حكايات لاعيبة غيّرهم الرحيـل.. أما طوق نجاة أو بداية للاختفاء

 الرحيل في كرة القدم عمره ما كان مجرد تغيير نادي أو قميص جديد.. بس أحيانًا بيبقى طوق نجاة للاعب كان محاصر فنيًا أو نفسيًا.. وأحيانًا بيكون أول خطوة في طريق النهاية.. لاعب يطلع من ناديه وهو محسوب احتياطي أو مشروع فاشل.. يلاقي نفسه نجم صف أول في بيئة تانية بتفهمه وتوظفه صح.. ولاعب تاني يمشي وهو متشال على الأعناق وتحت الأضواء.. وبعدها يختفي لما الاسم الكبير والتوقعات العالية يضغطوا عليه.. التاريخ مليان قصص بتأكد إن الموهبة لوحدها مش كفاية.. وإن التوقيت والبيئة والمدرب وطريقة اللعب ممكن يصنعوا أسطورة.. وممكن يطفّوا لاعب للأبد مهما كان اسمه تقيل.

رحيل صنع أسطورة

محمد صلاح اتحكم عليه بدري في تشيلسي.. فرص قليلة.. وثقة شبه معدومة.. واستخدام تكتيكي مش مناسب لقدراته.. والنادي نفسه اعترف بعد سنين إنه استعجل في الحكم عليه.. بس خروجه لإيطاليا كان نقطة التحول الحقيقية.. في فيورنتينا بدأ يستعيد نفسه.. وفي روما بقى لاعب أساسي يتحمل المسؤولية ويتطور تكتيكيًا.
قبل ما ينفجر انفجار تاريخي مع ليفربول عمل أرقام قياسية.. بطولات.. وتأثير مستمر سنين طويلة.. والفارق إن ليفربول فهم صلاح ووظفه على حقيقته.. عكس تشيلسي اللي حاول يحطه في دور مش شبهه ولا مناسب لطريقته.

غلطة تشيلسي المتكررة

كيفين دي بروين لاعب نابولي الحالي لما مشي من تشيلسي بهدوء ومن غير ضجة.. لكنه كان واحد من أكبر أخطاء النادي.. مع فولفسبورج انفجر وبقى صانع لعب متكامل.. وبعدها في مانشستر سيتي تحول لواحد من أعظم لاعبي البريميرليج تاريخيًا.. تحت قيادة جوارديولا بقى العقل المدبر للفريق.. لاعب بيدير الإيقاع ويصنع الفارق في اللحظات الكبيرة.. دي بروين كان وقتها مثال واضح إن بعض الأندية بتخسر نجومها قبل ما يفهموهم.

الرحيل الصح في الوقت الصح

أشرف حكيمي لما خرج من ريال مدريد بدري رغم فوزه بدوري أبطال أوروبا.. وكان ممكن يكمّل احتياطي سنين.. لكنه اختار طريق التطور.. مع دورتموند أخذ فرصة حقيقية وأثبت نفسه.. وفي إنتر ميلان تحول لظهير عصري متكامل يجمع بين القوة والسرعة والحسم.. قبل ما يبقى قائد مهم في باريس سان جيرمان.. جوهرة سابت النادي الكبير.. لكنها انفجرت بعيد عنه لما لقت المساحة والثقة.

شخصية أقوى من كل حاجة

سكوت مكتوميناي لعب أكتر من 250 مباراة مع مانشستر يونايتد.. وحقق بطولات وأرقام محترمة.. لكنه دايمًا كان لاعب “مكمّل” في نظر الجماهير.. رحيله لنابولي فاجأ ناس كتير.. لكن شخصيته القوية ومع مدرب فاهمه زي كونتي خلّوه يتحول لقوة دافعة حقيقية.. لاعب بيقاتل.. بيضغط.. وبيحسم.. وكان عنصر أساسي في مفاجأة نابولي بالمنافسة على الدوري الإيطالي.. لحد ما تُوّج كأفضل لاعب في البطولة.

الاستمرارية غيرت المسار

مسيرة مويز كين كانت واقفة مكانها.. تنقلات كتير.. إعارات.. وتجربة صعبة في إيفرتون من غير ما يثبت نفسه.. الموهبة كانت موجودة لكن الاستقرار غايب.. انتقاله النهائي لفيورنتينا غيّر كل حاجة.. لعب باستمرار.. بقى رأس الحربة الأساسي.. سجل 19 هدف في موسم واحد.. أنهى الموسم هداف الفريق.. ورجع اسمه بقوة في حسابات منتخب إيطاليا.. مثال واضح إن بعض اللاعبين محتاجين استمرارية أكتر من أي حاجة.

لما الرحيل يطفي النور

فيليب كوتينيو كان القلب النابض لهجوم ليفربول.. لاعب بيصنع وبيسجل وبيغير شكل الفريق.. خروجه لبرشلونة بصفقة فلكية كان المفروض خطوة للأمام.. لكنه اتحول لكابوس.. مركز مش مناسب.. ضغط إعلامي رهيب.. وفقدان ثقة تدريجي.. خلوه يضيع بين إعارات وتنقلات.. لحد ما اختفى بريقه تمامًا بعد ما كان واحد من أفضل لاعبي العالم.

هازارد.. الاسم أكل اللاعب

إيدين هازارد في تشيلسي كان متعة خالصة.. لاعب بيكسب ماتش لوحده وواحد من أفضل لاعبي العالم في وقته.. انتقاله لريال مدريد كان حلم اتحول لخيبة.. إصابات متكررة.. ضغط ضخم.. وجاهزية أقل من المطلوب.. وفي الآخر اتقال إن الريال اشترى الاسم الكبير.. مش اللاعب الجاهز.

من القمة للاختفاء

أليكسيس سانشيز في أرسنال كان القائد والمخلص.. اللاعب اللي الفريق كله بيعتمد عليه.. انتقاله لمانشستر يونايتد كان بداية السقوط.. ضغوط.. دور غير واضح.. وتنقل بين أكتر من نادي في وقت قصير.. لحد ما اختفى تدريجيًا.. واعترف بنفسه بعد كده إنه ندم من أول تدريب.

موهبة ضاعت في الزحمة

كان ساحر أياكس وقائده الفني.. لاعب صاحب لمسة مختلفة وشخصية قوية.. انتقاله لتشيلسي جه في توقيت صعب.. تغيير مدربين مستمر.. أدوار غير ثابتة.. وثقة متذبذبة.. خلت رحلته قصيرة ومحبطة.. موهبة كبيرة ضاعت وسط الزحمة.

وفي النهاية يعني.. كل القصص دي بتأكد حقيقة واحدة.. إن الكورة مش لعبة موهبة بس.. دي لعبة سياق.. نادي يفهمك صح ينوّرك.. ونادي يحطك في مكان غلط يطفّي نورك.. الرحيل أحيانًا إنقاذ.. وأحيانًا مخاطرة قاتلة.