تفاصيل الكشف عن 63 مقبرة بمدينة دمياط الجديدة
![](https://theglocal.com/wp-content/uploads/2024/07/63.png)
يوم التلات 23/7/2024 أعلنت وزارة السياحة والآثار المصرية اكتشاف 63 مقبرة ودفنة من العصر المتأخر وكان فيها عملات برونزية وأواني فخارية ولقى أثرية “بيوت أو حُفر أو مقابر أو قنوات ري” واللي بتأكد إن دمياط كانت مركز للتجارة الخارجية عبر العصور التاريخية المختلفة.. فا تعالوا نشوف باقي التفاصيل
البعثة الأثرية نجحت في الكشف عن 63 مقبرة من الطوب اللبن وبعض الدفنات البسيطة اللي فيها مجموعة من الرقائق الدهبية من الأسرة 26 من العصر المتأخر وده كان بالإضافة لعدد من العملات البرونزية من العصر البطلمي.. واللي كان في منطقة جبانة تل الدير بمدينة دمياط الجديدة
ووضح الدكتور محمد اسماعيل الأمين العام للمجلس الأعلى للآثار إن التخطيط المعماري للمقابر المكتشفة هو أحد النماذج المتعارف عليها والمنتشرة في مصر القديمة خلال العصر المتأخر.. واللي بيأكد على الأهمية التاريخية للاكتشاف ده اللي ممكن يكون بداية لإعادة تأريخ فترة زمنية هامة لمدينة دمياط
وقال الدكتور أيمن عشماوي رئيس قطاع الآثار المصرية إنه تم العثور في المقابر دي على مجموعة من التمائم الجنائزية وتماثيل الأوشابتي وأواني فخارية بالإضافة لبقايا وحدات معمارية بسيطة وإناء من الفخار بداخله 38 عملة برونزية من العصر البطلمي.. ومجموعة من الأواني الفخارية المستوردة والمحلية اللي بتلقي الضوء على التبادل التجاري بين دمياط ومدن ساحل البحر المتوسط
وأشار الأستاذ قطب فوزي رئيس البعثة الأثرية إن البعثة نجحت كمان في الكشف عن مقبرة ضخمة من الطوب اللبن فيها عدد من الدفنات ليها مستوى اجتماعي كبير جواها محموعة من الرقائق الذهبية التي تجسد الرموز الدينية و المعبودات المصرية القديمة.. كمان التمائم الجنائزية الفائقة الدقة من حيث مهارة الصناعة وروعة وتنوع مواد صناعتها