بترجع للقرن الرابع قبل الميلاد.. تفاصيل اكتشاف أطلال مدينة “إيمت” ومباني لتخزين الحبوب بالشرقية

إمبارح 21 يونيو أعلنت وزارة السياحة إنها عثرت على بقايا أطلال مدينة “إيمت” في منطقة تل الفرعون بالشرقية.. وكمان بقايا مباني سكنية لـ “بيوت برجية” ومباني لتخزين الحبوب وإيواء الحيوانات بترجع لأوائل أو منتصف القرن الرابع قبل الميلاد.. وده حصل في ختام موسم الحفائر الحالي اللي عملته البعثة الأثرية البريطانية في جامعة مانشستر

تفاصيل الاكتشاف

الدكتور محمد إسماعيل خالد الأمين العام للمجلس الأعلى للآثار قال إن أعمال التنقيب تمركزت في التل الشرقي واعتمدوا على تقنيات الاستشعار عن بُعد وصور الأقمار الصناعية (لاندسات) واللي كشفت عن تجمعات كثيفة من الطوب اللبن في أماكن معينة

والحفائر كشفت كمان عن مباني سكنية بيُحتمل إنها بترجع لأوائل أو منتصف القرن الرابع قبل الميلاد.. ومن بينها منشآت يُعتقد إنها “بيوت برجية” وهي عبارة عن منازل متعددة الطوابق عشان تستوعب أعداد كبيرة من الناس.. وبتتميّز بجدران أساس سميكة جدًا عشان تتحمل وزن المبنى نفسه.. والبيوت دي بتنتشر بشكل خاص في دلتا النيل من العصر المتأخر وحتى العصر الروماني

وكمان البعثة كشفت عن مباني تانية كانت بتُستخدم لأغراض خدمية زي تخزين الحبوب أو إيواء الحيوانات

أما في منطقة المعبد عثرت البعثة على أرضية كبيرة من الحجر الجيري وبقايا عمودين ضخمين من الطوب اللبن.. واللي يُحتمل إنهم كانوا متغطيين بالجص.. وإنها تنتمي لمبنى اتبنى فوق طريق المواكب اللي كان بيربط بين صرح العصر المتأخر وصرح معبد واجيت.. وده بيوضح إن الطريق ده خرج من الخدمة وقت منتصف العصر البطلمي 

وبالنسبة لمعبد واچيت أُعيد بنائه خلال فترة حكم الملك رمسيس الثاني ومرة تانية في عهد الملك أحمس الثاني

أهمية الاكتشاف

محمد عبد البديع رئيس قطاع الآثار المصرية قال إن الكشف ده بيساعد في زيادة المعرفة الأثرية عن المنطقة دي وكمان فهم طبيعة الحياة اليومية والعبادات خلال الفترتين المتأخرة والبطلمية المبكرة.. وده عشان من أبرز اللُقى الأثرية اللي اكتشفوها هي الجزء العلوي لتمثال أوشابتي المصنوع من الفيانس الأخضر بدقة عالية وبيرجع لعصر الأسرة الـ 26.. وكمان عثروا على  لوحة حجرية بتصور الإله حورس وهو واقف على تمساحين وماسك أفاعي وفوقها صورة للإله بس.. بالإضافة إلى آلة موسيقية من البرونز (سيستروم) مزينة برأسي الإلهة حتحور واللي بترجع لنهاية العصر المتأخر

بالإضافة إلى إن الكشف ده بيفتح الطريق لدراسات مستقبلية هتساعد في معرفة أسرار المدينة دي

أهمية مدينة “إيمت”

الدكتور “نيكي نيلسن” مدير البعثة وضح إن مدينة “إيمت” كانت من أبرز المراكز السكانية في الوجه البحري خاصة في عصر الدولة الحديثة والعصر المتأخر.. وتميزت بوجود معبد ضخم مخصص لعبادة الإلهة “واجيت” واللي لحد دلوقتي أطلاله قائمة على الجانب الغربي من الموقع