تقليل سقف التوقعات.. دليلك السحري للنجاح في الشغل/الدراسة والحياة

مين في الحياة دي سقف التوقعات ماوقعش فوق دماغه 5 أو 6 مرات؟ سواء علاقات أو شغل أو أي تعامل في الحياة.. كلنا بنتعرض للإحباط من نفسنا لو خدنا العشم واستنينا حاجة من حد.. أو حتى الناس اللي حوالينا احبطوا مننا لما ماقدرناش نقدمهم اللي محتاجينه مننا.. عشان كده دورنا على الحل السحري اللي يخلينا نعيش في سلام كلنا وهو “Lowering Expectations” تقليل مستوى التوقعات وفي أقوال أخرى  التشاؤم الدفاعي “defensive pessimism”

• طب يعني إيه؟

هي طريقة بتقوم فيها من خلالها لتحويل خيالاتك العالية لمستوى واقعي وكمان تقليل توقعاتك عن نفسك أو اللي حواليك.. بحيث إنها لو ضربت معاك وظبطت هتنبسط أوي.. ولو ماظبطتش مش هتضايق لأنك كده كده كنت متوقع ده 

• إيه فايدة الطريقة دي؟

1- تقليل التوتر: لما بتتوقع أوحش السيناريوهات لموقف معين ده بيخليك مستعد إنك تواجهه فعامل حسابك من الأول فـطاقة القلق بتتحول لشغل

2- الحماية: توقع السيء بيخفف من الصدمة.. ده غير إن لومك لنفسك بيبقى أقل لأنك على الأقل نجحت في تحقيق السيناريو الوحش اللي تخيلته  

3- التخطيط الكويس: بعد ما جه في بالك كل العقبات اللي ممكن تقف بينك وبين حلمك.. بتبدأ تسخن وتتكتك كويس هتتخطاها إزاي 

4-  تعزيز قيمة النجاح: إنك تفوق التوقعات بيخلي فرحتك مضاعفة.. بإنك تحديت التفكير السلبي وحققت نتائج أحسن

• طب أطبق الطريقة دي إزاي؟

1- حدد نطاق للتشاؤم: يعني لو قررت تتوقع الأسوأ خليك منطقي ومتأفورش في القلق
فمثلًا لو عندك ميتنج مع عميل.. عادي إنك تحس أو تقلق بخصوص إنك ممكن تتلخبط وانت بتعمل البرزنتيشن.. لكن مش طبيعي ساعتها تفكر في إنك هتطرد من الشغل.. يعني خلي السيناريو السلبي في نطاق الحدث نفسه مش أعلى منه

2- وازن بين التشاؤم والإيجابية: بمعنى إنك وانت بتفكر في السيناريو السئ خصص شوية وقت تركز فيه عن النتايج الإيجابية.. يعني لو مديرك مش شايفك كفء مش هتكمل في الشغل اللي انت فيه أصلا

3- ثق في نفسك: تقليل سقف التوقعات مش معناه إنك تقلل من إمكانياتك عشان لو عملت هتقفل على نفسك ومش هتجرب أي حاجة جديدة.. ده غير إن علاقتك باللي حواليك ممكن تبوظ.. لأن صعب عليهم يعيشوا وسط كل الكم ده من التشاؤم

4- قول مخاوفك بصوت عالي أو اكتبها: عشان ده بيوضح هي منطقية ولا لأ.. وناقشها مع حد واثق فيه ويقولك رأيه فيها عشان برضه ماتسرحش في التشاؤم بس

في الآخر زي ما نجيب محفوظ قال: “عدو الإنسان توقعاته” فحاول تقلل من توقعاتك بس في نفس الوقت ماتجيبهاش الأرض.. اللي بيزيد عن حده بيتقلب ضده!