حكاية السيروم التايواني اللي هيرجع الشعـــر في 20 يـــوم
الفترة الأخيرة انتشرت أخبار عن سيروم اخترعوه مجموعة باحثين من جامعة تايوان الوطنية (NTU) وخدوا عليه براءة اختراع وده لأنه بيعالج تساقط الشعر ويحفز نموه من جديد خلال 20 يوم.. ودي تفاصيله
السيروم بيعالج تساقط الشعر إزاي؟
، الباحثين اعتمدوا على حاجة اسمها “فرط الشعر” أو Hypertrichosis” وببساطة دي معناها إن الشعر بينمو وبيزيد لما بيتعرض الجلد للتلف أو الإصابة، فالباحثين ابتكروا السيروم ده عشان يحفز الخلايا الدهنية في الجلد ويجدد بصيلات الشعر
إيه نتائج تجارب السيروم؟
حسب The Economic Timesالباحثين جربوها على الحيوانات عامة وعلى الفئران خاصة واستخدموا ساعتها مادة تحفز الجلد زي ما قالوا، واسمها “كبريتات دوديسيل الصوديوم SDS” وحطوها على جلد فئران شعرها محلوق فعملت التهاب بيشبه الإكزيما وده خلى شعرهم ينمو في مدة من 10 لـ 11 يوم، وعشان يكرروا ده من غير ما يعملوا تهيج لجلد الفئران، الباحثين ركبوا أمصال فيها حمض الأوليك وحمض البالميتوليك ودول أحماض دهنية طبيعية موجودة في الزيوت النباتية وكمان في الأنسجة الدهنية للبشر، وفعلًا النتايج كانت مبشرة سواء في الاختبارات المعملية الأولية أو حتى التجارب الذاتية المحدودة اللي اتعملت
هل السيروم بيشكل خطورة؟
البروفيسور “سونغ-جان لين”، مؤلف الدراسة في جامعة تايوان الوطنية، قال إنه استخدم نسخة مبكرة من المنتج على فخده لمدة 3 أسابيع ولقى إنها حفزت نمو الشعر، وإن الأحماض الدهنية دي موجودة في جسم الإنسان وفي منتجات طبيعية تانية زي الزيتون ومابتشكلش أي خطر
طب هيتوفر إمتى؟
حسب صحيفة Daily mail فالمنتج ده هيتوفر للاستخدام البشري في شكل مستحضر تجميل قريب ومن غير وصفة طبية كمان، بس العلماء دلوقتي بيعملوا تجارب سريرية على فروة رأس الإنسان لتحديد الجرعة الأكثر فاعلية وبيقيموا السلامة على المدى الطويل قبل ما يطلبوا الموافقة التنظيمية
ورغم إن الابتكار ده نتايجه مبشرة.. الخبراء شايفين إن لسه ضروري تتجرب على البشر قبل ما يتوفر في السوق.
