ذكرى ميلاد أسامة أنور عكاشة.. أسطورة الدراما المصرية

27 يوليو هو ذكرى ميلاد الكاتب والسيناريست والروائي “أسامة أنور عكاشة” اللي يعتبر واحد من أبرز كتاب الدراما التلفزيونية في تاريخها، وخلال مشواره الفني قدم مسلسلات كانت ومازالت من علامات الدراما المصرية ومن ضمن الأعمال الأهم والأكثر متابعة في مصر والعالم العربي.

(بدايات أسامة أنور عكاشة) 

أسامة أنور عكاشة من طنطا، اتخرج من قسم الدراسات النفسية والاجتماعية في كلية الآداب بجامعة عين شمس سنة 1962 وحصل على درجة الليسانس. اشتغل لسنين طويلة في عدد من الوظائف في سلك التعليم، لحد ما قرر يستقيل سنة 1982 عشان يتفرغ تماما للكتابة، وكتب أعمال فنية كتير بين المسلسلات والسهرات الدرامية والمسرحيات والأفلام السينمائية، لكن أغلب كتاباته وأعماله كانت مسلسلات تلفزيونية اللي عددهم أكتر من 50 مسلسل، اللي حفروا اسمه بقوة كمؤلف مصري، ونجحت في تغيير شكل الدراما التلفزيونية.

(أهم أعمال أسامة أنور عكاشة)

من أهم مسلسلاته: خمس أجزاء من “ليالى الحلمة”  – “ضمير أبلة حكمت” – “زيزينيا” – “الراية البيضا” – “وقال البحر” – “ريش على مفيش” – “لما التعلب فات” – “عصفور النار” – “وما زال النيل يجري” – “أرابيسك” – “امرأة من زمن الحب” – “أميرة في عابدين” – “كناريا وشركاه” – “عفاريت السيالة” – “أحلام في البوابة” – “المصراوية” – “الحب وأشياء أخرى” – “رحلة السيد أبو العلا البشرى” و”الحصار”.

وفي السينما كتب مجموعة من الأفلام السينمائية أهمها: “كتيبة الإعدام” – “تحت الصفر” – “الهجامة” – “دماء على الأسفلت” – “الطعم والسنارة” – “الإسكندرانى”.. أما في مجال المسرح كتب مسرحية “القانون وسيادته” و”البحر بيضحك ليه” و”الناس اللى في الثالث”.

(قضايا أسامة أنور عكاشة)

البحث عن الهوية.. والحب في مواجهة ضغوط الفلوس والنفوذ والسلطة.. قضايا مهمة طرحها أسامة أنور عكاشة في أعماله. وفي الدراما بيكون فيه نوعين، دراما البطل الواحد، ودراما الشخصيات المتنوعة، وعكاشة قدم النوعين في أعماله.

(شخصيات أسامة أنور عكاشة)

من أهم الحاجات اللي بتميز عالم أسامة أنور عكاشة هو الشخصيات، الشخصيات طول الوقت من لحم ودم، عندها عمق وفلسفة وأبعاد مختلفة عن أي شخصيات اتقدمت في أعمال تانية.

(أسامة أنور عكاشة.. لحد دلوقتي)

أسامة أنور عكاشة اتوفى في 2010، وبعد وفاته رجعت كتاباته للظهور مرة تانية.. في 2013 اتعرض مسلسل موجة حارة عن روايته، وفي 2022 اتعرض مسلسل راجعين يا هوى عن مسلسل إذاعي قديم من كتابته، وفي نفس السنة فيلم “الباب الأخضر” اللي كتبه في نهاية فترة التمانينات.

(فيلم وثائقي عن أسامة أنور عكاشة)

مؤخرا، قناة الوثائقية عملت فيلم وثائقي بيتكلم عن مسيرة أسامة أنور عكاشة الفنية وأهم المحطات الفنية في حياته وعن أعماله اللي عبرت عن حاجات كتير في حياة المصريين وأعماله اللي عايشة معانا لحد دلوقتي.

الفيلم هيتكلم فيه عدد كبير من الفنانين والنقاد اللي عاصروا أسامة أنور عكاشة، من بينهم إلهام شاهين، وصابرين، وعبد العزيز مخيون، ولوسي، والمخرج رؤوف عبد العزيز، والناقدة الفنية ماجدة رويس، والكاتب الصحفي عبدالله السناوي.

ومن المقرر إن الجزء الأول من الفيلم يتعرض يوم الأحد الجاي 30 يوليو الساعة 10 بليل.