حرائق ضخمة في جبال القدس بمنطقة الاحتلال ورفع حالة الطوارئ القصوى
النهارده الأربعاء 30 أبريل حصلت حرائق ضخمة في جبال القدس بمنطقة الاحتلال دفعت سلطات إطفاء الاحتلال إنها ترفع حالة الطوارئ القصوى
إمتى بدأت الحرائق دي؟ وإيه مدى خطورتها؟
بدأ اليوم الصبح بحريق كبير حصل في حرش قريب من بلدة “واحة السلام” في منطقة جبال القدس.. وده بعد ما المنطقة دي شهدت سلسلة حرائق ضخمة الأسبوع اللي فات اتدمر فيها حوالي 10 آلاف فدان من الأراضي الحرجية واللي قدرت ساعتها طواقم إطفاء الاحتلال تسيطر عليها في منطقة بيت شيمش وجبال القدس وكانت بسبب موجة الحر الاستثنائية حسب اللي أعلنته مصالح إطفاء الاحتلال.. لكن حرائق النهارده في منطقة جبال القدس كانت ضخمة وخلت سلطات إطفاء الاحتلال تعلن حالة “لهيب أحمر” ودي أعلى مستويات استعداد جهاز الإطفاء وأمرت بالتعبئة العامة لكل فرق الإطفاء على مستوى المناطق كلها.. وشرطة الاحتلال عملت إجلاء لكل سكان بلدة “واحة السلام” من بيوتهم ولبلدات تانية تحسبًا إن الحرائق تتوسع وتوصل لمناطق سكنية
وقناة الاحتلال الـ 12 قالت إن الـ 4 ساعات الجاية هتكون خطيرة جدًا بسبب قوة الرياح ودور ده في تفاقم الحرائق.. ونقلت تخوف مسؤول كبير في جهاز الإطفاء واللي قال إن اللي بيحصل سيئ وصعب وكل ده مجرد إننا في بدايته والأسوأ لسه قدام.. وهيئة إطفاء الاحتلال وصفت الحرائق بإنها “تستعر” وتشكل خطر كبير على الناس ده غير العربيات اللي اتحرقت على الطريق السريع رقم 1 وفيه 9 أشخاص تم إنقاذهم من عربياتهم اللي اتحاصروا فيها وسط دخان الحرائق الكثيف واتصاب حوالي 12 شخص واتدمرت أكتر من 200 عربية حسب الإعلام العبري.. ونتيجة لده وجهت دولة الاحتلال طلب رسمي وعاجل للحصول على مساعدات دولية لإخماد الحرائق والطلب ده بعتته لـ 5 دول هما قبرص واليونان وكرواتيا وبلغاريا وإيطاليا
إيه سبب الحرائق دي؟
لحد دلوقتي مايعرفوش أسباب الحرائق دي اللي تفاقمت بسبب حرارة الطقس والجفاف.. وشرطة الاحتلال بتحقق فيها وبتشتبه إنها مفتعلة.. وده حصل في يوم احتفالهم بذكرى استقلال دولة الاحتلال
