حاجات ماتعرفهاش عن “التوحد”
مصطلح “التوحد” ظهر لأول مرة حوالي سنة 1911 وكان معروف عنه حاجات قليلة جدا وكان بيحصل عنه أبحاث طبية قليلة جدا لحد نهاية القرن العشرين. ولحد النهاردة، كل يوم بنكتشف حاجات جديدة ومعلومات جديدة علشان نفهم التوحد أكتر ونقدر نتعامل مع اللي عندهم توحد بطريقة تناسبهم وتريحهم.
إحنا جمعنالكم شوية معلومات مهمة ممكن تكون ماتعرفهاش عن التوحد حسب موقع Mass General
1- التوحد بيكون عند طفل من كل 36 طفل
2- الولاد بيكونوا عرضة 5 مرات أكتر من البنات للتشخيص بالتوحد
3- التوحد بيصيب كل الجنسيات والطوائف والديانات والأعراق.. مش بيصيب مجموعة معينة
4- الدفاع عن النفس مهارة مهمة جدا للأفراد اللي عندهم توحد، ولازم نعرف نقاط قوتهم ونقاط ضعفهم عشان نساعدهم يعرفوا يدافعوا عن نفسهم في العيلة أو المدرسة أو المجتمع.
5- التوحد بيظهر غالبا على الطفل قبل ما يبقى عنده 3 سنين وبيستمر طول حياته
6- التعرف المبكر والعلاج والدعم حاجات مهمة جدا.. حياة أطفال كتير بقت أحسن بسبب التشخيص المبكر والعلاج والدعم
7- مش كل أنواع الدعم بتنفع كل اللي عندهم توحد، فلازم تكون مبنية على احتياجات الأطفال الفردية وأساليب تعليمهم، أما دعم البالغين بيكون بشكل متخصص جدا
8- مفيش حاليا اختبار دم طبي للكشف عن التوحد أو علاجه
9- الأباء والأمهات مش هم سبب توحد أطفالهم، وعلى الرغم إن أسباب التوحد مش معروفة، لكن المعروف لحد دلوقتي إن سلوك الوالدين قبل الحمل وأثناء الحمل وبعد الولادة مش بيسبب التوحد لطفلهم
10- الناس اللي عندها توحد بيواجهوا صعوبات في التواصل مع الناس.. بعض اللي عندهم توحد بيبقى عندهم معاناة في الكلام وبعضهم بيبقى عندهم معاناة في التواصل عامة
11- التوحد مش بيزيد أو بيسوء مع الوقت أو كبر السن، بالعكس الناس اللي عندهم توحد ممكن يتعلموا ويطوروا مهاراتهم بالدعم المناسب وممكن يتحسنوا بشكل كبير من خلال الخدمات المتخصصة والفردية وفرص الاندماج مع الناس
12- إن الطفل اللي عنده توحد يكون مابيتكلمش لحد 4 سنين ده مش معناه إنه عمره ما هيتكلم.. الأبحاث بتقول إن معظم الأطفال هيتعلموا الكلام ونصهم تقريبا هيبقوا بيتكلموا بطلاقة وبسهولة
13- الحالات الطيبة المتزامنة مع التوحد بتكون أعراض زي الحساسية، الربو، الصرع، الاضطرابات الهضمية، اضطرابات التغذية، اضطرابات النوم، واضطرابات طبية تانية
14- غالبا الأطفال والمراهقين اللي عندهم توحد بيكون عندهم كثافة عظمية أقل من الناس التانية
15- كل شخص عنده توحد مختلف وعنده صفات مختلفة.. وبيكونوا مختلفين عن بعض زي ما أي حد بيكون مختلف عن التاني
16- الأشخاص اللي عندهم توحد غالبا بيكون عندهم قدرة إبداعية كبيرة وممكن يلاقوا شغفهم أو موهبتهم في الموسيقى أو المسرح أو الفن أو الرقص أو الغناء.
17- الأطفال اللي عندهم توحد بيكونوا عرضة أكثر 160 مرة للغرق مقارنة بالأطفال التانيين.. وعشان كده ضروري ومهم يتعلموا سباحة وتبقى مركز معاهم لو نزلوا المياه
18- كتير من الأشخاص اللي عندهم توحد بينجحوا وبيشتغلوا وبيساهموا بشكل إيجابي في مجتمعاتهم زيهم زي أي حد، وكل ده بيرجع لتقديم الخدمات والدعم المناسب ليهم وهم صغيرين وخلال سنوات تعليمهم عشان يبقوا أفراد مؤثرين في مجتمعاتهم
وفي النهاية، بنتمنى الصحة والسلامة لكل الناس، وإن إحنا نغير صورتنا ونظرتنا النمطية عن أي حد متشخص بمرض أو اضطراب إحنا مش عارفينه، وكل ما نقرأ أكتر ونعرف أكتر عن التوحد كل ما هنقدر نساعدهم وندعمهم.
