جولة سريعة في جائزة الكرة الذهبية – Ballon d’or
بمناسبة حفل توزيع الكرة الذهبية النهاردة الساعة 11 إلا ربع مساءً واللي بدأت أول مرة سنة 1956.. حبينا ناخد فيها جولة من أول الألفية الجديدة
الجائزة كانت بتتوزع على أفضل لاعب أوروبي بس لحد 1995 وبعدها بدأت تتوزع على اللي بيلعبوا في أندية أوروبية.. وأخيرًا بقت بتشمل كل اللاعيبة في 2007 وأول مرة يكسبها لاعب غير أوروبي كان الأفريقي “جورج ويا” 1995
بيغيب عنها ميسي ورونالدو لأول مرة من 21 سنة!
واللي اترشحلها رونالدو أول مرة من 20 سنة في 2004.. وفاز بيها أول مرة في 2008 من 16 سنة وخدها 5 مرات كثاني أكتر لاعب فاز بيها
أما ميسي أول مرة اترشح في 2006.. وفاز بيها أول مرة في 2009 وخدها 8 مرات كأكثر لاعب في التاريخ توج بالجائزة وهو آخر لاعب فاز بيها في 2023 وهو مع نادي إنتر ميامي
والملك المصري محمد صلاح اترشحلها لأول مرة في 2018 وأكبر إنجاز حققه كان “المركز الخامس” في 2019 كأفضل ترتيب للاعب عربي في التاريخ.. وغاب عن المرشحين لأول مرة من 7 سنين السنة دي
ومن مفاجآتها آخر مدافع فاز بيها في 2006 كان الإيطالي “كانافارو”.. كمان 2010 فاز بيها ميسي على “إنييستا وتشافي وشنايدر”.. ورونالدو في 2013 فاز بيها على حساب فرانك ريبري لاعب بايرن ميونخ السابق
بالنسبة لأكتر الأندية اللي حققت الكرة الذهبية كانت برشلونة وريال مدريد بـ 12 مرة وفي انتظار النهاردة هل ممكن يحققها حد من لاعبي ريال مدريد ويخليه في صدراة الفرق اللي فازت بيها ولا لأ
وأخيرًا عندنا أقوى المرشحين السنة دي “فينيسيوس ورودري وبيلينجهام ومبابي وكارفاخال” وغيرهم من اللاعيبة.. قولنا تفتكر مين ممكن يفوز بيها النهاردة؟
