تفاصيل الكشف عن 3 مقابر جديدة بأسوان
النهاردة السبت 28/6/2025 وزارة السياحة أعلنت الكشف عن ثلاثة مقابر جديدة بجبانة قبة الهوا بأسوان من الدولة القديمة.. ودي باقي تفاصيل الكشف
البعثة الأثرية المصرية اللي شغالة في جبانة قبة الهوا بأسوان كشفت عن ثلاثة مقابر منحوتة في الصخر من عصر الدولة القديمة.. وده خلال موسم الحفائر الحالي
والأمين العام للمجلس الأعلى للآثار أكد إن النتائج الأولية بتقول إن شوية من المقابر دي رجعوا يستخدموها تاني خلال عصر الدولة الوسطى.. واللي بيعكس الاستمرارية التاريخية لأهمية جبانة قبة الهوا كموقع دفن عبر العصور المختلفة
كمان الكشف ده بيسلط الضوء على فترة انتقالية حرجة بين نهاية الدولة القديمة وبداية عصر الانتقال الأول.. وبتظهر الدراسات إن شوية من المقابر اللي تم حفرها في الفترة دي كانت خالية من النقوش.. بس حافظت على الطابع المعماري وطقوس الدفن التقليدية وده بيدل على إن الإمكانات الاقتصادية وقتها كانت محدودة
أما رئيس قطاع الآثار المصرية بالمجلس الأعلى للآثار وضّح تفاصيل المقابر التلاتة.. الأولى مفيهاش نقوش ولا كتابات وفيها فناء خارجي موجود جواه بابين وهميين.. مائدتين للقرابين.. أواني فخارية وتوابيت في حالة سيئة من الحفظ.. بالإضافة لهياكل عظمية
والبعثة لقت في الفناء بئر للدفن فيه توابيت خشبية متهالكة جواها هياكل عظمية وأواني فخارية شوية منها عليه نقوش هيراطيقية بترجع لعصر الدولة القديمة
والمقبرة التانية بتقع غرب الأولى وهي كمان مفيهاش نقوش ولقوا جواها مائدتين للقرابين وأواني فخارية تعود لعصر الدولة الوسطى.. وغالبًا من تصميمها المعماري بترجع لنهاية الدولة القديمة أو بداية عصر الانتقال الأول.. وأعيد استخدامها مرة أخرى بالدولة الوسطى
أما التالتة مختلفة في تصميمها عن الاتنين اللي فاتوا وبتقع غرب مقبرة “كا-كم” من عصر الدولة الحديثة
والمقبرة مفيهاش نقوش ولقوا جواها كمية كبيرة من الفخار في حالة جيدة من الحفظ.. ومعاها كمان هياكل عظمية بعضها لأطفال والأدلة بتقول إن المقبرة بترجع لعصر الدولة القديمة
في النهاية الكشف ده بيأكد أهمية جبانة قبة الهوا اللي تعتبر واحد من أهم المواقع الأثرية في جنوب مصر.. وبيدعم فهم التسلسل الزمني والمعماري وطقوس الدفن خلال الفترات الانتقالية في التاريخ المصري القديم.
