حاجات فيها مياه غير المياه.. عشان تحمي نفسك من الجفاف في الحر
لما تيجي تفكر في مقاومة الجفاف وقت الحر وترطيب جسمك، أول حاجة بتيجي في بالك هي شرب المياه.. لكن تعرف إن حوالي 20% من المياه اللي جسمنا بياخدها بتيجي من الأكل؟ مش كل الأكل بيساعد في الترطيب، لكن فيه أكلات بترطب الجسم بشكل كبير.
جسمنا بيعتمد على المياه عشان يقدر يشتغل ويعيش، والمياه بتساعد في تنظيم درجة حرارة الجسم، وتليين المفاصل، وتطهير الجسم من الفضلات، وحماية الأعضاء والأنسجة.. والأكلات اللي فيها مياه كتير بتحميك وتحمي جسمك من الجفاف.. خصوصًا في الأيام الحر في الصيف.
ولازم تبقى عارف إن الجفاف ممكن يسبب تعب وصداع ومشاكل في البشرة وتشنجات في العضلات وضغط دم واطي وزيادة في معدل ضربات القلب.. والخبراء عمومًا بينصحوا بشرب مياه كتير في اليوم عشان تلبّي احتياجات جسمك من الترطيب.
لكن مع إن المياه مهمة جدًا بس مش هي الطريقة الوحيدة عشان تحمي نفسك من الجفاف.. وفيه ناس كتير مابتحبش تشرب مياه كتير وعشان كده جمعنالكوا شوية أكلات فيهم نسبة مياه كبيرة وممكن يرطبوا جسمك ويحموك من الجفاف حسب Healthline
1- البطيخ فاكهة مليانة مياه وعناصر غذائية ممكن تفيد صحتك وبتقلل من مخاطر الأمراض المزمنة.
2- الفراولة صحية جدًا وفيها مياه كتير.. وكمان مليانة عناصر غذائية مفيدة.
3- الشمام أو الكنتالوب فاكهة صحية فيها مياه كتير، ده غير الفيتامينات والمعادن اللي بتفيد الصحة.
4- الخوخ فيه مياه وألياف ومضادات أكسدة، وفيه شوية فيتامينات ومعادن بيساعدوا في الترطيب وفيهم فوايد صحية كتيرة.
5- البرتقان مصدر ممتاز للمياه والألياف ومضادات الأكسدة وعناصر غذائية كتير، وبيساعد في الوقاية من حصوات الكلى وأمراض تانية كتير.
6- الخيار مليان مياه وسعراته الحرارية قليلة جدًا.. والتركيبة دي بتبقى مفيدة للصحة بشكل عام، خاصة في ترطيب الجسم.
7- الخس فيه مجموعة عناصر غذائية وألياف، وكمان كمية كبيرة من المياه، وده بيساعد بشكل كبير في الحماية من الجفاف.
8- الكوسة كمان فيه كمية كبيرة من المياه وعناصر غذائية مفيدة لنظامك الغذائي.. وبتساعد في ترطيب الجسم وبتفيد صحتك بشكل عام.
9- الزبادي السادة مصدر ممتاز للمياه والبروتين وفيتامينات ومعادن.. وممكن يساعد على الحماية من الجفاف.
10- الطماطم فيها كمية كبيرة من المياه والعناصر الغذائية ومضادات الأكسدة اللي بيساعدوا في ترطيب الجسم.
11- القرنبيط كمان فيه كمية كبيرة من المياه والألياف والعناصر الغذائية.. وبيكون بديل كويس لأنواع تانية من الخضار مش بترطب الجسم.
12- الكرنب مفيد جدا وممكن يحمي من الجفاف ويساعد على ترطيب الجسم.. وده عشان فيه مياه كتير وعناصر غذائية مختلفة ومضادات أكسدة.
ولو أنت مابتحبش أي حاجة من الـ 12 حاجة اللي اتذكروا دول.. فاشرب مياه كتير وخلاص عشان مايجيلكش جفاف
