دراسة جديدة.. العلاقات الاجتماعية بتقلل الالتهابات المزمنة وبتبطئ الشيخوخة

كلنا بنقول إن الضحكة مع الصحبة الحلوة بتخلينا نصغر ييجي 10 سنين لورا ومابنحسش إننا كبرنا.. ودلوقتي فيه دراسة جديدة اتعملت واتنشرت في مجلة “Brain, Behavior and Immunity – Health” بتأكد الكلام ده

العلماء لقوا إن الأشخاص اللي بيكون ليهم علاقات اجتماعية عميقة بتكون نسبة الالتهابات المزمنة عندهم أقل وكمان بتسبب بطئ الشيخوخة وبيعيشوا حياة أطول وصحية أكتر كمان

تفاصيل الدراسة

الدراسة اتعملت بقيادة أستاذ علم النفس في جامعة كورنيل “أنتوني أونج” وشارك فيها 2117 شخص عشان يعرفوا إزاي العلاقات والتجارب الاجتماعية بتأثر على التكوين البيولوجي للإنسان وركزت على الساعات الجينية للجسم ودي علامات بتحسب سرعة شيخوخة الإنسان.. “أونج” بيقول إن العلاقات الاجتماعية بتبدأ من لمة الأهل في الطفولة والأنشطة اللي بيشارك فيها في مرحلة البلوغ لحد الصحاب والعلاقات اللي بيكونها في الشغل.. وعشان كده دراسته ركزت على 4 عوامل وهما: 

-الدعم اللي بياخده الإنسان من أهله.

-مدى الارتباط بالمجتمع والجيران.

-المشاركات في المجتمعات الدينية. 

-الدعم العاطفي المستمر من الأصدقاء والأهل.

نتائج الدراسة

• لاحظ “أونج” إن الناس اللي عندها علاقات اجتماعية ثابتة وموثوقة على مدار الحياة معدلات الشيخوخة البيولوجية عندهم أبطأ والالتهابات المزمنة أقل
• وده لأن العلاقات الاجتماعية بتسيب بصمة على الأنظمة البيولوجية المتحكمة في الشيخوخة زي المسارات الالتهابية والغدد الصماء
• “أونج” كمان لاحظ إن الموضوع مش مقتصر على وجود العلاقات الاجتماعية دي وخلاص.. لكن كمان طريقة نمو العلاقات دي وتعميقها على مدار الحياة بيشكل مسار الصحة بطريقة قدر يقيسها وده لأن العلاقات الاجتماعية مرتبطة بانخفاض مستويات الإنترلوكين-6 وده جزئ بيحفز الالتهابات.. وبالتالي قوة الجهاز المناعي بتعلى وأمراض القلب والسكر والتآكل العصبي بتقل 
• بالإضافة لده فالعلاقات الاجتماعية بتعيد ضبط الساعة الداخلية للجسم وده بيخفض العمر البيولوجي للإنسان فمظاهر تقدمه في السن بتبقى أبطأ 

• ووضحت الدراسة إن العلاقات الاجتماعية مش مجرد مصدر للفرحة أو بتخفف التوتر لكن كمان بتحدد صحة الجسم.. وحتى بتخلي التقدم في السن يحصل بشكل صحي

وفي الآخر الإنسان كائن اجتماعي بطبعه ومايقدرش يعيش لوحده في الحياة.. فحاول تتعرف على ناس مختلفين وتقوي علاقتك بيهم وده مش بس هيخلي صحتك أقوى لكن كمان هيخليك تكتسب معلومات ومهارات أكتر تساعدك في حياتك