حضور فلسطيني في مهرجان كان السينمائي بجائزتين “أفضل إخراج وأفضل فيلم قصير”

امبارح السبت 24 مايو في مهرجان كان السينمائي فاز فيلمين بجائزة واللي فاز بيهم كان الأخوان طرزان وعرب ناصر عن فيلم “كان ياما كان في غزة – Once Upon a Time in Gaza” والتانية كانت لتوفيق برهوم عن فيلم “أنا سعيد لأنك ميت الآن – I’m Glad You’re Dead Now”.. فتعالوا كده نتعرف عن الفنانين والأفلام دي

1- فيلم “كان ياما كان في غزة – Once Upon a Time in Gaza”

الفيلم قصته تدور في غزة سنة 2007 حول طالب اسمه “يحيى” بيعمل صداقة مع واحد اسمه “أسامة” صاحب مطعم وعنده كاريزما وقلب كبير.. وبيبدأوا يبيعوا مخدرات مع بعض ولكن على طول بيبقوا مجبرين على مواجهة شرطي فاسد ومغرور بشكل كبير أوي

الفيلم خد جائزة أفضل إخراج في قسم “نظرة ما” بمهرجان كان السينمائي 2025 واللي يعتبر إنجاز كبير للسينما الفلسطينية والعربية.. والفيلم من إخراج الإخوان ناصر وتأليفهما بالتعاون مع عامر ناصر وماري ليجراند

2- فيلم “أنا سعيد لأنك ميت الآن – I’m Glad You’re Dead Now”

الفيلم مدته 13 دقيقة وبيحكي قصة شقيقين بيرجعوا لجزيرة الطفولة بتاعتهم واللي بيواجهوا فيها أسرارًا دفينة وتوترات لمواجهة ماضي مظلم بيربط بينهم 

وبيستكشف موضوعات زي الصدمة.. الذنب والروابط العائلية المعقدة وبيسلط الضوء على كيفية تأثير الماضي على الحاضر

كمان الفيلم أول تجربة إخراجية للمخرج توفيق برهوم وكان شارك في مهرجان كان كممثل سنة 2022 

المخرج الفلسطيني توفيق برهوم فاز بجائزة “السعفة الذهبية” لأفضل فيلم قصير عن فيلمه عشان يبقى أول مخرج فلسطيني يحصل على هذه الجائزة منذ استحداثها

وقال في تصريحاته بعد استلام الجائزة “بعد 20 سنة عندما نذهب إلى غزة سنحاول ألا نفكر في الموتى” واللي كان جزء من الرسالة بتاع الفيلم وإن إزاي اللي بيحصل دلوقتي ممكن يأثر بعد 20 سنة

كمان قال إنه شايف التصريحات والقرارات اللي بتحصل من دول أوروبا لكنها خدت وقت طويل عشان تحصل واتأخرت

وختم كلامه كمان وقال “الجائزة دي مخصصة للسلام في فلسطين.. لنتوقف عن نشر الكراهية ونوقف هذا الجنون الذي يحدث”