داني ووتر.. من بطل البريميرليج لعامل بناء “مبسوط” في مانشستر
“داني درينك ووتر” لاعب وسط ليستر سيتي السابق كان واحد من أهم عناصر الفريق اللي عمل معجزة حقيقية وفاز بالدوري الإنجليزي موسم 2015 2016 في واحدة من أكبر الصدمات في تاريخ الكورة الإنجليزي.. الإنجاز ده خلى أسماء كتير في الفريق تبقى مطلوبة في أندية أكبر زي كانتي ومحرز وداني نفسه وفعلا درينك ووتر انتقل لتشيلسي بعد ما اسمه لمع بقوة
لكن اللي حصل بعد كده ما كانش متوقع خالص وفي سنة 2025 اتفاجئ الناس إن بطل البريميرليج السابق بقى شغال عامل بناء في مانشستر وعايش حياته بشكل مختلف تماما
البداية.. ورحلة الإعارات
داني اتولد في مانشستر وبدأ مشواره الكروي في أكاديمية مانشستر يونايتد سنة 2009 لكنه ما خدش فرصته مع الفريق الأول وبدأ يتنقل في إعارات كتير لكارديف سيتي وواتفورد وبارنسلي التجارب دي علمته كتير بس ما كانش فيها استقرار حقيقي
نقطة التحول جات في 2012 لما انتقل لليستر سيتي.. وهناك قدر يثبت نفسه ويظهر إمكانياته الحقيقية وكون ثنائي قوي جدا في وسط الملعب مع نجولو كانتي ثنائي غير كل التوقعات
قمة المجد
موسم 2015 2016 كان موسم تاريخي لليستر سيتي.. وداني كان ليه دور واضح ومؤثر في وسط الملعب.. الفريق الصغير كسر كل الحسابات ورفع كأس الدوري لأول مرة في تاريخه ودرينك ووتر بقى اسم معروف في أوروبا
التألق ده خلاه ينتقل لتشيلسي سنة 2017 في صفقة كبيرة وكان عنده أمل يثبت نفسه في نادي من كبار إنجلترا
الإحباط في تشيلسي
رحلة داني مع تشيلسي ما كانتش ناجحة زي ما كان متوقع.. الإصابات لعبت دور كبير وخلته بعيد عن التشكيل الأساسي ومقدرش ينسجم مع طريقة اللعب
شارك في عدد قليل من المباريات واتنقل في إعارات لأندية زي أستون فيلا وبيرنلي وقاسم باشا في تركيا وأخيرا ريدينج وكل ده من غير ما يرجع لمستواه الحقيقي
بعيدًا عن الكورة داني مر بظروف نفسية صعبة .. لما فقد ناس قريبين منه وكان عنده مشاكل أسرية وضغوط كبيرة.. وهو نفسه اعترف إنه كان تايه نفسيا وعدى بفترات صعبة وحتى دخل في مشاكل قانونية في وقت من الأوقات كل ده أثر عليه كلاعب وإنسان
الاعتزال.. والحياة الجديدة
بعد فترة من غير نادي قرر داني درينك ووتر يعتزل رسميا في أكتوبر 2023 وهو عنده 33 سنة وبدأ صفحة جديدة بعيدة عن الملاعب والأضواء
دلوقتي داني شغال عامل بناء في مانشستر وبيشارك شغله على السوشيال ميديا من بناء ونجارة وتجديد مباني وصوره بالخوذة والسترة العاكسة عملت ضجة كبيرة وفي ناس علقت إن ده قاع الحياة
لكن داني رد بهدوء.. وقال إن شغله ده اختياره وإنه مبسوط بيه وقال كمان إن الفلوس مش كل حاجة وإن أي حد فاكر إن المال هيحل كل مشاكله يبقى غلطان لأن الصحة النفسية أهم
رسالة إنسانية قبل ما تكون كورة
قصة داني درينك ووتر مش بس عن كورة ولا عن فشل رياضي.. لكنها عن إنسان قدر يعيد اكتشاف نفسه بعد الاعتزال ويفهم هو محتاج إيه بجد
من ملاعب البريميرليج لمنصات البناء في مانشستر داني درينك ووتر بقى مثال حي إن الإنسان يقدر يبدأ من جديد في أي وقت طول ما عنده سلام داخلي وحب للي بيعمله.
