابة الخلايا العصبية بتبدأ تستعيد الاتصال الكهربائي بين الدماغ والمناطق المُصابة.. وده بيقلل التكاليف الكبيرة وكمان مخاطر الجراحة
ليه الاختراع ده مهم؟
- مرضى إصابات الحبل الشوكي وتمزقات الأعصاب الشديدة زمان كانوا بيعملوا جراحات طارئة عشان يخففوا الضغط على العمود الفقري وإعادة التأهيل ورعاية طويلة الأمد.. بس مع حقنة الجيل دي الموضوع هيبقى أبسط بكتير فهتتحقن في المكان المتضرر بس.. والمرضى في المراحل المزمنة أو الحادة فرصهم في التحسن عالية بنسبة كبيرة
- وهيفيد كمان مرضى الاعتلال العصبي السكري وانضغاط الأعصاب واليدين والقدمين والاعتلال العصبي المحيطي
وفي الآخر الاختراع ده قادر إنه يحسن من صحة الأعصاب مش يرجع الشخص طبيعي زي ما كان بالظبط ولسه محتاج يتجرب بشكل أوسع وأكبر
