ثقافة كلمة (لأ).. وإزاي تقولها للناس من غير ما تحس بالذنب؟
“لأ”.. كلمة واحدة بسيطة مكونة من حرفين بس.. لكن ليه أوقات كتير بيكون صعب نقولها؟
حسب BetterUp، بالنسبة لناس كتير، الرفض أو كلمة (لأ) بتكون مصاحبة لشعور بالذنب، إنك ممكن تزعل الشخص اللي قدامك، أو مش عارف ترفضله طلب، أو ممكن تكون شخص Pleaser بيركز في سعادة الناس أكتر من سعادته هو شخصيا.
وبغض النظر عن الأسباب، إنك تتعلم تقول “لأ” دي تعتبر مهارة مهمة لصحتك ونفسيتك ورفاهيتك، وده لأن الطاقة والوقت يادوبك، ولازم نستخدمهم بحكمة، وده معناه إن إحنا مش هنقدر نعمل كل حاجة، لأن كل حاجة أنت بتعملها بتستبعد حاجات تانية ممكن تتعمل.
بالنسبة لبعض الناس، عدم القدرة على إن إحنا نقول كلمة لأ، بتبدأ من الطفولة، لأن الأطفال بيتعلموا باستمرار إنهم يكونوا مهذبين ومحترمين عن طريق كلمة “حاضر” ولو الطفل قال (لأ) لوالده أو والدته أو مدرسينه أو أي حد كبير في المطلق، بيتم اعتبار ده قلة ذوق أو عدم احترام للكبير، فالطفل من صغره بيتربى على إن كلمة (لأ) حاجة غلط وعيب، وبيكبر وهو مش عارف يعبر عن تفضيلاته ورغباته وحدوده.
سبب تاني بيخلينا مش عارفين نقول (لأ) وهو إن أحيانا الشخص بيكون شاكك في نفسه ومعندوش ثقة في نفسه، فبيبقى خايف إن الناس تشوفه مش قادر يقوم بواجباته أو مسؤولياته، وبيبقى فيه شعور إن لازم الشخص يوافق عشان يثبت لنفسه وللناس التانية إنه قادر يقوم بالمطلوب منه.
وسبب كمان، وهو التعاطف البشري والطبيعة البشرية، لأن البشر كائنات اجتماعية بتعتمد على التواصل البشري، وبسبب حاجتنا كبشر للانتماء والتواصل بنخاف إننا نرفض طلب حد أو نخيب أمله أو نخلق نوع من أنواع الصراع ما بيننا وبين الناس اللي ممكن ينتج عن الرفض أو كلمة (لأ).
إمتى المفروض تقول لأ؟
- لما تحس إنك مش مرتاح أو اتطلب منك حاجة مش حاببها أو مش مرتاحلها بأي شكل
- لما تحس بإلزام أو شعور بالذنب تجاه الطلب اللي اتطلب منك ممكن ده يكون مؤشر إنك تقول لأ
- لما يبقى وقتك مشغول جدا وماعندكش مساحة أو وقت أو طاقة إنك تعمل حاجة اتطلبت منك
- لو الطلب المطلوب منك مش متناسب مع حدودك ومبادئك وقناعاتك
- لو السبب الوحيد اللي هيخليك توافق على الطلب هو إنك محرج أو مكسوف أو لمجرد رغبتك في إسعاد الشخص اللي قدامك
ليه مهم نقول لأ؟
- كل ما هتقل الحاجات المطلوبة منك كل ما هتعملها بشكل أفضل وبجودة أكبر وبتركيز أعلى
- أحيانا بيكون مهم لصحتك النفسية والعقلية
- بتقلل أو تمنع الاحتراق أو الإنهاك الوظيفي
- الموافقة على كل حاجة ممكن يعطلك عن تحقيق أهدافك الشخصية
- لازم تكون واقعي بخصوص قدراتك وإمكانياتك والحاجات اللي تقدر تعملها
- لازم يبقى فيه وقت مخصص للاهتمام بنفسك ووقت فراغ تعمل فيه أي حاجة ليك أنت
إزاي تقرر إمتى تقول لأ؟
لو محتار ومش عارف المفروض توافق ولا ترفض أي طلب بيتطلب منك دي شوية أسئلة ممكن تساعدك
- هل أنا عندي الوقت والطاقة إني أعمل الطلب ده؟
- هل لو وافقت، ده هيضيفلي أي حاجة؟
- هل الشخص اللي بيطلب مني الطلب ده بيستغلني أو بيستخدمني؟
- هل أنا هوافق لمجرد إسعاد الشخص اللي قدامي حتى لو ده هيضايقني؟
- هل لو رفضت الطلب ده، هيبقى عندي مساحة أعمل حاجة تانية أهم بالنسبالي؟
- هل موافقتي عشان أنا محرج أو مكسوف؟
- هل أنا عندي حاجة تانية أهم ممكن أعملها؟
- هل أنا محتاج وقت أفكر قبل ما أوافق أو أرفض؟
وأخيرا لو حد قرر يبطل يحبك أو يقبلك عشان أنت رفضتله طلب، فلازم تعرف إنه كده بيحبك حب مشروط بموافقتك على طلباته. الموضوع محتاج تدريب وكلمة (لأ) مش سهلة، بس أنت اللي من حقك توافق أو ترفض أي طلب بيتطلب منك، ومش من حق أي حد يقررلك حياتك أو اختياراتك.
