حكايات يومية عادية.. حكاية64 : أول مرة أفهم الموت
عارف أول مرة بتحس وتفهم معنى الموت فيها.. ده اللي حصل معايا وأنا عندي 15سنة..
أنا طول حياتي وجدتي كانت شريكتي في الأوضة حرفيًا سنين طويلة أنا وهي سريرين في أوضة واحدة نصحى مع بعض.. ننام مع بعض يومي يبدأ وينتهي بصوتها
قبل وفاتها بسنة تقريبًا.. صحتها تعبت وحركتها بقت صعبة لحد ما ماقدرتش تقوم تاني وكان الحل الأنسب إنها تتنقل أوضة في بيت عمتي اللي جنبنا.. أوضة سهلة الدخول والخروج وسرير متحرك يطلع من البلكونة لو احتاجت ساعتها انفصلنا مكانيًا.. بس مش فعليًا كنت بقضي اليوم كله معاها وأرجع أنام.. يعني الأوضة اتغيّرت إنما باقي التفاصيل لا
أنا الوحيدة اللي كنت بعرف اساعدها تاخد دش.. ودي من الحاجات اللي لما كنت بعملهالها تدعيلي وتقول “زي ما بتحمّيني وأنا عايشة.. لازم تغسليني لما أموت”
وأنا أرد..“بعد الشر عنك”..بس في مرة وعدتها وأنا ماكنتش فاهمة ساعتها الوعد كبير قد إيه
ماتت فجأة.. وأنا كان عندي 15 سنة ويومها أول حاجة عملتها إني أكدت على بابا.. “أنا اللي هغسلها مش حد غيري” .. وهو ماكانش عنده مشكلة مع الفكرة بس كان قلقان عليا لأن السن صغير والموقف كبير ومهيب.. بس إصراري خلاه يقف في ضهري
تاني يوم وأنا داخلة مع المُغسلة أوضة الغُسل واحدة من عماتي حاولت تمنعني.. بس بابا قالها.. “هي اللي هتغسلها.. ده كان اتفاق بينهم” ودخلت
لحد دلوقتي مش فاهمة إزاي..كل عماتي ستات كبيرة كانوا منهارين.. إلا أنا كنت متماسكة بشكل غريب مش قوة.. تركيز
المُغسلة كانت مبسوطة بيا عشان كنت بساعدها.. بانجز معاها خطوة بخطوة.. لحد ما جينا نقفل الكفن
بصّتلي وقالت.. “مالك؟إنتِ من بدري مركزة معايا… روحتي فين؟”
والحقيقة؟ كنت في دنيا تانية فعلًا
دي كانت أول مرة أشوف الموت وأفهمه.. أول مرة أستوعب إن حد كان معايا حياة كاملة ذكريات.. كلام.. ضحك وحتى كلام عن موته وفجأة يبقى بين إيديا جسد من غير روح.. من غير رد فعل ومن غير وجود
ششش سكون كامل.. الفكرة كانت مرعبة مش المشهد لا المعنى والغريب إني ماعيطتش ولا صوتت أنا فكرت بس.. الوجع الحقيقي جه وأنا بشوف النعش وهو خارج لإنها كانت اللحظة اللي حسّيت فيها بتقل الوداع وكانت أول مرة أفهم إن الفقد مش بس حزن.. الفقد عجز والعجز ده هو نقطة ضعفي في الحياة ومن ساعتها عرفت إن أكتر حاجة ممكن تأثر فيا إني أفقد وماقدرش أعمل حاجة.. الغريبة إن الحياة بتكمّل كأن ماحصلش حاجة.. جدتي ماتت عندها حوالي 87 سنة عمر طويل بس وأنا واقفة حسّيت إن حياتها كانت قصيرة مش هي ولا غيرها المقياس لا عشان الحياة نفسها أطول بكتير وعاش فيها ناس كتير ومات فيها ناس أكتر
دي كانت أول مرة أفهم المعاني دي وأول مرة أعرف إن الإنسان ممكن مايبقاش خايف بس يكون مذهول.. مذهول من إن الناس بتموت
والحياة بتستمر..
