تفتكر الإبداع حاجة بنتولد بيها ولا مهارة نقدر نكتسبها؟

كتير مننا بيسمع الجملة المشهورة سواء من مديره أو من العميل اللي بيشتغل معاه “عايزين حاجة كريتيف كده تكسر الدنيا!”.. تسمع الجملة من هنا وتحس إن أصلًا مفيش فكرة برا الصندوق في دماغك.. وتبدأ تشك في إنك كريتيف من الأساس وليه ماتولدتش عبقري زي الناس اللي كسروا الدنيا بشغلهم.. بس أصلًا هو الإبداع موهبة بتتولد بيها ولا مهارة بتكتسبها مع الوقت؟

كريتيف بالفطرة الولد ده!

• صفات موروثة: فيه شوية صفات بتورثها من أهلك.. منها مثلًا إنك فضولي وعايز تجرب حاجات كتير ودماغك مرنة بتتقبل وبتوزن كل فكرة مختلفة بتتعرض عليها

• • مرونة في الشبكات العصبية: تواصل الأعصاب مع بعضها واستقبالها للإشارات ليه دور في الإبداع.. خاصة الأشخاص اللي أعصابهم بتوازن بين التفكير الخيالي والمنطقي وبتنمي شبكات عصبية أكتر فالتواصل بين التفكيرين بيزيد وده بيخليهم مبدعين بالفطرة

• تأثير الطفولة: حب اكتشاف العالم من حواليك بتتحكم فيه قدرتك على التخيل.. وده بيظهر أوي وقت اللعب.. إنك تتخيل سيناريو لعالم كامل حواليك ده بيوسع دايرة معرفتك خاصة لو كانت البيئة اللي حواليك سامحة بده أكتر بتخلي عندك مخزون أفكار محوشه لوقت عوزة في المستقبل

• الفلترة أقل بالفطرة: المعلومات الكتير بتخليك قادر على تكوين روابط بين حاجات مختلفة وده بيوصلك لأفكار جديدة محدش يقدر يشوفها لو هو شخص بطبعه بيفلتر المعلومات ومش بياخد باله من كل حاجة قدامه أو التفاصيل اللي حواليه.. فاللي مابيفلترش عنده فرصة أحسن إن تجيله أفكار أكتر برا الصندوق

الوقت كافي إنك تكتسب فيه الإبداع!

• • الإبداع نتيجة للبحث: مفيش إبداع بيجي من فراغ.. هو نتيجة لدمج مخزون المعرفة اللي عندك مع المعلومات الجديدة اللي طلعت بيها من بحثك.. عشان ساعتها الفكرة اللي هتطلع بيها ماتكونش مكررة وتبقى فعلًا مختلفة 
  • التجربة: دور على أي حد نجح في حاجة هتلاقيه كان عاكك الدنيا في أولها لكن بعد ما جرب أكتر من مرة بدأ يبقى متمكن فيها.. وأبسط مثال على ده الرسام والمهندس الإيطالي مايكل أنجلو اللي عمل أشهر المباني واللوحات في أوروبا زي لوحة خلق آدم.. قال إن لو الناس عرفت الجهد اللي عمله عشان يتقن كل عمل فني ليه مكنتش أعماله هتبقى بالعظمة دي خالص.. عشان الغلط في التجربة بيخليك تتعلم فبتبتكر حلول مختلفة للمرة الجاية

• الخبرة: المرونة هي الاختبار الحقيقي للإبداع.. والخبرة هي الحاجة الوحيدة اللي بتكتسب منها المرونة دي لأنها بتحطك في مواقف مش متوقعة فعقلك بيتحط تحت ضغط إنه يطلع حلول عليها القيمة غير اللي انت عارفها 

• الإبداع مادة بتتذاكر وتتدرب عليها: والدليل على ده إن فيه طرق كتير بتعلمهولك.. زي الـ brainstorming أو العصف الذهني اللي فيه بتخرج كل الأفكار اللي عندك بس من غير ما تحكم عليها.. والتفكير المتباعد أو Divergent Thinking اللي بتطلع فيه أكتر من حل مختلف لمشكلة واحدة.. والخرائط الذهنية أو الـ Mind Mapping اللي لما بتنظم فيها أفكارك بتقدر تطلع بالفكرة المطرقعة  

طب هو الإبداع إيه في الآخر؟

الموهبة والمهارة حاجتين مايتفصلوش عن بعض.. لو اعتمدت على إنك مبدع بالفطرة وكبرت دماغك إنك ماتتعلمش وتقرأ الجديد مش هتطلع أفكار جديدة لأنك عملت سقف لإبداعك ومفيش جديد بتستقبله ينشط أفكارك.. وبرضه لو فكرت في إنك تكتسب الإبداع من اللي حواليك بس هتلاقي شغلك بقى زيه زي غيره مافيهوش البصمة بتاعتك.. الفكرة كلها إنك توازن بين اكتساب الإبداع وبين إنك تمرن عقلك على إن الإبداع يكون جزء من تفكيرك خلال اليوم

افتكر إن الإبداع هو عبارة عن استمرارية مش مثالية.. سواء بقى استمرارية في الفُرجة الكتيرة عشان تغذي عقلك أو إنك تجرب أكتر من مرة عشان تتعلم.. والمهم إنك تحاول كتير وماتزهقش وهتلاقي نفسك وصلت.