ثعبان وحيد من 9 سنين خلف لوحده من غير أنثى 14 تعبان صغيرين
عالم الحيوان والنبات مش دايما مفهوم بالنسبة لنا وأغلب الوقت فيه حاجات غريبة بتحصل فيه مابنقدرش نفسرها ومش لوحدنا ده العلماء والباحثين كمان اللي مهتمين بالحيوانات زينا لكن الفرق إنهم بيشوفوا ده وبيحاولوا يوصلوا لتحليلات منطقية وعلمية أكتر.
ومن أغأرب الحاجات اللي حصل مؤخرًا هي إن تعبان عايش لوحده بقاله 9 سنين ظهر معاه 14 تعبان صغيرين والعلماء شافوا إن اللي حصل ده أشبه بمعجزة لسببين الأول هو إن العلماء معتقدين إنه ذكر وتاني سبب هو إنه مالوش أي اتصال جنسي من 9 سنين.
وقال موقع “الجارديان” إن الثعبان من فصيلة “بوا” البرازيلية وعايش في حوض في كلية “بورتسموث” البريطانية” واسمه “رونالدو” وطوله حوالي 1.8 متر
ووصفت الكلية إن ده تقريبا معجزة وإن اللي حصل مثال نادر على التوالد العذري وقالوا إن ده شكل طبيعي من أشكال التكاثر اللاجنسي وإن الأجنة بتنشأ من غير إخصاب.. وده بيحصل في نباتات كتير وبعض الحيوانات لكن بيعتقدوا إن دي المرة التالتة بس اللي يتم فيها توثيق حدث زي ده لتعبان من الفصيلة دي في أي مكان في العالم.
وأخصائي الزواحف “بيت كوينلان” قال إنه ربى تعابين لمدة 50 سنة وماشافش ده قبل كده وماكنش عارف إنه ممكن يحصل.. وقال إن الأطفال كلهم مستنسخين منه لكن فيه علامات مختلفة شوية.. وضاف كمان إن رونالدو كان شكله أتخن شوية من الطبيعي أخر فترة كأنه كل وجبة كبيرة شوية ومافكروش لحظة إنه ممكن يبقى حامل
“بيت كوينلان” بيربي رونالدو من 9 سنين بعد ما تم إعادة توطين التعبان من الجمعية الملكية لمنع القسوة على الحيوانات (RSPCA).. وأعلن الدكتور البيطري إنه ذكر وكان من المقيمين المشهورين في الكلية في أخر سنتين
وقال إنها فرصة حلوة جدا للطلاب عشان يتعرفوا على تطور التعابين الصغيرة. وهو دلوقتي مشغول إنه يعرف جنس الثعابين الصغيرة وإنه يعمل 14 مزرعة جديدة عشان لما التعابين الصغيرة دول يكبروا شوية هيروحوا بيوت جديدة.
وفقا لحديقة حيوان “دودلي”، فأغلب التعابين من نوع “بوا” البرازيلي بتخلف من 12 لـ 15 تعبان وبيخرجوا للحياة عادة بعد حوالي 6 شهور من التزاوج وبيبدأوا في التغذية من عمر 10 أيام وطولهم بيكون من 38 سم لـ 50 سم لما بيتولدوا وبيوصلوا لـ 1.2 متر في أول سنة والإناث بتنموا أكتر من الذكور.
