جولة في الأبراج العربية قديمًا.. إزاي انتشرت وإزاي تعرف برجك العربي؟

الناس اللي بتحب الأبراج وبتهتم بيها.. هل كنتوا تعرفوا إن فيه أبراج عربية وليها أسماء مختلفة عن الأبراج اللي عارفينها دلوقتي؟ تعالوا كده ناخد جولة ونعرف أكتر عن الأبراج العربية القديمة وإزاي تعرف برجك العربي وصفات كل برج وبيعبر عن إيه.

حسب موقع أبراج

انتشار الأبراج العربية

الأبراج العربية انتشرت في بلاد ما بين النهرين “بلاد الرافدين” اللي هي العراق دلوقتي وده كان بين 2600-2700 قبل الميلاد وبرغم إنها كان منتشرة بشكل أقل من الأبراج الغربية إلا إن كان ليها وزن كده وقيمة وبتتسمى على أسماء أسلحة وكانت متقسمة 3 أنواع جواهم 12 برج والـ 3 مجموعات دول هم “أسلحة اليد.. الأسلحة المتوسطة والأسلحة الطويلة” 

أسلحة اليد: السكين.. الخنجر.. السكين الكبير “القطلس” والخنجر العربي

أسلحة متوسطة: المقمعة “قداس الحديد”.. الهراوة “عصا الفلاحين”.. الفأس والسلسلة

أسلحة طويلة: السيف.. الرمح.. المقلاع والقوس

أرقام الأبراج العربية بالتواريخ 

1- برج السكين

من 24 أغسطس لـ 23 سبتمبر

2- برج الخنجر 

من 22 مارس لـ 20 أبريل

3- برج السكين الكبير “القطلس”

من 11 يونيو لـ 22 يوليو

4- الخنجر العربى

من 24 أكتوبر لـ 22 نوفمبر

5- المقمعة “قداس الحديد”

من 22 مايو لـ 21 يونيو

6- الهرواة “عصا الفلاحين”

من 21 أبريل لـ 21 مايو

7- الفأس

من 19 فبراير لـ 20 مارس

8- السلسلة 

من 24 سبتمبر لـ 23 أكتوبر

9- السيف

من 23 يوليو لـ 23 أغسطس

10- الرمح 

من 22 ديسمبر لـ 20 يناير

11- المقلاع 

من 21 يناير لـ 18 فبراير

12- القوس

من 23 نوفمبر لـ 21 ديسمبر

تقسيمهم تقريبًا مشابه للأبراج اللي إحنا عارفينا دلوقتي مع شوية فروق في الأيام

صفاتهم:

حسب موقع astrorient 

1- السكين: ممكن يدخل في كل التحديات ويعلن انتصاره في أغلب الأوقات.. في نفس الوقت عنيد ومالوش في الانضباط أوي أو خالص

2- الخنجر: شخصيته قوية ومقدام كده بيحب يخش في الحاجة بدماغه مايهموش وبيفتخر بإنجازاته جامد.. كمان شخص اجتماعي وعفوي وسخي يعني إيده فرطة وبيشبرق على نفسه وعلى غير عادي بس بيقلق شوية من المستقبل والحاجات اللي مش معروفة أو هو مش متحكم فيها

3- السكين الكبير “القطلس”: حساس ومثالي بيحب يعمل الحاجة زي ما الكتاب بيقول ومش ضروري يكون فيها إبداع أو ابتكار.. وبيعشق الهدوء والسلام مهما كان التمن كمان اجتماعي وبيحب يهزر ويضحك وسط الناس اللي قاعد معاها وعلى المستوى العاطفي مخلص ورومانسي 

4- الخنجر العربي: غامض ومش سهل حد يفهمه في نفس الوقت متهور وبيغضب لو حد جه عليه وزعله في حاجة مش هتتوقع رد فعله وممكن يرقدلك كده شوية حلوين عشان يظبط الانتقام حلو وكمان عنده استعداد يستغل أي فرصة عشان يحقق أهدافه

5- المقمعة “قداس الحديد”: مش منفتح على الحاجات الجديدة حتى لو بيقول العكس وبيحترم التسلسل الهرمي يعني لو عنده مدير بيحترمه وبيقدر المكانة بتاعته.. متغير بشكل مستمر لأنه بيقدر يتكيف مع أغلب أو كل الأوضاع وبيبرر كل سلوكياته بكل ثقة حتى لو غلط!

6- الهرواة “عصا الفلاحين”: قوي وصادق وهادي ممكن يبان مش مهتم أو مهمل لكن هو في الحقيقة عنده خيال كبير وغني وقلبه حساس.. علاقته مع الناس سهلة ومش معقدة وبيحب الحياة

7- الفأس: شكاك ومابيصدقش حاجة غير في آخرها خالص كده بعد وقت طويل.. في نفس الوقت هو عادل وذكي وخجول وبيحب الخير لغيره “بيحب الإيثار” وبيكره الظلم وأي شكل من أشكال الأنانية.. منفتح لأفكار الناس بس مش هيتخلى عن أفكاره وعاداته وتقاليده 

8- السلسلة: أهبل شوية لدرجة إنه مستعد يساعد الناس كلها حتى اللي أذوه.. لبق وسلاحه المميز أوي هو الدبلوماسية وبيقدر يخلي الناس اللي حواليه عندها فضول ناحيته وفي الشغل متطور وبيقدر يتعامل مع الفلوس مش بيكمل الشهر بـ 50 جنيه يعني!

9- السيف: حاسم في قرارته ومالوش في التردد خالص.. دايمًا حاسس إن قيمته أعلى من قيمة اللي حواليه وفاكر نفسه محور الكون! وحياته اليومية منظمة بيمشيها ميري 

10- الرمح: بيقدر يستحمل كتير عشان كده بيقدر يتغلب على الحاجات الصعبة اللي بيقابلها.. عنده أفكار واضحه دايمًا لطموحاته وكمان عنده مواهب كتير ومثقف فا الناس كلها تحب تخرج وتقعد معاه.. مبدع وحتى لو غلط كتير بيقدر يدرك أخطاءه بسرعة ويحلها مش زي ناس كده

11- المقلاع: بيحب الحرية ومايحبش حد ياخدها منه ولا يحرمه منها.. بيكون ضعيف في بعض الأوقات خصوصا لو قابل أكتر من مشكلة مع بعض أو ورا بعض وعلاقته مع الناس ودية وكلها إخلاص وكمان سخي وبيصرف

12- القوس: عنده إرادة قوية ويخش في تحديات عشان بيحب النجاح وبيعرف امتى يبقى واضح وباين للي قدامه وامتى يداري كل حاجة عشان بيحس إن ممكن أي حد من دايرته يخونه فابينقي مين هيتكلم قدامه.. بيحب يساعد بشكل عفوي وذكي وواضح ودقيق بس في نفس الوقت غريب 

في الآخر العرب كان عندهم أبراج زينا دلوقتي آه لكنهم كانوا بيحبوا ياخدوها من البيئة المحيطة اللي عايشين فيها وعلاقتهم بالطبيعة.. قولنا إنت برج إيه من الأبراج العربية؟