رجعتلهم الأمل تاني.. إيه تفاصيل زراعة شريحة في العين بترجع الرؤية للمكفوفين ؟

الفترة دي انتشر خبر بيدي أمل للمكفوفين من كبار السن إنهم يقدروا يرجعوا يقرأوا مرة تانية.. بسبب جهاز اسمه “PRIMA” وعملية جراحية لزرع شريحة دقيقة في الجزء الخلفي من العين.. كمل وهنحكيلك كل تفاصيلها

إيه تفاصيل عملية زرع الشريحة؟ 

• فيه جهاز اسمه “PRIMA” اخترعه دانيال بالانكر أستاذ طب العيون بجامعة ستانفورد وطورته شركة الهندسة العصبية Science Corp في كاليفورنيا.. ودي تجربة شارك فيها باحثين مختلفين وكمان حوالي 38 مريض بيعاني من مرض “الضمور الجغرافي” من بلاد مختلفة بأوروبا.
• وحسب موقع BBC العملية حصلت في مستشفى “مورفيلدز” للعيون في لندن لـ 5 مرضى اتزرعلهم شريحة لاسلكية حجمها 2 ملم مربع -سمكها قد شعرة الإنسان- في الجزء الخلفي من العين.
• المرضى لبسوا نظارات فيها كاميرا فيديو بتبعت شعاع من صور الفيديو بالأشعة تحت الحمراء للشريحة المزروعة في العين.. واللي بيربطهم ببعض معالج صغير كده موجود في جيب المريض بيحسن جودة الصورة وبعدين يبعتها لدماغه من خلال الشريحة المزروعة والعصب البصري
• وجهاز بريما ده بيرجع جزء من الرؤية بالأبيض والأسود مش ألوان.. فهي زي محاكاة للرؤية مش رجوع كامل ليها.. لكنه في حد ذاته تقدم بالنسبة للمرضى

طب إيه تفاصيل المرض اللي بتعالجه الشريحة؟

حسب موقع NBC  العملية بتعالج مرحلة متقدمة من “الضمور البقعي الجاف AMD” وده مرض مرتبط بالشيخوخة والتقدم في السن ومالوش علاج.. بييجي لأكتر من 5 مليون شخص في العالم.. وفي الحالة دي خلايا منطقة معينة من شبكية العين في الجزء الخلفي بتتلف وبتموت تدريجيًا مع الوقت وده بيخلي الرؤية مش واضحة وضبابية وبيبدأ المرضى يعانوا من صعوبة إدراك الألوان والتفاصيل الدقيقة

نتائج زراعة الشريحة وجهاز بريما

• استشاري جراحة العيون في مستشفى مورفيلدز للعيون في لندن واللي قاد التجربة في بريطانيا “Mahi Muqit” قال إن التكنولوجيا دي هتساعد المرضى في حياتهم اليومية وتغير حياتهم

• حسب بحث انتشر في مجلة “The New England Journal of Medicine” قدر 27 شخص منهم يقرأوا من أول وتاني وحصل تحسن ملحوظ على مخطط فحص العين ففيه اللي قدر يقرأ 25 حرف أو 5 سطور

• حسب موقع Yahoo News رغم التحسن اللي عملته الزراعة والجهاز لكن حصلت آثار جانبية خطيرة مرتبطة بالجراحة لـ 19 مريض زي ارتفاع ضغط الدم في العين وتراكم الدم حول شبكية العين.. ومعظم الآثار الجانبية اختفت بعد شهرين من الزرع

• الدكتور فرانك هولز الباحث الرئيسي في التجربة ورئيس قسم طب العيون في مستشفى بون الجامعي بألمانيا قال إن دي أول طريقة علاج تحسن وظيفة الرؤية لمرضى الضمور الجغرافي.. خاصة إنه مرحلة خطيرة بيخلي المرضى مش قادرين لا يقرأوا ولا يسوقوا ولا حتى يتعرفوا على وشوش اللي حواليهم.. وشايف إن النتايج دي بتعمل نقلة كبيرة في المجال ده

وبرغم كل النتايج المبشرة بس زراعة الشريحة وجهاز بريما مش مترخص لسه ومقتصر بس على التجارب السريرية وتكلفته مش متحددة.. بس كلام الباحثين اللي شاركوا في التجربة قالوا إن النتايج المبشرة للزراعة ممكن يتم استخدامها في علاج أمراض العيون التانية في المستقبل