تفاصيل الانتهاكات بحق معتقلين فلسطينيين على لسان مخبرين إسرائيليين

في الوقت اللي كل يوم بيتم اكتشاف كارثة إنسانية بيقوم بيها جيش الاحتلال ضد أهالي فلسطين بيظهر تحقيق لـ CNN بتوضح فيه تفاصيل “انتهاكات” بيتعرض ليها أسرى فلسطينيين لدى جيش الاحتلال وده على لسان مخبرين إسرائيليين في مركز اعتقال في صحراء النقب.. على بعد 30 كيلومتر من حدود قطاع غزة

قاعدة عسكرية بقت مركز احتجاز:

إسرائيلي بيشتغل في مركز الاحتجاز صوّر صورتين لمشهد بيقول إنه بيطارده كل يوم لحد دلوقتي.. مجموعة محتجزين رجالة قاعدين على فرشة رقيقة جدًا وكلهم عينيهم متغمية بقماش ورؤوسهم منخفضة كده بسبب التعب والإرهاق وكمان شدة الضوء اللي جاي على وشوشهم.. الإسرائيلي بيقول إنهم ممنوعين من الكلام سواء مع بعضهم أو مع نفسهم حتى وكمان مش مسموح ليهم بالحركة وليهم وضع معين يقعدوا فيه.. والحراس عندهم تعليمات إن اللي بيتحركوا أو يخالفوا الأوامر أو يعملوا صوت بيتم معاقبتهم.. وبيتقال إن أحيانا في أطباء بيقوموا ببتر أطراف الأسرى بسبب الإصابات اللي بتحصل من الحاجات اللي رابطة إيديهم!

حسب الروايات المنشأة مقسومة اتنين جزء منها فيه حوالي 70 فلسطيني تحت قيود شديدة والجزء التاني مستشفى ميداني بيربطوا فيها الأسرى المصابين في سرايرهم وبيلبسوا حفاضات وبيغذوهم من خلال أنابيب صغيرة

واحد من اللي بلغوا عن المخالفات كان دكتور في المستشفى الميداني هناك في المكان قال “جردوهم من كل حاجة إنسانية” وكان عقاب على اللي حصل في 7 أكتوبر

وتعليق جيش الاحتلال على الادعاءات اللي في تقرير CNN قال إن الجيش بيضمن السلوك المناسب ضد المحتجزين وبيتم فحص أي ادعاء على سلوك جنود الجيش والتعامل مع الموضوع لما يكون في شبهه.. لكنه ما أنكرش بشكل صريح قصة تجريد المعتقلين من هدومهم واحتجازهم في حفاضات.. وظهرت الانتهاكات في “سدي تيمان – Sde Teiman” قبل كده في وسائل إعلام كتير إسرائيلية وعربية ولكن دي شهادة من إسرائيليين جوا المنشأة بل كمان بتوضح CNN إن مراسيلها خضعوا للتحقيق لمدة 30 دقيقة قبل ما يعملوا أي حاجة وكمان بيخضعوا للرقابة العسكرية وبيراجعوا كل الصور واللقطات اللي بياخدها الصحفيين مش بس CNN ولكن كل الصحفيين

معتقلات الاحتلال

جيش الاحتلال حوّل 3 منشآت عسكرية لمعسكرات اعتقال من 7 أكتوبر.. وهم “سدي تيمان وعناتوت وعوفر” بيحتجزوا فيه المعتقلين لمدة 45 يوم وبعدها يروحوا للسجون الرسمية في إسرائيل اللي محتجزة لحد دلوقتي أكتر من 9000 شخص في ظروف قالت حقوق الإنسان عنها إنها تدهورت بشكل كبير جدًا منذ أكتوبر خصوصًا إن جمعيتان للأسرى أعلنوا الأسبوع اللي فات إن 18 فلسطيني استهشدوا في المعتقلات منهم الجراح دكتور عدنان البرش

شهادة دكتور محمد الران

تم احتجازه لمدة 44 يوم في سجن سدي تيمان وقال “كنا بنستنى الليل عشان ننام” و”بنستنى الصبح على أمل وضعنا يتغير”.. الدكتور محمد كان بيرأس وحدة الجراحة في المستشفى الإندونيسي من أول المستشفيات اللي تم غلقها وفي لقاءه مع CNN بعد تحريره قال إن تم تجريده من هدومه حتى الداخلية وغموا عينيه وروايته بيأكدها إنها نفس رواية عشرات الأشخاص اللي قالوا روايتهم عن الاعتقال 

مباني جديدة:

الأقمار الصناعية بتظهر وجود مباني جديدة من بداية الحرب.. 100 مبنى جديد من ضمنهم خيام واللي بيأكد إن في زيادة في نشاط جيش الاحتلال من 7 أكتوبر 

وكل يوم بيتم اكتشاف جريمة جديدة وكارثة إنسانية جديدة بيقوم بيها جيش الاحتلال قدام عيون العالم كله.. لكنه العالم كله ما بياخدش أي رد فعل عشان ينقذ أرواح بتموت وناس بتتعذب أو بيتم انتهاك إنسانيتهم وتجريدهم من كل مظاهر الإنسانية.. والسؤال المهم هو: امتى كل البشاعة دي هتقف؟!!